السلام عليكم ورحمة الله وبركـاته..
احبتـــي… وضع بريد المشكلات من اجلكم…
منكـم ولـكم…
والهدف الحقيقي من فتحه هو مد يد العون لبعضنا البعض
والمساهمه في الاقتراحات الفعاله والاراء البناءة…
ولكي نحقق معـاً اروع النتائج.. لابد من الوقوف على اهم النقاط
اولها : نحاول ان يكون الرد ايجابي يبني لا يهدم
ثانيها : تتفاوت درجات المشكلات ولكن يجب ان نعلم ان لم تكن المشكله مهمة لدى البعض
فهي مهمة لصاحبتهـا…
لن اطيل عليكم…
ونبدأ
تقول صاحبة الرساله
السلام عليكم و رحمه الله و بركاته ,,
شحالكن ؟ عساكن بخير و بنعمه 
امممم بدش في مشكلتي على طول ,,
انا بنت عمري 17 بدش الـ 18 .. مايلس وايد مع هلي ,,
ماحب الجو المتوتر المشحون بالمشاكل ,, انا في حالي .. منعزله ف حجرتي ..
ترا المشكله ان بين خواتي و اخواني جي رمسات .. وانا ماحب ادخل في حزب حد ولا ف قروب حد ..
يعني اشوفهم يسولفون مع بعض وعقبها يوم كلهم يسيرون يتجمعون ف احزابهم وكل وحده تحش في الثانيه 
فأتم ف حجرتي ,, مع النت ،، وادمنت عليه بس الحمدلله ماصار اني ارمس شباب ولا ادخل جاتات وجي ..
<< ولا بعد يتحكمون في سالفه النت ,, والله مب انهم خايفين على مصلحتي لالالا .. والله بس جي يبون يتحكمون ,,
انا ابا ايـلس مع هلي وخواتي .. بس اكرررره النفاق و نقل الرمسه .. اححححححححس بغصه و تعب و اتضاايج من الي صاير ..
احبهم هيه بس ماحب الي يسوونه ..
ابا ايـلس وياهم والله ,, بس ماتحمل فكره انهم يالسين يسولفون ويضحكون ,, وعقب من وراهم كل حد يحش ف الثاني .. والله اني اكره لمتهم لاني اعرف شو نهايتها..
وانا عصبيه .. فما اعاملهم زين من الغصه الي فيني .,, لاني اكون حاطه ف قلبي عليهم .. فأكون طول الوقت متنرفزة و معصبه .. وما احب اتكلم ولا اضحك الا مع اربيعاتي
عندي اربيعات اناا مب اني انطواائييييه لااااا .. بس حتى لو اربيعاتي بينهم هالحركات بودرهن ماعندي مشكله ,,
بس هاييل هليه ماقدر اودرهم ..
اعرف ان في كل انسان عيوب ,, بس والللللللللله ماتحمل تنقيل الرمسات و الحشششششش ..
انا ابا ايلس وياهم .. بس وفي نفس الوقت احس بنفور منهم بسبب هلأشياء ,,
و فكره هن ماقصـّرن فيني ,, مره وحده فيهن قالت " في ويهي " عني راعيه شباب ..
ومره قالت عني بويه وراعيه بنات !
يعنييييييييييييييييييييي بالعققققققل شو هالتنااقض و الغباااء !!!!!!!
وانا ماشااءالله عندي 8 خوات .. ابا وحده منهن تكون قريبه مني
والله احس محد فاهمني ابدن ,,
اسفه لو طولت علييكن ,,
والله يوفقها ويهدي سرها
وان يلسوا مره ثانيه يحشون سيري عنهم وايلسي شوي ع النت .. اقري شوي قران .. ورديلهم عقب مره ثانيه
حاولي ((( تقنعييييينهم ))) وباسلوب حلو وراقي ان الحش والغيبه والنمييييييميه مب زييين وحراااااااااام
والله يوفقج ويسرلج امورج
بس أسولف وياهم وقت ما أبغي أنا ومب من حقي أحاسبهم
أو أقول لهم أنتو فيكم فيكم
وباجي أوقاتي أستغله في النت وحفظ القرآن والأشعار
والصبح أبتسم وأسلم على الجميع أسولف ساعه
وعقبها أستغل وقتي صح، أكتب أقرأ أحفظ القرآن الأمثال الأشعار
شي يفيدني لآخرتي..ما أحب أشل في قلبي على أهلي
وبالرغم من الحزبية والخش والدس
خليج كووول..ولا تعصبين .. صدقيني إذا مشيتي بما يرضى الله
وحافظتي على صلواتج الخمس ودعيت لنفسج ولأهلج بكل خير
أما انج تحاسبنهم أو تشلين في خاطرج ترى بتتعبين
والأهل مب نحن نختارهم رب العالمين هو الذي يختار ويثبت وعنده أم الكتاب
حاولي تمارسين الرياضه وتقرين كتب فيه ضحك وفرفشة
خطوة الأولى سولفي مع أهلج بشي يعيبج ويعيبهم
وبتكسبين نفسج وبتحافظين على المودة
والصبر مفتاح الفرج..وابعدي نظرتج عنهم وخلي ولا كأن فيهم غلط
بس الدعاء ينفع
سلامي لج
باجر تكبرين وبتحنين لهذي اللحظات
ربي يوفقج وخاولي تفهمينهم
دمتي بود
بس مب معنــــاتهــ انه هلي شرات اهلج ….
انا اكبر عنج …بس يتنــي فتره بسبب الدراسه وايد كنت انخش عشان اخلص شغلي ..ويوم كنت ايلس ويا الاهل بين فتره وفتره اكتشف اشياء هم يسونها انا ما احبها مثلا يرمسون عن فلانه وعلانه ….وشخصيا ما احب انا هل الطبع ويمكن انتي الي يصير بين خواتج واخوانج واااايد حش ورمسه وكلام ….بس الي صاير مع هلي اني عودتهم اني في حجرتي و تميت واايد متضايقه فتره انهم ما يسألون عني ولا حتى يتقبلون كلامي تفكيري صار غير عن تفكيرهم …بس بعدين خفيت النت وخلصت الدراسه وقعدت مع الاهل عادي تلقيني منسدحه ما اسوي شي وهم عادي ما يسولفوون بس تعالي وقت المشوره او بيرمسون عن قضيه او مشكله في البيت …اعطي راي ولا افرضه …والحمدلله مرات يسمعون كلامي …وياخذون شوري …صح ما نضحك واايد ونسولف …بس بعد نكون مع بعض ….
وعزيزتي اذا شي ما عجبج فيهم قولي لهم في الويهه …والله انتي تقدرين تغيرين هل الطبع فيهم …اذا شفتيهم يرمسون من ورى بعض …قولي لهم ليش ترمسون من ورى فلانه …كلموها جدامها …مافيها السالفه زعل …
والسموحه كان ودي اكتب رد طويلهــ ^ _ ^ عيبتها السالفهــ …
بروح الوالدة تباني اسير وياها الحديقهــ …