ارجوكم ساعدوني وشورن عليه

كيفكم أخواتي عساكن طيبات
شاركت في هذا الصرح الرائع لسبب معين
راح أذكر كل قصتي لكن وأبي المشووره منكن
انا بنت من دوله عمانيه شاءت الاقدار اني أتزوج ولد خالتي
الي يسكن أحدى الدول الخليجيه وتزوجنا بعد صراع دام 6 سنوات

الا وهو رفض أمي لأني بنتها الوحيده. لكن في الأخير وافقت وتزوجنا ولله الحمد

مشكلتي ليست مع زوجي بالعكس بدت مشكلتي مع أهله
منذ أن تزوجت وأنا ماقصرت وياهم بأي شي كنت بنتهم
وأختهم وأمهم ماكنت اعرف أقول لا كنت في غايه الطيبه وياهم
ولو يطلبون عيوني والله أعطيتهم أياها
مر على زواجي شهران والكل يسألني ماحملتي؟ مافي شي بالطريق؟

اقولهم لساتني صغيره اذ وقتها تزوجت وعمري 19 سنه وصار لي الحين متزوجه سنتين ولله الحمد

ابو زوجي دايم يلح علي ابي اشوف أحفادي اقوله هالشي بيد الله موبيدي انا
من شهرين زواجي بديت اعالج للحمل ولله الحمد مافيني شي واراده
الله فوق كل شي
بدت التساؤلات تزيد وانا اقول الله كريم لين ماكملت سنه و6أشهر
بدوو أهل زوجي يتغيرون علي ووايد

أبو زوجي يقول اانا بزوج عيالي عشان اشوف أحفادي زوجت واحد ولا جاب لنا شي

أمه تقول المره لو صار عمرها 40 ماعاد تحمل طبعا كل هالكلام موجه لي انا وانا من النوع الحساس مره مااتحمل التجريح واروح لغرفتي واصيح ماارد عليهم لاني معتبرتهم اهلي بغربتي ومالي غيرهم ابد بعد الله بهالغربه المتعبه

وبكل الجلسات خالتي ام زوجي تقول بنت فلان ماكملت شهر وحامل وبنت فلان ولدت بنت فلان تتعالج هناك وانا اقول الله كريم
والله يوفقهن لكن بداخلي تعب والم ادري بها تقصدني اني ماجيب عيال
الى ما ودتني عند وحده تمسح للبطن والممرخه تقولي انت وش فيج

شوالي مانع الحمل قلت لها انا مافيني شي ولا زوجي لكن كل شي بيد الله لكن اهل زوجي مادري ليه مو ناويين يفهمون هالشي
قالت طيب أمسحت لي 3ايام عقب قالت لي يابنتي انتي مافيج
شي انتي ليه جايتني؟ قلت لها جيت ع رغبه ام زوجي وعشان أثبت
لها اني مافيني شي لكن الله ماأراد اني أحمل والله كريم

وكلمتها وقالت لها هالشي لكنها اصرت اني مااجيب عيال
أخبرت زوجي بكل ماصار وشجعني اني أنسى وماأخذ بخاطري
وأننا لساتنا صغار والعمر قدامنا والله ماينسى عباده

مرت فتره وصار يجيني كلام انها تتكلم اني مااجيب عيال وانا
أسكت مااتكلم اقول الحمد لله على كل شي

لاني أعتبرتها أمي لأنها أخت أمي وتعتبر خالتي واناا من لحمها
ودمها المفروض ماتسوي فيني كذا

صادف ان جونا أخواتها من عمان الي هم خالاتي بعد
وكنا جالسين في جمعه نسولف ونضحك الا واسمعهم يغلطون علي

والقهر قدامي مو ورا ظهري عمي يقولي انتي ليه جالسه ويا زوجك
ليه ماتروحي لأهلك اقوله لييييش؟ يقولي دامك ماتجيبي عيال
ليه عايشه مع زوجك قلت له انا أحبه وهو يحبني والعيال ماهم كل شي وان الله اراد راح أحمل ان شالله
يوم قلت له كذا زعل مني بالله عليكم كلامي يزعل؟؟

وبدت خالتي تلمح انها تخطب لواحد من عيالها وتقول ان شالله
تجيب لنا الحفيد يارب وانا ماسكه دمعتي وساكته. بعدها بدقايق
واحد من أولادهم بدأ يعلي صوته علي بأني أتدخل في شئوونهم الخاصه وانا والله ماتدخلت فيهم ابد ابد
انا انسانه لحالي مايخصني بحد عاملتهم بكل طيبه وحطيتهم بعيوني
يوم على صوته ماقدرت اسكت بديت اكون عصبيه فعليت صوتي عليه وقلت له انت قليل ادب وماألومك لو عليت صوتك علي لانك
مالقيت تربيه صحيحه وكلام وايد من حرقتي رحت غرفتي وجلست
اصيح من قهري ماني مستوعبه الي يصير لي وأخبرت زوجي
وكلمهم وعصب عليهم وهددهم انهم مالهم دخل فيني
اليوم الثاني قلت يابنت عديها وروحي عندهم رحت عندهم وجلست

الا شوي يقول عمي ان في شخص ينقل اخبار البيت للناس انا بدت دقات قلبي تتسارع حسيت يقصدني انا بكلامه سكتت وبدا كل شخص يقول هيه كل اخبارنا منتشره والي ينقلها معرووف
وقتها حسيت الاتهام علي انا لان الكل تبرأ والنظرات صارت صوبي وانا والله العظيم ماقد رفعت سماعه التلفون وقلت لحد
صار لنا كذا ولى كذا وانا عارفه الي ينقل الخبر اساسا وجالس بيننا وساكت وقتها أرتفع ضغطي وقلت لهم انتو كل شي تقولون اني انا اسويه مع اني مااسوي هالشي والي ينقل الاخبار عارف عمره مايحتاج أذكره ولكن الله فوقكم والله ينتقم لي منكم يارب هذا وانتو اهلي هيك تسون فيني لو غريبه عنكم وش كان عملتو!!
والله يابنات ماقدرت اتحمل وقلت ماحخبر زوجي عشان مااسوي مشاكل لكن عقبه يوم خبرته وعصب وقالي ليه ماقلتي لي وقتها
قلت له مااريد اسوي مشاكل بين أهلك واكون اني سببها
وقلت ابعد عن الشر وغني له دام هذول مايبوني ليه اروح اجلس وياهم وقررت اتم بغرفتي وماأطلع دام اكلي وكل شي عندي ماني محتاجتهم كرهتهم كلهم ولا طقتهم وندمت ع كل شي عملته لأجلهم
وظليت بغرفتي ولا حد سأل عني ولا تطمن عني زوجي يقولي كبري عقلك وكوني افضل منهم وطلعي عادي وانا اصريت اني مااطلع ابد لكن عشان خاطره طلعت لكن للأسف ولا كني موجوده لاحد يرمسني ولا يطالع فيني قلت الحمد لله على كل حال هذا وانا مظلومه وهيك سويتوو لو ظالمه وش كان صار!

لكن طبعي ماحب احد يكون زعلان مني او متضايق
وانا شايله بقلبي منهم والله الحين مااسوي لهم أي شي
لان كارهتهم واقول لعمري ماني ملزومه بأحد الزم ماعلي زوجي فقط يمكن تقولون ليه ماتستأجرون او تطلعون للأسف الايجارات هنا واجد غاليه مانقدر نأجر بيت لكن الحمد لله صابره

ارجوكم شورو علي وش اسوي وبكلامي هذا تشوفوني غلطت بشي؟
يعني معقوله الطيبه بهالزمن صارت تتقابل بكره وعدم احترام؟

ندمانه على هالطيبه والله لو كنت شديده كان احترموني من البدايه
لكن وش اسوي انا الحين كله بغرفتي مااطلع الا اذا قالي زوجي وعشان ماازعله اروح لهم شوي وارجع لاني ماصرت ارتاح بجلستي وياهم
شوروو علي يجزاكم ربي خير وأأسفه على الاطاله لان مالي غيركم
ماقدر اقول لأمي عشان ماتفكر فيني وخاصه اني بعيد منها

الله يعينج ويصبرج ويأجرج على اللي سويتيه معهم ويهديهم

الحل الذي ممكن يريحج هو الاستقلال في بيت

منفصل عنهم حتى تبتعدين عن المشاكل والبعيد دائما

عزيز