أخواتي حبيبات هذا رابط موضوعي الي ما يعرفه
https://forum.uaewomen.net/showthread.php?t=945167
وايد من اخوات جزاهم الله خير ساعدوني و قالولي أصبر ع ريلي….. حاولت و حاولت بس للأسف وصلت للنهاية..
ريلي يا أخواتي ما صرت اشوفه بالاسابيع والله اخر مرة شفته قبل اسبوع ونص والله العظيم لا يتصل ولا يسال عني وعن بنته حتي ما يقولولي تبين او محتاجة شي بس بالرغم من هذا انا اتصل فيه واسأل عليه واهله رحت عندهم عادي….
اهلي سافروا ومحد كان فالبيت الوالد اتصل فيه وقاله يكون وياي فالبيت يعني البيت بيته والله بنات بس يه مرتين خلال 10 ايام يتغدا و يروح والله بس يتم نص ساعة و يروح يقعد مع بنته عادي بس انا لا ولا كأني موجودة يمه "هو قبل كان عادي ايي بيتنا و ينام اذا اهلي مو موجودين"
ابوي يسألني اذا ريلي ينام عندي فالبيت قلت له هيه ينام وايي عندي قصيت ع ابوي بس عشان ما ابي مشاكل وما ابي ابوي يحاتي*
الحين ها الايام ما يسال ولا يتصل و كلمته عن الشيخ و جذبني انه قبل اسبوع يه عنده الشيخ وانا كاتبة عندي انه صارله اسبوعين وهو مو راضي يصدقني سكت وقلت لا حول ولا قوة الا بالله، مر يومين عادي عالسالفة وفي مرة ما سال عني طرشت له مسج قالي توه قاعد من نومه كنت عادية معاه صارت 3 ساعات و سالته شو يسوي قالي مع ربيعه يساعده عالمراجعة امتحان وقبل لا ينام انفجرت وقلت له ليش ما تسال عني وعن بنتي انا الي دوم اسأل عنك حرام عليك ع اقل بنتك اسأل عنها وهو ما يرد علي قلت له انا ما عندي ريل اذا سالونك الناس عني قولهم ان حرمتك ماتت ما صار لي حق والله أبدا ما عندي حق عليه وطبعا بكل برود قالي تصبحين ع خير انا بنام واليوم صار اخس والله لين ما وصلت حدي واتصلت حق امه وكلمتها بكل شي طلبت مني ارد الشقة قلت لها مالي رادة اذا انا فالبيت ابوي ما يسال عني عيل لما اكون فالشقة بيسال؟ سكتت وما قالت شي*
قلت لها حرام يخليني ع ذمته هو ما يحتاجني وانا ما احتاجه ولا ابي منه شي كافي الي صار ما خله فيني شي نفسيتي منهارة وكل شي صار علي كأني انا ريال وهو حرمة قلت لها انا متزوجة ابي احس أني متزوجة ابي احس عندي ريال وياي ما يقصر وياي يهتم فيني و يساعدني يكلمني يسال عني اذا هو ما يسوي ابسط الاشياء معاي ليش اكون معاه؟؟؟ ليش بس زينة عنده؟؟ المهم سكتت وقالت انا ما بقوله عن الطلاق بس بقوله يأخذج الشقة انا سكت وقلت لا حول الله جان اقولها عمتي انا خلاص ما بتكلم لان الدور ع رياييل يتكلمون و بندت…
بنات كلمت أمي بالموضوع الي صار قلت لها والله ما اقدر اتحمل زيادة واايد صبرت عليه وااايد سويت اشياء يمكن الوحدة ما بتقدر تسويه بس تحملت عشان بنتي، الحين بعد ما وصلنا لهالدرجة ابي الطلاق لاني مليت زهقت تعبت والله*
ها الشي وااااايد صعب علي لين متى اسوي نفسي فرحانة؟ لين متى لما يسألوني عنه اعطيهم أعذار ؟ لين متى كله بروحي بنات والله صعبة علي وااااايد اعصابي منهارة والله العظيم مو قادرة افكر
امي طلبت مني اكلم ابوي باجر واقوله كل شي وقالت خلااص انتي كلمتيهم بما فيه الكفاية الدور ع أبوج الحين يكلمهم بس لين متى جي قالت اول مرة اشوف ريال ما يتصل ع حرمته والله بنات اتصل فيه بس يكلمني دقيقة والله دقيقة*
أخواتي الله يخليكم الي بسويه صح ولا غلط؟؟؟؟
ساعدوني
حسبي الله ونعم الوكيل
حاولي ماتسألين عنه وقتها بيحس انج تغيرتي عليه وبيبدا هو يدور عليج وبيصير يهتم فيج بس انتي بينتي له نقطه ضعفج اهتمي بحالج وبنتج ولا تخلين يبين عليج الهم واحرصي علي الدعاء يمكن ربي يهديه وصدقيني يا اختي دام زوجج يصلي ولا راعي خراب احمدي ربج وهذي تعتبر من توافه الامور المرأه بطبعها ذكيه وهنيه جا الوقت الي تستغلين فيها ذكائج لاتدزين له مسجات ولا دقين عليه في الفتره الحاليه ارجعي لبيتج وخليج طبيعيه وشوفي والله ان يفقد اتصالاتج وبيتهيأ له انج ماصرتي تحبينه تذكري كلامي لو سويتي الي قلت لج عليه بيصير احسن من قبل وحاولي ماتدخلين الاهل في مشاكلكم انتي تصرفي والله يهدي سركم انشالله وتصير
الامور احسن
*
صلاة قيام الليل لمن لاتعرف>>للعضوة نوفاني
https://forum.uaewomen.net/showthread.php?t=324753
برنامج يحدد الثلث الاخير لقيام الليل >>للعضوة الشوق للجنان
https://forum.uaewomen.net/showthread.php?t=613699
موقع إلكتروني لتعليم القرآن الكريم بالتوجيه الصوتي>>للعضوة بنت مسندم مفيد
https://forum.uaewomen.net/showthread.php?t=950893
برنامج يساعدج ويذكرج بقراءة القران كل يوم حماس
https://forum.uaewomen.net/showthread.php?t=885255
اكتشفي وساوس الشيطان عند قراءة سورة البقرة
https://forum.uaewomen.net/showthread.php?t=895241
ﻣنْ دآومَ ﻋﻟىَ قِرآءتَہآ أتَحدآھْ إذآ لمْ يَحصُل ﻋﻟىَ مآ يريدھُ بآلضَبط
https://forum.uaewomen.net/showthread.php?t=926288
الَزِمَي الاستِغفار ونْمي مالج
https://forum.uaewomen.net/showthread.php?t=929591
وصفة للحمل من الشيخ محمد العريفي
https://forum.uaewomen.net/showthread.php?t=936903
الجن وقيام الليل
https://forum.uaewomen.net/showthread.php?t=899065
علامات توغل الايمان بقلب العبد وايد حلو الفيديو
https://forum.uaewomen.net/showthread.php?t=925032
وضوء النبي صلى الله عليه وسلم فيديو
https://forum.uaewomen.net/showthread.php?t=929594
جداول للأعمال اليوميه لتساعدكم وتشجعكم في عمل الطاعات
https://forum.uaewomen.net/showthread.php?t=926327
بس ما كان في سحر يعني و لا اعتقد في عين لان راحوا عند مطاوعه و ما كان في شي !
و صبرت 6 سنوات من يوم العرس لين الحين
عشان خايفه من شي اسمه طلاق !
و اهلها ما يعترفون بالطلاق !
ظالمنها
ظالم ولده
و هي ظلمت نفسها معاه
عايشة عند اهلها في منطقه بعيده عن منطقة اهل ريلها ب ساعتين و نص
الولد كله يسال عن ابوه يروح المدرسه يرجع يدور ابوه !!
زين ليش معلقنها
مب حرام !!
لانه جبان خايف تطلب نفقة تكسر ظهره ^_^
و لانها خاييفه من كلام الناس
ترا الناس قطعتها كلام و كلوا و لتوا فيها و فيه وايد
لانهم يشوفون اللي يصير
هو ما تكلم و لا اشتكى و هي ما تكلمت و لا اشتكت
بس الناس تشوف انه ما ييلس فالبيت و كله برع
و يشوفونها بروحها فالبيت و طلعاتها مع اخوانه و حريمهم و ابو ريلها و جيه
غلطتها
انها سكتت و كانت ميته عليه و تترجاه و تطلب منه يجابلها و دوم تتصل و هو ما يسال و لا يهتم
حتى المصروف كان يحوله لها عالصرافه !!
غلطتها انها كانت تقول باجر بيتغير !!
غلطتها انها كببرت راااسه و حسسته انها ما تقدر تعيش من غيرة
غلطتها انه كشفت اوراقها و خلته يتيقن انها ما تقدر تطلق و انه اهلها ما بيتحملون مصاريفها و مالها ظهر !!
غلطتها انها كانت ضعيفه ما استغلت شهادتها الجامعيه و درجاتها العاليه و سعت لوضيفه تستغنى فيها عن اي حد اولهم ريلها
وايد غلطات
انا ما اقول انه هو ما كان غلطان
لا تراه راكبنه الغلط من ساسه لراسه و كان قممة الغلط
بس هي ساعدته وايد للاسف !
اتمنى ما تكونين نفسها
اتمنى
لا تيأسين .. عطي كل اللي عندج و حاولي و عقب اتخذي قرار الطلاق ..
أول شي تقربي من رب العالمين .. و في نفس الوقت ردي الشقه عنده .. لا تلومينه انه ما يسأل لانج انتي ودرتيه و سرتي يلستي بروحج .. و الريال استغل هالفرصه .. لا تخلينه بروحه خلييج دوم وياه بس لا تكلمينه عن اي شي ..
خلج في بيتج و تعدلي و اهتمي في عمرج ولا تتعدلين عشانه ولا تترين مقابل منه يوم بتسوين شي سوي شي لـ نفسج .. ولا تسألينه و تقوليله أي شي ..
يعني لا تهملينه و لا تكلمينه .. أتمنى فهمتي عليه .. ><
انتي كلمتيه و ما نفع .. و ألحينه خلي حد من الرياييل يكلمه اذا حبيتي .. بس بعض الازواج ما يتقبلون فكرة انه حد يتدخل في أمورهم ..
و استخيري بـ خصوص الطلاق .. و ربي يسخركم لـ بعض ..
اصبري بعد شوي لعل و عسى
الحياة الزوجية تستاهل صبر اكثر
جربي ما تحنين عليه يعني خليه ع راحته شوفي شو يصير وضعه يمكن يسال عنج
انطري عليه بعد شوي شهر شهرين و تراها المحاكم موجودة يعني لاحقة ع الطلاق اذا ما نفع معاه شي
لا تستعيلين ع الطلاق جربي و حاولي و لااا تحنين عليه ابدا لمن يتصل ولا تتصلين به بس اذا اتصل ردي عليه
الله يصلح الحال