بسم الله الرحمن الرحيم
والصلاة والسلام على اشرف الانبياء والمرسلين
سيدنا محمدصلى الله عليه وسلم وعلى اله
وصحبه اجمعين
اللهم ارنا الحق حقاً وارزقنا اتباعه
وارنا الباطل با طلاً وارزقنا اجتنابه
اللهم امين
من بعد ما توفي الطفل مشاري رحمه الله
كثرت المواضيع هنا عن الشغالات
وكلها تخويفيه وتحذيريه
هذا اول موضوع لي بالمنتدى
وراح اتكلم عن الشغالات
اكيد كلكم تفاجئتم من العنوان
احنا ولله الحمد ماعندنا شغاله
وان شاء الله مانحتاجها
وان شاء الله اذا تزوجت ما احتاج لها
لكن اللي خلاني اختار هالعنوان هو
ان فعلاً اللي عندها شغاله هي واولاها يعطون
الشغاله كف ولكن مش الكف اللي في بالكم
والشغاله ترده لهم كفين ولكن مش الكفين
اللي بالكم
احترتم صح؟
افهمكم
الام واولادها يكرفون الشغاله في البيت كرف
من غسل وتنظيف وكوي واكل وهاتي وحطي
واذا خلصتي من غسيل المواعين
روحي اغسلي الملابس
ما تتمنى ويجي الليل علشان ترتاح ( هذا هو الكف اللي تعطونه الشغاله)
الشغاله بتموت من كثر الشغل اذا غلطت بشي شتمتها الام …
وسبوها الاولاد
ويتحكمون فيها … ومش حاسين انها انسانه
من لحم ودم
تبدأ الشغاله تفكر بالانتقام …
اما انها تسمم او تسحر (وهذا هو الكفين اللي ردته لهم)
انا مو مع ولا ضد الشغاله
راح اقولكم قصه صارت لي
وهي حقيقيه وفي حياتي ماحكيتها لامي
امي كانت مسافره لان جدي كان تعبان
وصرت انا المسؤله عن البيت
كنت اقوم الصبح على الساعه 11 علشان افتح لاخواني
قمت وغسلت مواعين الفطور اللي تركتها اختي قبل ما تداوم لانها ماعندها وقت وراها لبس وباص
غسلت المواعين رتبت البيت جهزت لاخواني اكل لانهم مالهم خلق ينتظرون ابوي اللي مايرجع
من دوامه الا 2 الظهر
رجعوا اخواني من المدرسه انا انظف
من جهه وهم يخربون من جهه
عصبت عليهم وقلت لهم انا ماني شغاله عندكم
شيلوا اوصاخكم ورتبوا …. رحت اركب بالغداء
علشان ابوي اذا جا يتغدى … رجعت لهم ولا حياة لمن تنادي
صرخت عليهم مرة ثانيه … ولا حياة لمن تنادي …
قمت شلتها انا ورتبت …
رجع ابوي تغدى غسلت المواعين
بعد صلاة العصر جهزت الشاي والقهوه
تقهوى ابوي قاموا اخواني وخواتي حطيت لهم خفايف مع عصير
خواتي وابوي على التلفزيون
واخواني بالشارع يلعبون
اخذت المواعين وغسلتها وتركت الشاي والقهوه
لاني كنت اتقهوى مع ابوي
على المغرب رجعوا اخواني … وذاكروا
رحت امسح السراميك لان رجولهم بقعت على السيراميك
خلصوا مذاكره وبداوا بحوستهم صارخت عليهم
وابوي صارخ عليهم وقالهم رتبوا يالله اختكم ماهي شغاله
رتبوا بدون نفس
راحوا صلوا العشاء رجعوا جهزت العشاء
تعشينا … غسلت المواعين
ماتمنيت واخواني ناموا ورتبت البيت
وكل يوم على هالحاله
اللين جا ذاك اليوم اللي ماراح انساه
يوم رجعوا اخواني من المدرسه واكل اخوي الصغير وعفس المكان
صارخت على اخوي الصغير هو رابع ابتدائي
وقلت له قوم الحين شيل اوساخك ورتب المكان مثل ماكان ورفض وهو معند وانا معنده
وقال انا ماني خدام
جن جنوني وراح العقل مني كل يوم انا اللي اشيل وكأني انا خدامه عندهم
قمت واعطيت اخوي ذاك الكف اللي طلع من قلب قلبي
ومسكته مثل المجنونه وانا اصارخ بكل قوتي
انا مو شغاله عندك فاهم …واضربه واجره من ثيابه
وقلت له قوم واطلع بره … وفتحت باب الشارع ورميته بقوه
وحلفت لو دق الجرس انه يموت
سكرت الباب … رحت المطبخ وبديت بطبخ الغداء
مرت عشر دقايق
بدين اخاف على اخوي …
حسيت بتأنيب الضمير تدرون ليه
لانه اخوي … ومن لحمي ودمي …
واخاف عليه
لو اني شغاله ماكان اهتميت لاني ما تربطني فيه اي علاقه
مجرد ولد صاحبة البيت ولو سألوا عنه اصحاب البيت كان قلت اي شي المهم اصرف نفسي
بس انا ما كنت شغاله … انا اخته
خفت عليه من اولاد الحرام
رحت فتحت الباب ولقيته ياعمري وجهه احمر
والعرق يصب منه صب
خنقتني العبره وقلت له يدخل
دخل وراح المقلط يبغى مكيف يتبرد
وانا رحت غرفتي وقعدت ابكي وابكي وابكي
الين ارتحت
رحت لاخوي وقلت له بهداوه اذا مره ثانيه قلت لك شيل ورتب يعني شيل ورتب …
رجع وقال انا ماني خدام
قلت له ادري انك مو خدام وحتى انا مو خدامه
بس هالاوساخ وهالحوسه انت سويتها
المره هذي انا بشيل بس المره الثانيه انت تشيلها
يمكن تقولون عني مجرمه وماعندي قلب
بس والله يابنات اني طيبه ودمعتي دايم قريبه مني
والله فعلاً كنت احس نفسي مثل الشغالات ما اتمنى ويجي الليل علشان انام وارتاح
اللي خلاني اجن اني ما كنت لاقيه احترام من اخوي
راح اقولكم كمان قصه صارت لنا بس هالمره مع شغاله كانت ناويه على سحر
كنا مجتمعين امي وانا وخواتي واخواني وخالتي صاحبة الشغاله وبناتها واولادها
وخالتي الصغيره واولادها الشياطين
كنا مجتمعين ببيت واحد
امي واحنا ما نحب شغل الشغاله وفي حياتنا ماطلبنا منها شي
بس كنا نبتسم لها … واذا اخذت ملابسنا وكوتها لنا بدون ماندري كنا نبتسم لهاونشكرها وهي ترد لنا الابتسامه وتقول لا عادي
وامي مره اعطتها فلوس صدقه وكانت مره فرحانه وحضنت امي وشكرتها …
مع ان المبلغ مو شي كان مجرد خمسين ريال بس كان بنظر الشغاله شي كبير
خالتي صاحبة الشغاله وبناتها كانوا يخلوها تشتغل بالبيت
خالتي الصغيره ماكانت تحتك فيها ابداً بس اولادها الله يهديهم
كانوا ملاقيف ( تعرفون الاولاد ولقافتهم )
اخوي كان ملقوف صح بس كان يخاف
من امي علشان كذا ماكان ملقوف كثرهم
وخالتي ما تصارخ على اولادها
الشغاله ترتب من هنا وهم يخربون من جهه
سافرنا كلنا
وفي يوم من الايام كانت الشغاله بتسافر
فتشوها خالتي وبناتها ولقوا معاها ملابس لاولاد خالتي الصغيره لخالتي صاحبة الشغاله
وكم غرض بغت تسحرهم
الا امي واحنا واخوي ما اخذت منا شي مع ان اغراضنا كلنا احنا وامي وخالاتي
وعيالهم واغراض الشغاله بغرفه وحده
بس الحمد لله جات سليمه وماقدرت تسوي شي
———————–
خواتي غرضي من الموضوع
اننا اذا اشتغلت الشغاله نقابل شغلها بأبتسامه
ونعلم اولادنا احترام للشغاله وما يسبونها ولا يعطونها اوامر
لانها انسانه من لحم ودم ولها كرامتها وصعب
تاخذ اوامر وتسمع سبه من ولد بعمر اولادها
اذا الاولاد عفسوا ما نخلي الشغاله هي اللي ترتب لا … اللي عفس يرتب واللي ياكل يشيل اكله بنفسه
منها نعلم اولادنا الاعتماد على النفس وما نخلي غيرهم يقوم فيها
الاشياء البسيطه اللي احنا نقوم فيها احنا نسويها
يعني اذا طبختي شي خفيف
قليتي لك همبرجر …او جا في بالك تسوي كوب نسكافيه … شي خفيف
اغسلي مواعينك مو يعني صار عندك شغاله يعني خلاص لازم هي تقوم في كل شي وانتي لازم تحافظين على جمال ورونق يدينك
مافيها شي لو قمتي بنفسك وغسلتي كوبك ونضفتي التيفال
اذا اكلتي شي من بره مافيها شي لو قمتي بنفسك وشلتي اوساخك ورميتيها بنفسك … بدال ماتنادي الشغاله وتجي تشيلها
عندك بلوزه محتاجه كوي اكويها بنفسك
مو تنادي الشغاله وتترك اللي بيدينها علشان
تكوي بلوزنتك
قابلي شغلها بأبتسامه واشكريها على شغلها وانتي مبتسمه…
اهديها بين فتره وفتره هديه بسيطه وكأنها مكافئه لها لانها تقوم بواجبهاعلى اكمل وجهه …
اعطي اولادك هديه وقولي لهم يعطونها الشغاله
وكأنها منهم
او كلكم سوى انتي واولادك روحوا عندها واعطوها الهديه
وقولوا لها كم كلمة حلوه لانها تقوم بشغلها بأكمل وجهه
هذا راح يحببها فيكم ويعطيها حماس للشغل اكثر
ما اقول جيبي هديه غاليه
لا
ابو ريالين موجود
حتى لو كم لعبه هديه لاولادها
قبل ماتجي الشغاله نبهي اولادك انهم لازم يحترمون الشغاله
ومايقلون ادبهم معاها … واذا وسخوا شي هم يشيلوه ومايعطونها اوامر ابداً بس انتي اللي
تعطينها الاوامر
اذا حسيتي ان الشغل كثير عليها ساعديها
ما اقول اشتغلي عنها … لأ … اقول ساعديها
حتى لو على خفيف
صحيح انكم خسرتم عليها ودفعتم للمكتب وغير راتبها و ماجبتوها ترتاح
بس ارجع واقول
هذي انسانه من لحم ودم ولها مشاعر مش انسان الي
تركت ديرتها واهلها واولادها فلذة كبدها
علشان تشتغل وتصرف عليهم
اذا غلطت لاتصارخين عليها وتسبينها وكأنها عبده من عبيدك
حتى لو كسرت شي غالي
امسكي نفسك وكلميها بهدوه وحسسيها انك زعلانه
وقولي لها تنتبه المره الجايه
ان شاء الله ما اكون ازعجتكم …
بس لاني احبكم قلت لكم هالكلام
واخيراً ….شكراً لكل من ضحت بوقتها الثمين وقرأت موضوعي
منقول
ارحمو من في الارض يرحمكم من في السماء
الله يبعد عنا جميعا هالمصايب و البلاوي
يسلمووووووووووووو
يعطيج العافيه
عالموضوع الراقي والقضيه المتداوله
الله يكفينا شرهم
لج 5 ستارز
فعلا موضوع مهم لكل بيت فيه عاامل او عاامله