الرسم على الزجاج حياكم يا بنات دورة كامله

بسم الله الرحمن الرحيم
للبنات اللي اطلبوا الرسم على الزجاج. راح ابدي وياكم خطوه خطوه علشان تتعلمونه عدل. بس بشرط كل وحده تتعلم تراوينه شغلها و ابداعاتها.
اول شي نجهز المواد اللي نحتاجها
1- قطع من الزجاج بأحجام مختلفه, على حسب الرسمه اللي عندج

2- الوان الزجاج,تختلف الماركات, مثل
Waco
Hobbyline

Camel Glass colour
DECOR fin
Pebeo النوع هذا يعتبر احسن شي بصراحه, لكن سالفته سالفه. يعني ممكن تحصلين الوان زجاج منه مكتوب عليها
Vitrail و هذا النوع ما نحتاج نحطه بالفرن بعد ما نخلص تلوين. بس نحط فوقه طبقه ورنيش للحمايه.

و فيه مكتوب عليها Vitrea 160 هذا ابتعدي عنه, لأنه لازم ينحط بالفرن علشان تثبت الألوان. الا اذا وحده منكم يا بنات عندها فرن تتوكل على الله و تشتريه.

3- تحديد للألوان الزجاج Relief و نفس الشي له وايد انواع
Waco
Hobbyline
Pebeo
الأنواع كلها زينه. اول نوعين لهم بس ثلاثة الوان و اهم الفضي و الذهبي و الأسود. اما Pebeo relief الوانه ماشاءالله وايد

4- التنر و هذا نستخدمه علشان نخفف درجة الوان الزجاج. و تنظيف الفرش و مسح اي اخطاء من على الزجاج. تشترينه من اي محل يبيع اصباغ ارخص لكم من انكم تشترونه نفس ماركة الألوان. :1 (22): بس ها ديروا بالكم و اليهال لا يقربون منه ريحته خايسه اشويه. اما اذا تبون الغالي تحصون من Waco , النوع الثاني Pebeo

5- فرش التلوين. انصحكم انكم تشترون مقاسات مختلفه كبار و صغار. و نستخدمهم على حسب المنقطه اللي راح نلونها, يعني المناطق الكبير الأسهل نستخدم فرش كبيره و المناطق الصغيره الأفضل نستخدم فرشه صغيره علشان اللون ما يطلع بره عن التحديد.

6- القطن المستخدم لتنظيف الأذن. هذا انا استخدمه علشان انظف الرسم اذا بالغلط لون ساح على مكان ثاني. يكونون احسن من غيرهم لأنهم صغار

7- ماده تسمى MEDIUM و هذي من ماركة Pebeo علشان توزيع اللون على اللوحه يكون متساوي. و نستخدمها بس حق الوان الزجاج من نفس الماركة.
بيني و بينكم شريتها لكن ما استخدمتها وايد. يعني تلعموا طريقة التلوين الصح و ماراح تحتاجونه ان شاءالله.

8- رسمات الزجاج اللي راح ترسمونها ان شاءالله.

9- شريط لاصق لتثبيت الرسمه خلف الزجاج.
————————————————————–

أمانه اللي تنقل الموضوع لأي مندى تذكر انه مأخوذ عن طيبة الكويتية والله تعبت عليه. :1 (19): :1 (4): :1 (31):

هذي باجي الصور يا بنات, الموضوع ما ياخذ اكثر من 3 صور فتحملوني.

هذي صور مجموعه من الألوان من ماركة Pebeo

هذا النوع اللي ينحط بالفرن

و هذا اهو نفس النوع السابق

هذا ما ينحط بالفرن

هذي صور مختلفه

صورة تحديد لألوان الزجاج من ماركة Hobby line

تحديد لألوان الزجاج من ماركة Camel

بالصوره مبين لكم اقلام نستخدمها لتحديد الوان الزجاج بس بصراحه ما استخدمتها.

الحين راح اتكلم عن نقطه مهمه يا بنات عن الوان الزجاج
قبل ما نستخدم اي لون و نقرر نخففه بالتنر لازم نتأكد شنو مكتوب على العلبه.
يعني في الوان تلقون مكتوب عليها Solvent Based النوع هذا ممكن استخدان التنر( يسمى المذيب) لتخفيف الألوان و تكون مقاومة للماء الألوان هذي
و فيه نوع تلقون مكتوب عليه Water Based النوع هذا يخفف بالماء و ممكن انه مع الماء ينغسل و يروح.

لاحظو الصوره هذي مكتوب على اللون انه يعتمد على المذيب او التنر Solvent Based

و هذي صور ثانيه لمجموعه من الألوان تعتمد على الماء Water Based

و هذا نوع ثاني يعتمد على المذيب.

بكره على خير ان شاءالله اكمل وياكم الطريقه اشلون نجهز الزجاج للتلوين و كل شي. تصبحون على خير و اشوفكم بكره انشاءالله. اي سؤال انا حاضره. بروح انام قبل ما ينشون اعيالي من النوم و يلعبون فوق راسي سلام

يعطيج العافيه

متابعين معاج ننتظر بشوق البقيه

الله يولّيج العافية ^^
أتريا التكملة أكيد

ياااااااي أبله أبله ….

أنا أباااا اتعلم ..

عجبتني صورة الزجاج الملون …. يبتيلي فكرة اجرب نفس الطريقه …

مشكوووورة الغالية على هالمجهود والدرس الحلووووو ..

وأكييييييد متابعه وياج خطوة خطوة …

يللا عاد الحين الصبح وأكيد اليهال بالمدرسه …

يللا قوووومي بسج رقاااااد .. نزلي طريقة الرسم … ^_*

ننتظر بشوووووق …