عندي سؤال يخص معلمات رياض الاطفال

السلام عليكم كيف الحال ؟

البارحه كنت اكلم اختي بالتلفون وبنت اختي توها اول سنه بالروضه جان تقول لي ان المعلمه مالهم شكلها تضرب اليهال وتزاعق عليهم تقول بأول يوم من الدوام كانوا اليهال حشره وازعاج

ويوم روحت لهم ثاني يوم شافت الكل ساكت ويالس مكانه وتقول ان كانت بنتها شعرها مبهدل وما لمست شي من اكلها وحتى اللنش بوكس مب مبطله ويوم المعلمه شافت اختي اللي هي ام البنت راحت لها رتبت شعرها وبطلت اللنش بوكس وقالت لها اكلي

ولما رجعت البيت بنتها قالت لها ماما مدرستنا تصارخ وتضربنا على ايداتنا

انا قلت لاختي تروح تكلم المعلمه لان البنت خايفه واحس بهالطريقه بتكرهها بشي اسمه مدرسه وتعليم

بس شو رايكم شو تسوي وهل من حق المعلمه انها تضرب اليهال بعمر اربع سنوات بدل ما تحاول تجذبهم باسلوب حلو وتتعامل معاهم بالزين؟؟؟؟؟؟؟؟؟؟؟؟؟؟

:1 (25): :1 (25):

شنو هذي المفروض ما يعطونها أطفال ولا تصلح تكون معلمة واكيد الطفل بيكره الروضة من بدايتها ضرب واعصاب وصريخ

المفروض تخبرون الادارة توقفها عند حدها وتعطيها انذار انها ما تكرر هالشي واذا استمرت باسلوبها هذا تخبرون مدير المنطقة التعليمة
أصلا الروضة أهم شي فيها المعلمة انها تهتم بالأطفال وترعاهم وخاصة ان الطفل ترك أمه وبيته واخوانه اللي تعود عليهم لعالم ىخر المفروض يعوضه عن فقدان اللي تركهم مب العكس تخوفهم وتصرخ عليهم
آآآآآآآآآآآآآآآآآآآآآآآآه لو عندي ه المعلمة والله اني بسوي لها دورة في طرق التعامل مع الأطفال وان ما تعدل اسلوبها أفصلها

اختي بنت الأياويد لا تسكتين بعدين البنت بتكره الروضة وبتكره المدرسة

بنت الاياويد نصيحتي لأم البنية …….ما تستحي وتروح اتكلم المعلمة بكل هدوء……..ولا تكبر الموضوع …….. ماعليه تاخذ المعلمة على جنب وتخبرها انه بنتها طفلة وبدت تاخذ فكرة سيئة عن الروضة وعن معلمتها …..خليها اتذكرها انها آمانة عندها وهم مهما سووا اطفال بعدهم ما يسيطرون على سلوكهم ومن الطبيعي جدا الازعاج والصراخ من اليوم الاول …….وطبعا لازم الام تكون حازمة مع المعلمة بس باسلوب راقي……..وتذكرها ان الضرب غير مسموح في المدارس العليا فما بالكم بالروضة …… اطفال لا حول لهم ولا قوة .تضربهم معلمة المفروض اتكون امهم وقريبة منهم
وقوليلها اني اقولج ترى في اطفال يحبون معلماتهم اكثر عن امهانهم والله اني ما ابالغ …..وهذا صار لانه اسلوب المعلمة يفرض على الطفل فرض التعلق والتمسك بها كشخص حنون عطوف محب للاطفال وسعيد بمهنته
اسال الله يهدي هذي المعلمة ……..وبالعكس هذا الاسلوب لا يجر من ورائه غير التهرب من هذي المعلمة .واعطاء اولياء الامور فكرة غير جيدة عنها وبالتالي تدني مستواها من خلال تقييمها

هلا حبيبتي الرنه الغاليه انا قلت لاختي هالكلام ويارب تتحرك ما تسكت عاد انا فيني غيض ما احب حد يعامل بنت اختي جي لاني احبها وغير هذا حرام هاييل يهال المفروض يتعاملن معاهم بالطيب مب جذي

توني من شوي مسكره التلفون عن اختي تدرين شو تقول راحت كلمت المعلمه قالت لها وجان تقول المعلمه لا انا ما اضربهم وكانت البنت موجوده جان تقول لها أميره أنا ضربتج ؟
عاد بنت اختي ردت عليها قالت هيه ببراءه
جان تقول هذيج اونه كيف ضربتج جذي ؟؟
وجان تقولها انتي صحتي وانا صحت ؟ يعني تحاول تبين ان البنت جذابه

بعدين جان تقول المعلمه لاختي اونه بنتج وايد تخرط :1 (37): صراحه مب رد هذا او جواب

تغصصت من الخاطر والله
تدريين هاي بروضة البراعم واختي كانت متعوده على الدراري بس تقول ما قبلوا بنتها هناك اونه علشان المناقطق

الغاليه مشكوره على الرد واختي سوت هالشي بس المدرسه مب طايعه تعترف ولا بعد اتهمت البنت بالجذب مع ان بنت اختي مب من النوع اللي يشلخ ويطلع قصص وهي ما بتجذب بويها لانه البنت ردت عليها وقالت هيه ضربتيني مع ان معظم اليهال يخافون وما يتكلمون

وانا خبرت اختي تكلم الاداره لان شكلها هالمعلمه ما تستاهل حد يكلمها لان اسلوبها مب حلو ابدا في التعامل لا مع الاطفال ولا اولياء الامور

بس اختي متخوفه انها لو كلمت الاداره ما يسوون شي وتخاف تحط دوبها ودوب بنتها

يالله بنشوف شو بيصير معاها والله يعين اليهال صراحه

لازم المعلمة تخاف ربها ..عيال الناس جايين يتعلمون..احنا موقعيننا على ورقة ممنوع الضرب في المدارس و الرياض .. المديرة لازم تكلمها شفويا و اذا ما سمعت الكلام تتخذ وياها الاجراءات
بس انتي خبروهم انكم بتتجهون للمنطقة او الجرايد تراهم بيهتمون في الموضوع
اختج معلمة رياض اطفال بوظبي

السلام عليكم هلا اختي شوكليت كوفي مشكوره عزيزتي ودامها ما احترمت القوانين الموضوعه ما اظن بتحترم اولياء امور الطلبه والله يعين .. ويارب تكون المديره متعاونه مع الاهالي

وبنشوف شو بيصير معاها