السلام عليكم ورحمة الله وبركاته ،،
بصراحة من فترة وانا افكر انزّل موضوعي بس كل ما ادخل القسم واقرا مشاكل غيري تهون عليّة مشكلتي.. الا اني امس قررت اعرضها عليكن ..
ومن كثر ما انا متضايجة ومكتئبة وكارهة نفسي مب عارفة حتى كيف أبدأ واكتب الموضوع!!!!!
خواتي وحبيباتي …
أول مرة ف حياتي اكتب موضوع في منتدى …. وأنا اللي طول عمري اتحرا نفسي قويّة (والقوي الله) بس هالمرة بالذات مب قادرة اتحمل اكثر !!!!
مشكلتي يمكن تكون بسيطة عندكن بس بالنسبة لي "لأ" لاني بالفعل تعباااااانة حيل منها… وديّ افضفض واطلعّ اللي ف قلبي ،، لاني حاسة اني بنفجر من الغصّة والقهر!
باختصار،،
أنا موظفة، صار لي اكثر من 5 سنين اشتغل في القطاع الخاص (البنوك)، أول ما تخرجت من الجامعة اشتغلت كمسؤولة في بنك محلي بالرغم من ان تخصصي ما يخصه بالمصارف "اعلام وعلاقات عامة" بس رضيت بالامر الواقع وانتوا ادرى بالحال اول بادي كانت الامور طيبة ولكن مثل ما يقولون تجري الرياح بما لاتشتهي السفن ،،، مدير الادارة كان "وافد" من جنسية عربية، طيب وحبوب وفجأة تحوّل بقدرة قادر الى "مواطن" وعقب ما بدّل القميص والبنطلون بكندورة وحط الغترة والعقال ع الراس بدأت المشاكل تهلّ علينا…. كنت انا وربيعتي المواطنات الوحيدات في القسم عنده وهو ماعنده شغلة غير يعطينا اوامر مالها اول ولا تالي واللي يبطّ الجبد سرنا اشتكينا كذا مرة بس محد سمعنا،، الى ان طفح الكيل بس بعد شو يا حسرة بعد ما مرضت واعصابي تلفت …. فقررت اشتري راحتي واقدم استقالتي واتنازل عن كل حقوقي المادية!
بتقولون وين المشكلة؟؟ بخبركنّ ….
بعد اجازة طويلة نسبياً في البيت، قررت اني ابحث وادورعلى وظيفة، وسبحان الله لقيت وبسرعة ماكنت متوقعتنها بس في بنك اجنبي ومنصب وراتب اعلى ،،، المشكلة بدأت من اول ما دخلت المقابلة….
في البداية قابلت المدير البريطاني اللي شرحت له مؤهلاتي العلمية وخبراتي العملية على اساس الوظيفة اللي بشتغل فيها تختلف تماماً عن اللي كنت اسويه في البنك المحلي !!!! ووافق البريطاني ووعدني انه يقدم لي اي مساعدة احتاجها :: بعدها قابلت مديرة القسم اللي بشتغل فيه- "عربية الجنسية"…. أول ما يلست ع الكرسي رحّبت فينيّ وتناقشنا في بعض الامور خاصة اني ماعندي خبرة بتاتاّ في هالمجال، الا انها شجعتني ووعدتني انها تدربني وتساعدني خاصة اني اول مواطنة ترضى تشتغل في هالقسم، بعدها وافقت اني اوقع العقد (هذا الكلام تقريباً من سنتين) وقبل ما اطلع من المكتب سألتني عن عباتي وين مفصلتنها فاستغربت، ويوم خبرتها قالت لي انها نفسها تلبس العباية لانها حصلت ع الجواز الاماراتي من فترة واستوت "مواطنة"! ما ادري كانت تقصد تقول لي انها مواطنة بعفوية والا بطريق غير مباشرة عشان اسويلها قدر!
أنا انصدمت صدمة عمري،،،، الله يستر عليها بس الصراحة الكتاب مبيّن من عنوانه – فرق السما والارض بيني وبينها!
المهم بديت الدوام عقب المقابلة بشهر تقريباً،، في البداية كنت مثل الاطرش في الزفّة، واللي زاد الطين بلةّ اني يلست لمدة شهرين بدون مكتب أو كمبيوتر أو أي نظام عشان امارس وظيفتي.
وفي يوم طلبت مني المديرة اني ادور لها على معلومات في الانترنت عن شخص (من الاسرة الحاكمة) بتسير تقابله،،، وبالفعل سويت اللي طلبته منيّ وعطيتها المعلومات المتوفرة بالرغم انه مش من اختصاصي وهذا شغل السكرتيرة ألا ان حضرتها ما كفتّها المعلومات وطلبت مني اني اتصل الديوان عشان اوفرلها معلومات زيادة وكان وقتها الساعة 2 الظهر (والله عمري ما بنسى هاليوم النحس)،، دخلت عليها وخبرتها ان الديوان محتاجين رسالة رسمية من البنك عشان يوفرون المعلومات؟! وقالت اوكي مب مشكلة!
ثاني يوم، نادتني مكتبها وقالت لي بالحرف الواحد (انا عطيتج شغلة امس وانتي ما خلصتيها،، واذا مب عايبنج الشغل فالباب مفتوح) وحفاظاً على كرامتي قدمت استقالتي وتركت الشغل ألا أن المدير البريطاني رفض الاستقالة وكان يتصل فيّ كل يوم ويحاول معاية حوالي اسبوعين يرجعني الدوام … وطلب اجتمع وياه مع المديرة وتناقشنا في الموضوع ووعدني جدامها ان هالشي ما راح يتكرر مرة ثانية وانه بنفسه بيشرف على تدريبي!!!! (طبعاً ما شفت شي).
وتكررت الحركة مرة ثانية وزادت تهديداتها بالطرد والفصل عقب ما طلبت مني اني اطلع ويا واحد هندي بالسيارة، نسير نزور موقع صناعي (طبعا رفضت) لان هالشي مش مذكور لا في عقد العمل ولا البنك !!!! والادهى والأمر انها اتصلت في ّ مرة وانا كنت في اجازة ويا الأهل في ابوظبي وبكل وقاحة ….
قالت: ما تعرفين انه اليوم دوام
قلتلها: هيه اعرف وانا بلغت السكرتيرة اني ماراح اداوم لاني مرتبطة بالاهل وما عندي حد يوصلني!
ردت قالت: انتي تسوقين، شلي سيارتج وتعالي يمديج توصلين في ساعة !!!
يوم رديت عليها بان عاداتنا وتقاليدنا ما تسمح للبنت انها تسوق مسافات طويلة بروحها وانه اهلي ما يرضون ،، نطلها عرج وعصّبت … ومن هذاك اليوم وهي حاطتني براسهاّ.
وفي آخر 2024 كان عدنا اجتماعات مناقشة التقييم السنوي وبدون مقدمات قرروا (المدير البريطاني ومديرتي) ان ادائي في 2024 كاان ضعيف وايد واني مول ما اشتغلت (ما ادري شو كنت اسوي) وبناء على هذا حرموني من (البونس والزيادة السنوية) ….
بذمتكم ،، الموظف يوم يشتغل عنده فترة تدريب ويكون تحت التجربة مدة 3 شهور،، يعني انا اذا ماكنت عند المستوى المطلوب ليش "تثبّت" وليش عقب سنة و8 شهور يقولون ادائي ضعيف وانا طول هالفترة ماوصلني أي إنذار شفهي أو خطي أو لفت نظر سواء من قبل مديري المباشر والا البريطاني!
ويوم اعترضت ع الموضوع هددتني بالفصل وطرشت رسالة للموارد البشرية تخبرهم فيها اني كنت (قليلة ادب وياها ورفعت صوتي عليها … لا واللي باط جبدي قايلة ان الوالدة (أمي) الله يحفظها متصلة فيها وسابتنها ) لا وتباها تعتذر بعد !!!!
الحمدلله انا اعرف نفسي … بنت ناس ومن عايلة محترمة ومؤدبة وخلوقة بشهادة الجميع وماعليّ قاصر!
المهم… بعد مناقشات طويلة وعقيمة ما بين الادارة (من مدير ادارتي الى مدير الموارد البشرية الى الرئيس التنفيذي للبنك) وشفت ماشي فايده منهم ويتحدونيّ اني ما اقدر اسوي شي،، (ف خاطري اقول اذا المديرة زلمة متجنسة ، ومدير الHR خليجي ، والرئيس التنفيذي لبناني …………. منو بينصفي انا المواطنة؟؟ )
قررت اني اشتكي عليهم وزارة العمل، بالفعل رحت وقدمت الشكوى .. ويوم احضروا استعبطوا ع الباحث القانوني وقالوا نحن مانعرف بالضبط شو الشكوى؟ فعصّبت وقررت احول الشكوى للقضاء!!!! ترى البلاد مب بلادنا والمواطن ماله اي قدر واي احترام !
ومن يوم ما تحولت الشكوى لدعوى قضائية، فيها محكمة وتحقيقات …. بدات الاخت تمارس الضغوط النفسية بطريقة فظيعة.. يوم تطلبني في اجتماع تبا تجبرني اوقع على ورقة تثبت اني راضية بالتقييم اللي عطوني اياه … وكذا مرة ترفض اجازاتي اللي اقدمها … وما خلّت حد ما خبرته اني "قليلة ادب" لدرجة انه اللي ويايه في المكتب مايرمسوني خير شر حتى مايوصلون لمكتبي!
طبعاً من بدأ هالموضوع من 5 شهور تقريباً وانا مالي نفس اسوي شي… وكنت ادوام عاااادي بس تعبت، لين متى بداوم وانا والكرسي واحد محد يرمسني ولا حتى يصدوّن جدايه!! وكل يوم احس شي في جسمي يعورني ما خليت مستشفى ولا دكتور مازرته في هالفترة ومن 3 اسابيع وانا في اجازة مرضية!
مب قادرة (استقيل) وافتك من الصدعة لان القضية بعدها في المحكمة .. ولا المديرة راضية تعطيني اجازتي السنوية!! مب عارفة شو اسوي؟ أخاف اخسر القضية ومايكون لي ويه اجابلهم مرة ثانية !!! وخايفة ارجع الدوام واحاول اكون طبيعية بس امور كثيرة راح تتغير اكيد!
شوروا عليّة … محتاجة نصايحكن …!
(للأمانة .. انا كنت ناوية بعد ما احصّل البونس استقيل واودّر الشغل نهائياً في البنوك الربويّة … وسرت العمرة ونويت هناك ان الله يسرّ لي اموري ويبعدني عن الربّا والمال الحرام) بس بعد هالمشكلة والقضية مب قادرة اتخذ اي قرار ؟
ما اقول غير: حسبي الله ونعم الوكيل فيهم … والله ع الظالم كبير …
أدري طوّلت عليكن : بس ما عندي حد افضفض له !
ما ابا غير دعواتكن بان الله يسّر لي أموري ويحقق اللي ف بالي ويعوّضني خير!
الله يعينج آختي ويفرج همج وكل شي له حل
بإذن الله والله مآينسى عبآده 
~
الله يوفقج ويسهل دربج ~
المشكله انتي اللحين لو ما رفعتي قضية عليهم جاان من زماان مستقيله شو لج بعوار الراس والصدعه …
اكثري من الاستغفار والدعاء هذا احسن حل …
ان شالله تتيسر امورج وتنحل
ماقول غير حسبي الله ونعم الوكيل الاجانب بيتحكمون فينا باي شكل والوافدين صاروا مثلهم (ما اعني الكل)
دمتي بحفظ الله
حسبي الله وحده ونعم الوكيل
الصراااحه زعلت عليج واايد صدق انه ظلم عسى ربي ينصرج عليهم وتفتكين منهم وان شاء الله يفك ضيجتج ويبعد عنج كل شر…
بس انصدمت اخر شي ان البنوك ربويه
اختى الله يهديج كيف تدورين الراحه في مكان مثل هذا
صدقينى ماراح ترتاحين لما تطلعين منها اشترى اخرتج اهم من الدنيا
ونصيحه منى تنازلى عن القضيه وقدمى استقلاتج واشترى راحتج وربج
ومن ترك شي لوجه الله بدله الله بخير منه الى عند الله احسن وابقى
معا تمنياتى لج بالسعاده والصحه الدائمه
انتي ليش متضايقة انه ما حد يرمسج!!
شو تبين فيهم!!
انتي روحي لمكان شغلج وخلج بحالج واسكتي وخل يولون لا تعورين راسج حبيبتي
وتحسبي ليل نهار
ادعي الله ياخذ حقج
وعلى فكرة الوافدات مس الكل البعض
يكرهون مواطنة تشتغل معاهم يكرهوووووووووون
عندي ربيعتي من دبي ذايقة الويل منهم
وتقول انا ما قلت شئ ويقولون عني قليلة ادب ولساني طويل
عيل خل اراويهم شغل الله
وتبا تفنش باي طريقة
الله يعينكم يا رب
احتسبي الاجر وباذن الله بتاخذين حقج بالاكيد