Summer 2024 Hyderabad

اشحالكم بنات وامهات .. عساكم ابخير ان شاء الله

كل عام وانتوا بخير وينعاد علينا وعليكم بالصحة والعافية ان شاء الله

مثل ما عوتدكم اني احط تقارير سفراتي لهالصيف

والحمدلله حطيت 3 تقارير .. واللي ما لحقت اتشوفهن .. تتفضل اتشوفهم بهاللنكات :

التقرير الأول إلى London
https://forum.uaewomen.net/showthread.php?t=530902

التقرير الثاني إلى Spain
https://forum.uaewomen.net/showthread.php?t=533048

التقرير الثالث إلى Paris
https://forum.uaewomen.net/showthread.php?t=536607

– – – – –

والحين ببدأ بالتقرير الرابع .. واللي هو سفرتنا ورحلتنا إلى مدينة Hyderabad .. وطبعا الكل يعرف انه في India

الله يسلمكم مثل ما ذكرت من قبل .. انه هالصيف كان عبارة عن رحلتين على مرتين .. الأولى كانت لندن اسبانيا وباريس .. والثانية الهند استراليا ونيوزيلندا

في يوم 19/7 ..
العدد: 5 كبار + 3 صغار
سافرنا على طيران الامارات بزنس من مطار دبي الى مطار حيدراباد
قضينا في حيدراباد اسبوع واحد بس

هذا الأسبوع كان قصير بس حلو ..
تمشينا واتحوطنا واتسوقنا

طبعاً بيت عموه بعد ساروا هناك حيدراباد بس هم كملوا من هناك مدن ثانية في الهند ونحن سرنا استراليا ونيوزيلندا

وفي يوم من الأيام حجزنا في Farm House واحد أمير ربيع عيال عموه << خلصوا العرب مرابعين مهنده خخخخخ لا وكافر بعد ..

شلينا قشارنا .. وطبعا خذنا ذبايحنا ووطبابيخ ويانا وسرنا .. كل عائلة بسيارة .. وبيت عموه ما شاء الله الشباب كلهم معرسين وكل واحد وعائلته .. وكل سياييرنا هناك طبعا مأجرينهم ..

وصلنا المزرعه الجميله

ملاحظة : سامحوني الصور مب لهناك .. لأنه كنا وايدين ما شاء الله وعيال عموه وعيالهم حشره ما خلوني اصور مثل الناس .. وغير البنات ما شاء الله قروبات قروبات فما صورت وايد واغلب الوقت كنت عاقه الكيمرا وخذت راحتي بدون ما ارتبط وياها وايلس اصور .. وبعد الصور اللي بتشوفونها مب فنيه ابدن .. أي كلام صدقوني .. بس هاك اليوم ما عرف كيف كان ما صورت عدل

هذا المدخل مالها .. وترى الجو كان طرررررررر بمعنى الكلمة .. ماطر وحلو .. عقولتهم "صحو" << اتضحك الكلمة هههههه

هذي الـvilla اللي في المزرعه .. الـvilla بصراحه جميله جداً بسيطه وكل شي فيها سمبل .. بس ما رمت اصورها من الداخل لأنه كان ممزور من اهلنا ما شاء الله .. بس صدق داخل الديكور وايد حلو والقعدات وغرف النوم والمطبخ والدور الثاني احلى والميالس فيه راقيه جداً

وهذي من زاويا ثانية

هذا جلب الحراسه في المزرعه .. سميناه "صاروخ" ذبحنا من سرعته في الركض سريع وايد ما شاء الله ما يضرب بريك ههههههه

هني كل حد بركن سيارته .. والـtoyota الـsilver نحن كنا فيها .. من دون اخواني الشباب اثنين لحقونا في دراجات وحد من عيال عموه في الـjeep

على يمين الـ villa رقعه فيها ألعاب لليهال .. "أي يهال حتى نحن لعبنا فيهم خخخخخخ"

وعلى يسار الـvilla رقعه خضره مسطحه فيها مريحانه خيط وكرسي وحيد .. ما عرف ليش حاط كرسي واحد .. كنا نتضارب عليه ههههههه
ولاحظوا الرسوم اللي عاليدار .. متفيج هالريال معدل هالكثر
وشوفوا برا سور المزرعه مزارع .. والمنطقة هذيج كلها مزارع وخضره

هذا الكرسي اللي كنا نتضارب عليه

وهذي المريحانه الخيط .. اختي العزيزه تتمريح عليها .. انا كنت آكل همبا ورقدت عليها ما سويت سالفه خخخخخخخخ

لاحظتوا انه اخر الصور من فوق .. والله ما كنت راكبه هيلوكبتر .. كنت طالعه فوق السطح
وهاي بعد مريحانه جميله فوق السطح .. اتخيلوا بس لو حاطين هالمريحانه في بلادنا فوق السطح في مثل هالوقت اللي في الصورة "وقت الظهر"
واتشوفون الطاولة .. لعبنا عليها "كيرم" كشخه طيرنا وايد حبوب من فوق السطح خخخخخخ وعقب يلسنا انلقطهم من تحت خخخخخخ
بس تدرون كيف طارت الحبوب من فوق السطح لين تحت .. لأنه الكيرم اكثر شي يلعبونه 4 اشخاص .. بس نحن لعبناه 15 وحدة خخخخخخ .. قولوا ما شاء الله

وهذي الـvilla من ورا .. بس اللي ورا الـvilla احلى واحلى ..

وهني بخليكم يوم كامل وبرجع باجر ان شاء الله بكمل باقي التقرير ..

واتطمنوا هالتقرير مب طويل وايد .. بيخلص بسرعه ان شاء الله

واايد عيبتني المزرعة والفيلا وحلوه لمة الأهل والحشره لول

وحليلها بشكارة قوم خالي من حيدر أباد ودوم تعزمنا على بلادها بس نحن ما نتشجع للهند

يمكن نغير الفكرة بعد ما تخلصين تقريرج ^_*

واصلي ونحن متابعين

– – –

فطامي .. يسلمو عالمرور والحمدلله استانسنا وايد

– – –

الغلا .. ههههههههه وانا بعد حسيتج ويانا

– – –

عاشقة ولدي .. الله يسلمج عزيزتي مشكوره

– – –

الغر الحشيم .. يا مرحبا بج .. هيه الفله والمزرعه ولمة الاهل وكله على بعضه كان حلو ..

وانصحج اتسيرين الهند .. تغيير .. جو ثاني غير عن اوروبا .. بس حيدراباد مب وايد فيها اماكن سياحية .. يعني في مدن ثانية وايد احلى انا سرتلها في السفرات اللي قبل بس هالمرة ما سرنا غير حيدراباد ..
ولا تعتمدين عتقريري هذا لأنه مب عاطي حق الهند .. قلتلج في مدن احلى بس ما بتدخل في هالتقرير .. ان شاء الله تقارير ثانية اذا قدرت احطها ..

– – –

فط فط .. فديتج شي مولات في حيدراباد بس ما وايد شرات اللي في بنقلور وبومباي .. واكيد ارخص شوي ..

– – –

وحياكم بنات وان شاء الله بكمل التقرير اليوم المسا