شحالكم ياغاليات
اليوم قبل لا أحط الصور بخبركم عن معاناتي مع غرفتي
حتى إني كسرت خاطر نفسي ؟؟؟
إحنا ساكنين البيت صارلنا سنة وشهر بالضبط
طبعا بدينا أشياء في البيت قبل غرفتنا
بعد كم شهر قلنا لازم ندور لنا غرفة نوم
طبعا أختكم أثاث الخشب مايعيبها والاغلب عندهم نفس تشكيلة الاثاث
يعني مافي شي يديد
أنا وايد أحب شغل الاثاث الحديد من انا كنت صغيرة وخاصة اللون الذهبي
فقلت لازم ادور الاثاث اللي في خاطري
والحمدلله زوجي لاول مرة يوافقني بشي خطر على بالي
بدون اي تردد (( لأن وافق شوفوا شو صار ))
دورت ودورت وماحصلت اذا حصلت سرير مايكون الشي اللي في بالي
دخلت محل في الشارقة بعد التعب عيني شغل خشب ولونه ذهبي
مع انه كان طاولة طعام
قالولي بنفصل لج بس مش في الامارات في مصر
بس عطينا تصميمج
مجرد اني عطيته الفكرة وقلتله كم السعر قال 20 الف
قلت في خاطري ها السعر بيفصلونه في مصر بيوصل مابيوصل الله اعلم
طنشت الفكرة
قلت مافي الا اني أفصل الاثاث وادور عند حداد
طبعا صممت فكرتي عيبت زوجي وايد
كل ما اروح عند حداد يقول ما اعرف اسويه
في واحد قال أوكيه أنا بسوي الاثاث وهذي لانها فكرة يديدة
وبتسوون الاثاث كامل عندي بعطيكم 13 الف
زوجي مسكين من تعبه وحواطته في كل مكان قال زين
بس الحداد قال انا لازم اي عندكم وآخذ القياسات
أسمي انها شغلانة خذنا رقمه
ولما وصلنا العين بردنا ولا اتصلنا فيه
مرة كنا رايحيين البريمي حق شغلة
فصادف ان شفنا الحدادين اهناك
لفينا على كم حداد ومايعرفون يسوون
بس في واحد قال أنا أعرف اسوي الاثاث
ومبين ان من كلامه أن عنده خبرة
وقال إن يعرف المقاسات اوكيه ياسلام ياهي فرحة
اتفقنا على سعر 11 ألف
بس قال حق زوجي أنا أبي نص الفلوس أحين وهذ كان في بداية شهر فبراير
(( أنا لازم يريد فلوس أهين أشان يشتري سامان بسرأة ويخلس شغل ، أحين سامان واجد غالي )) هذا كلام الحداد
قال زوجي حقه اصبر شوي علي
انا حتى نص المبلغ ما عندي
(( لابابا هادا لازم بسرأة مافي مشكلة باجر فليل جيب ))
وراح المسكين زوجي يسأل هذا وذاك عشان يتسلف حق البنغالي ، لاحياة لم تنادي
الكل يبكي على ليلاه ماعنده
بعد جهد جهيد وحدة يزاها الله خير دورت له وعصلت ربع المبلغ
المهم رصينا على عمارنا رصة وراح عطاه نص الفلوس وقال ان في شهر بيخلصه وقبل لايخلص الشهر لازم الفلوس تكون عنده كاملة
خلص الشهر
واتصل فيه زوجي قال الحداد (( والله هادا نفر اسبوع يجي تعبان شغل مافي خلاص اسبوع واحد سوي انتزار ))
وخلص الاسبوع ومنها لين قبل 10 ايام ونسمع نفس الكلام باجر يومين
اسميه ذلنا مذلة
كان يسكر التيلفون في ويهنا كل ماكلمناه ومانلحق نخلص كلامنا
واذا شاف الرقم أو مايرد أصلا
وزوجي يقول بروح بشيل عنه الفلوس ونشتري اي شي جاهز وانا قول صبرنا ها الكثر خنا بعد نصبر
لافاد الصبر ولا التحمل
لين أنا خلاص تعبت وطفح الكيل عندي
ملابس في الكرتون وانام على الارض وها البنغالي قاص علينا يلعب بأعصابنا
يتلي حالة غير طبيعية
قلت حق زوجي خذ عنه الفلوس
وهيا بنا إلى الاثاث الجاهز أول ما وصلنا الشارجة في خضم زحمتها
أول محل صادفناه وحصلنا موقف عنده
دخلناه طبعا أكثر الاثاث محجوز وهذا الحمدلله بعده محد فكر فيه حجزناه
قالت الحرمة عندنا زحمة وبعد عشرة ايام بيوصل لكم
بعد عشرة أيام اتصلنا وين الاثاث والله السيارت كلها خربانة
زوجي فقد الامل في أي أثاث بيدخل البيت وقال تتحلمين بأثاث
إحنا مكتوب لنا نعيش بهذي الطريقة لا كبت ولا سرير
والحمد لله أمس وصل الاثاث
صح مو هذا اللي في بالي
بس الحمدلله
لو تصورون منظر زوجي بعد ماأثثنا الغرفة )
قال (( أخيرا بعد هذا التعب قومي إنصلي ركعتين شكر لله
لاني كنت فاقد الامل بالأثاث أصلا والحمدلله وصل
قال أنا مابقوم عن السرير بعوض عن الايام اللي راحت
فرحته خلتني أنسى اللي سواه فينا الحداد الله يسامحه
حتى إنه هو مايهتم سوالف الكماليات وهالشغلات
بس استغربت لمن قال يبالنا نكشخ الحجرة ونبدل الليتات ونشتري ثريات
قبل كنت أقول اي شي يقولي أول إنت أثثي غرفتج بعدين تكلمي عن هالخرابيط ))؟؟؟
((مرات أبي أدعي أن الاثاث يطيح في جبده ومحد يشتريه ))
تخيلو مفصل الاثاث ب6 آلاف وبيبيع لنا 11 الف أونه يبي فايدة
وبعد مو في محله في الشارجة
لاراضي يعطينا رقم الريال ولا عنوان المحل
بس مصور صورة صغيرة حق زوجي
ان يشوف الاثاث
وبراءة الاختراع مالتي لهفها (( طبعا الكل يمكن يسأل شو يعني بيكون أثاثج إن الشغل ماراح يدخل فيه أي قطعة خشب
كله بيكون حديد وزجاج أو البلاستيك القوي
الله يسامحه بس
أدري إني لوعة جبودكم بس كنت أبي أفضفض شوي وأطلع اللي بخاطري … كن كيف أرسم لغرفتي وأخطط
سويت الستارة أول ماسكنا ولبست الغنفة وخيطت خداديات
الكماليلت بخلصها والاثاث موراضي يخلص
والحمدلله قدر الله ماشاء فعل
آسفة
===
طبعا أنا رسمت على جدار الطوفة وسألتكم أكمل طبعا كل الردود وصلتني إني أكمل الرسمة
وهذي الرسمة قبل ما أخلصها
وخلصتها
واللي عند الباب خلتيها فروع من غير أوراق
شغل ايدي بالكامل
والغنفة كان لونها أبيض باهت
لبستها بنفس ألوان الستارة
وخيطت خدايات درجات البرتقالي والبيج
******
هذا السرير
الريال ماحاط السرير بالوسط بالضبط حتى انه مخرب على الحركة اللي انا مسوتنها وماقادرة حتى إني أحرك السرير
فقلت إن شاء الله في الخطة المستقبلية بسوي ستارة حق السرير
شو رايكم ؟
في الوقت اللي كانوا يركبون الاثاث كنت أخيط اللحاف والمخدات مالوت السرير بعد بلون برتقالي
إكسسوارات في الغرفة
شو راياكم اشتري أبجورات حق الكميدينو
مثل ماتقولون غرفة تبديل
هذي طاولة إضافية مع الاثاث أنا حطيتها إهني
شورايكم ادخلها الغرفة ولا إهني تمام ؟؟
وصلنا حق الحمام
لونه وردي صلحنا بعض الاشياء البسيطة اللي فيه
اونه مسوين له صيانة يقولون كان في البيت مستأجرين مامخلين شي صاحي فيه
أدري بتقولون متروس أشياء
فيني طبع أحب زحمة الاشياء أحس إن هذا المكان في حياة
مو مكان ميت ؟؟!! مجرد رأي
****
أتمنى إن الغرفة تعيبكم
وتحملتوا قصتي الطويلة
وأي ملاحظات خبروني فيها
ودمتم سالمين
مشكورة تسلمين على الرد