من بريد المشكلات المشكله الـ ~ 45 ~

مرحبا خواتي
انا عندي مشكله مع نفسي وماعرف كيف اشرحها لكم بس بحاول ارتب كلامي على قد ماقدر لاني ماعرف اعبر عن اللي بداخلي والسبب اني من النوع الكتوم والمتحفظ في شخصيتي وصفاتي الشخصيه ، وماحب اقول نقاط ضعفي لأي أحد لاني اعتبرها شي خاص فيني جدا جدا.
وانا البنت الوحيده بين اخواني الشباب.
انا تشجعت اني اكتب هالشي لكم لاني صدق حبيت تعاونكم مع مشاكل خواتي في المنتدى.
انا الحمدلله انسانه ناجحه في حياتي وحبوبه بين الناس وبين اهلى وانا اصغر وحده في اخواني ومشكلتي بدت فيني من فتره اني دوم خايفه واحاتي اهلي وافكر في نفسي واقول لو فقدت حد من اهلي كيف بعيش وكيف حياتي بتكون وكيف بصبر ولو صار الله لا قال شي بأمي أو أبوي او حد من اخواني شو بيكون حالي واحاتي اخواني بدرجة فضيييييعه ماتتصورونها ولو حد منهم صارت له مشكله تلاقوني طول اليوم قلبي واقف واحاتيه وافكر وحالتي النفسية تعبانه ولو كانت هالمشكله تافهه وماتستاهل بقعد بفكر وبحاتي بدرجه كبيره وحتى في اتخاذ قراراتي صرت ماقدر اتخذ اي قرار لاني وايد اخاف اني اندم واقول ياريت ماتخذت هالقرار مع اني قبل كنت قويه واتخذ قراراتي بسهوله.
واتخيل اشياء مب موجوده واقول لو صارت كيف ممكن اتعامل معاها .. واايد عندي خوف من المجهول والمستقبل .. ودوم احمل نفسي مسؤولية غيري والوم نفسي .. يعني مثلا اقول لو انا سويت هالشي يمكن ماكان بيصير هالموقف ،، بس انا اساسا مايخصني بالموضوع ><
واللي صدق يجلب كياني كامل اني لو شفت امي مضايجه او حزينه والله قلبي يتقطع وماحب اكل ولا اشرب واتم افكر فيها واسوي اي شي بس احاول اغير من نفسيتها حتى لو كان هالشي شي بسيط بس ماقدر اشوفها جيه. ولو طلبت مني شي وانا بهالوقت اكون مرتبطه مع ربيعاتي وخاطري اروح عندهم عادي اكنسل كل شي واسويلها اللي تباه بس عشان ماردها في شي ولوكان هالشي ممكن يتأجل لوقت ثاني بعد ما ارجع من عندهم. وتخيلوا ليش انا اسوي جيه؟؟ السبب اني اقول في خاطري اخاف يوم من الايام افقدها واقول ياريتني سويته لها وماتأخرت عليها (اعرف مب لهدرجه بس هذا تفكيري).
وانا انشاءلله عن قريب راح اتزوج بس مول ماقادره اتقبل الزواح بس لاني افكر في بيتنا واهلي وشو ممكن يصير وانا مب موجوده ،، اخاف يصير شي واتندم ليش ماكنت موجوده لاني لو كنت موجوده ماكان بيصير هالشي يعني مثل ما قلت لكم وايد احمل نفسي المسؤوليه ومسؤولية غيري يمكن لاني بديت اتحمل مسؤولية بيتنا بحكم اني متواجده في البيت كل وقتي اكثر من اخواني لانه كل واحد لاهي بنفسه.
بقولكم بعض المواقف اللي صدق اتعبني واتم اسبوع او اكثر لين ما اقدر انساها ،، يعني قبل فتره شفت ريال آسيوي شيبه وتعبان حيل وشايل عصير يبيع بس عشان يسترزق كسر خاطري ودمعت عيني وطول الوقت هالموقف فبالي مايفارقني واحس الدنيا مافيها خير ونحن عايشين وناكل ومرتاحين وغيرنا شقيان وتعبان ومامحصل اللقمه .. صح هالشي يحزن بس مب لدرجة اني اتم مضايجه طول وقتي وافكر بالموضوع حتى ما اقدر ابتسم واسولف .
هالشي خلاص تعب نفسيتي واحسه يدمرني ويخليني عايشه جو من الكئابه واحيانا تمر علي ايام والله محد يعلم شو فيني من التعب اللي اكون فيه وهالشي بدا يخنقني صرت ماقدر اضحك ولا اقدر اسولف والضحكه بالحسره تطلع مني بس لاني مابا ابين لحد اني مضايقه.
واقعد اشوف الناس حولي تضحك وتسولف اقول انا ليش مب مثلهم ليش ماقدر اضحك ليش كله شايله هم وافكر والمفروض اخلي الامور تمشي مثل ماهي لانه هذا شبه وسواس بس ماااااااااااااااااقدر والله ماقددددر.
تعبت وتعبت وتعبت مع انه علاقتي بربي قويه وهالشي خلاني اقوي علاقتي بربي اكثر واكثر بس ماعرف شو اسوي ابا حل يطلعني من اللي انا فيه من بعد ربي.

اسمحولي طولت عليكم .. اتريا اسمع رايكم