وبدون مقدمات محتاجه رايكم؟؟ ومساعدتكم ؟؟
نحن نعاني من جيرانا من فترة طويلة وصابرين طول هالوقت … لاكنهم في الفترة الاخيرة وايد زودوها … شوفو حركاتهم واحكموا:
من فضولهم الزايد ما يصدقون نكون يابين خدامه يديدة يزخونها عند ويه الباب ويسألونها كم معاشج؟؟ ومن وين انتي؟؟ اتعرفين تطبخين والا ؟؟ وماماه زينه وياج والا ؟؟ … واتعرفون هالسوالف … ومرة من المرات كانت عند اهل ريلي خدامه وايد زينه وفجأة تمت اتصيح" انا امية مريضة ما ادري اشوة لازم اسافر ابسرعه" … وهم على نياتهم سفروها على طوول … وعقب كمن شهر ام ريلي شافتها طالعه من بيت جيرانا وسألتها انتي اشوة يايبنج ؟؟ جان اتقول الها ان ماماه قالت الها تعالي اشتغلي عندنا وبنعطيج معاش اكثر … اتخيلوا بس …
وخلال كمن شهر الي طافو متعلمين يعقون زبالتهم عند بيتنا … وعيزنا من كثر ما انكلمهم … والله ما تتخيلون اشوة يعقون … الا اثاث مكسر وكراتين كبيرة وحتى اكياس الزبالة عزكم الله يفرونها جدام بيتنا وياريت داخل الزبالة يفرونها برع … والله من فترة امية كانت مارة تاخذ عني شي وشافت هالزبالة طايحة عند الباب جان اتقول : هالزبالة كلها من بيتكم؟؟ من وين يايبين ها كله؟؟ … هاذي امي وقالت جيه ما بالج بالغرب الي يطوفون جدام بيتنها وما يعرفونا … وياريت ما عندهم زبالة والا زبالتهم بعيدة … والله ان زبالتهم عند باب بيتهم وهم لازم يعبرون السكة علشان يوصلون لزبالتنها … ومن يومين طلع النا صاحب البيت الي عدالهم( من اهلهم) يفر قطع بليوت كبيرة (خشب) وكلها مسامير … وشافه اخو ريلي وكلمه وقال له" ليش اتعق ها جدام بيتنا نحن عندنا اصغارية يلعبون جدام البيت ونحن نخاف عليهم؟؟؟" … تدرون اشوة قال:" ليش فلان دايما يعق في درامكم وما اتقولون له شي ؟؟ اشمعنا انا؟؟" … وامس فارين مريحانه مكسورة …
ومرة عندهم عرس بنتهم ما ادري ولدهم … واتخيلو الباب بالباب ولا عزمونا … وقلنا ما عليه … كانو امسوين عزيمه في البيت … ويو استأذنو من عمي علشان يسوون جلسه جدام بيتنا … وعمي سمح الهم وقال لهم اذا بغيتو شي بعد نحن حاضرين …ولا قالو حق عمي اتفضل … لو من باب المجامله … وتمينا هاك اليوم محد قادر يطلع من البيت لانهم متجمعين جدام باب القراج لين نص الليل دق ودواخه قدو وخرابيط ….
والحين متعلمين طبع حلو بعد … يبركنون سياراتهم جدام بيتنا … من قلة الباركنات في بيتهم والا جدامه؟؟ …. ويوم ارد من الدوام ما احصل مكان ابركن سيارتي … والحين يسوون تصليحات جدام البيت وصدق متوهقين …
بتقولون بلغو البلدية … بلغنا ولا سوو شي … بلغو الشرطة … بلغنا ولا سوو شي … كلموهم … كلمناهم وماشي فايدة … قولو لي اشوة انسوي وياهم ؟؟
احس انهم يأثمون بهالتصرفات .. الرسول وصّا بسابع جااااااااار
و هاييل الباب بالباب ويسوون جيه !!
الله يعينكم
مادري شو اقولج والله ..
والله يكون افعونكم
اعنبوه كلهم مرمسينهم ولا مسويين سالفه ؟؟
عليهم ويه لووووح
الله يعينكم بصراحة ماعرف شو الحل
اذا الشرطه والبلدية رمسوهم وماشي فايده ؟؟
شو يسوولهم هذيلا ؟؟ يضربونهم ؟؟ 
خخخخ
بس ماعتقد مواطنيين ؟؟ لا تصدميني وتقولين هيه
الله يعينكم عليهم …