الحمدلله على كل حال :)

اشحالكن خواتي ؟؟ ان شاء الله ابخير ؟؟

خواتي اذا تذكرن اني بتاريخ 06 – 12 – 2024 نزلت موضوع عن مشكلتي مع خطيبي
هذا رابط الموضوع اللي حابة تشوف الموضوع

ساعدوني في مشكلتي الله يرضى عليكن :'(

خواتي بكمل لكن اللي صار فالموضوع
واحمد الله على كل شي واشكره ليل ونهار للنتيجة اللي وصلت لها

خواتي انا كتبت اني صعبة ابتعد عنه لأسباب خاصة وفي وايد حاولوا يشككون في اخلاقي وعفتي لكن والله اني ما رديت على اي وحدة حاولت اتشكك في عفتي لاني ولله الحمد واااثقة كل الثقة بنفسي وبأخلاقي

خواتي بعد الموضوع اللي طرحته كنت عايشة حالة نفسية صعبة وكله كنت اصيح مو لاني اتضاربت معاه لكن كنت اصيح كيف اخبر اهلي باللي صار

تميت من تاريخ طرح الموضوع لين تقريبا تاريخ 16 من الشهر نفسه ساكتة وما اقول شي وعقبها رد خطيبي اتصل فيني يعتذر عن اللي قاله لكن انا طنشت وسويت نفسي ما سمعت شي من اللي قاله قبل

وخذت قاعدة ان اسمع اللي يعيبني واطنش اللي يغثني ويضايقني ومن تاريخ 17 ردت الامور طيبة بيننا بس انا ما كنت اهتم فيه شرات قبل وما كنت اتصل فيه وهو حس بهالتغيير وتم يسألني وانا اقوله استعيل في الموضوع وخذت على كلام احد الاخوات يزاها الله خير وقالت لي قوليله انج ما بتكلمينه الا بعد الملجة وتم هو يومين يتصل وانا طاااااااااااااااااااااااف محترم وما ارد عليه لاني كنت محتاجة افكر واعدل اموري

وفي تاريخ 25 – 12 وصلت للقرار المهم في حياتي بعد نصيحتكن خواتي الغاليات وبعد نصيحة من اخوي وخواتي

قلت له في هالتاريخ: يا فلان انا وانت ما نصبح انكمل مع بعض وانا خبرت اخوي وخواتي وهم بيخبرون اهلي عن قراري واتمنى تفهم هالقرار ونبتعد … تم هو محتشر في البداية لكن والله ثم والله ما حنيت عليه ابد لان فعلا قلبي قسى عليه وقلت مستحيل احن على انسان قالي كلام يذبح شرات السم

المهم الامور كلها خلصت واخوي حاول يفهم امي وابوي الموضوع لين ما اقنعهم
والحمدلله رضوا وانتهى كل شي بين الطرفين

صح اني عشت ايام صعبة لمدة شهرين او 3 شهور لكن كنت صامدة وقلت مستحيل اتراجع او ارد اكلمه مع انه كان يتصل ويخلي خواته يتصلون يصلحون الوضع لكن ما اهتميت لشي

واذكر خلال هالفترة اخته اتصلت فيني وقالت لي كلام مثل السم اونه في احد في حياتج وانتي ما تستحقين شي وغيره وغيره … ووقتها انفجرت عليها وعطيتها مثل الكلام السم اللي هي عطتني اياه وبعد هالمكالمة حسيت ان الدنيا اتلف وادور فيني واختي كانت عندي وتسمعني شو اقول وراحت خبرت امي بسرعة
امي اتصلت في ابوي وابوي اتصل في خطيبي سابقا وشرشحه يدام الكل وامي اتصلت في الاخت وعطيتها من الكلام الزين اللي يضرب فالصميم وقالت لها بنتي مو لعبة لكم جي اتسون فيها وقالت لها لو انتي مو شريفة هي اشرف عنج وعن اللي من امثالج وصكرت الخط في ويهها

والله خواتي احس انهم بردوا الحره اللي فيني وفي لحظتها بس كنت طول الوقت اقول: حسبي الله ونعم الوكيل فيكم … والله ينتقم منكم
بس امي يوم سمعتني جي اقول قالت خلاص لا تدعين الدعوة بترد عليج

قلبي كان يتقطع مو عليه
قلبي كان يتقطع عالايام اللي مضت معاه
قلبي كان يتقطع لاني تحديت الكل عشانه
قلبي كان يتقطع على كل تضحياتي له

ومن بعد تاريخ 13-3 علاقتي معاه ومع اهله مقطوعة نهائيا لكن هو يتصل وانا ماارد عليه وخبرت اخوي انه لين الحين يتصل ..جان يهزأه لكن ما تأدب واخوي قالي طنشيه او غيري رقمج جان اقوله بطنشه ووعدته اني ما احن له وارجع اكلمه

بقولكن خواتي عن الاحداث اللي صارت

انا كتبت فوق ان اخته اتهمتني بشرفي واخلاقي وانا ما قلت لها شي غير حسبي الله ونعم الوكيل فيج ودايما كنت ادعي دعاء المظلوم
سبحان الله مو شماته او شي لكن والله كانت حامل وطيحت … والله اني حزنت عليها وقلبي عورني وقلت انها ما تستاهل اللي صار فيها وحتى من كثر ما اني لووووووووح اتصلت في اختها الثانية عشان توصل سلامي لها ههههههههههه <<< مشكلة اللوووووووح هههههه

امي عقب ما عرفت قالت لي لانها ظلمتج واااايد والله ردها فيها
لكن قلت حرام هذا مكتوب والله يكون بعونها

يمكن مستغربين ليش انا كاتبة الموضوع
لكن خواتي حبيت اعبر عن شعور الفرحة اللي انا فيها لاني تخلصت منه ولاني بفضل رب العالمين وبفضلكن وفضل اللي حواليني قدرت ارجع شرات قبل
قدرت اسوي وااايد اشيا كنت محرومه منها لما كنا مع بعض
والاهم من هذا كله الفرحة اللي احس بها لما اشوف اهلي راضيين عني