تجربتي مع الكيراتين

السلام عليكم ورحمة الله وبركاته

بصراحة انا انسانة تعودت دايما الاتكال على الله قبل ما ابدي اي مشروع..
وخاصة لو مشروع يخص جلدي او شعري او ويهي بشكل خاص..

فكنت افكر دااااااااايما بحل لشعري اللي كنت اسشوره من 10 سنوات بالضبط.. تخيلن كل ما غسلت شعري سويت له (بلو دراي) يعني السشوار على اصوله سشوار الصوالين.. حتى البنات قامن يطلبن مني اسشور لهن..
بس تخيلن شعري كيف صار؟؟
يعني شعري الطبيعي كيرلي.. مش مجعد افريقي.. لأ.. كيرلي.. بس اللي يشوفه يقول مجعد لانه جاف ومتقصف وحالته حاااااااااااله
طبعا لما رحت xxxx (مركزي المفضل)خيروني بين الكيراتين وشي اسمه اكس تنسو x-tenso
وانا قلت لهم مابي تمليس.. ابي شي يخلي شعري مايكش..
لان شعري من اغسله.. اذا ما سشورته. بيكش.. والكشة فظييييييييييييييييييييييعهة
فالمهم بعد المشوارات قررت اسوي x-tenso (اكس تنسو)
لكن لاني قلت لها مابي شعري يكون سيدة,,, فهي سوت لي ياه بدون ما تستخدم الكواية
المهم النتيجة كانت نوعا ما مقبولة.. يعني دفعت 650 وشعري صحيح ان الكشة قلت بوااايد
يعني صرت اغسله وعادي ارقد بدون ما اسشوره .. وانش اليوم الثاني اشوفه عادي.. لكن في مناطق بسبب حرقة السشوار باهته. ومنفوشة لكن مو كشة فظيعه.. يعني كشه حلوة
المهم
مرت 3 شهور من سويت الاكس تنسو.. وقلت يا ربي مو عايبني. ابي شي نتايجه افضل
وطبعا انا اسير اسوي ليزر حق الشعر في مركز في xxxx يعني هو مركز تجميلي بس على ايادي خبراء ودكاترة.. يعني اللي تسوي لي ليزر هي دكتورة جلدية..فشافت شعري وكنت اكلمها عن تجاربي.. جان تقول لي اصبري شهر.. نحن بينزل عندنا نوع يديد من الكيراتين..
وانصحج تسوينه

وطبعا من دراستي في الصيدلة الكيراتين مابلاه شي.. هو عبارة عن بروتين..
فقلت في نفسي.. توكلي على الله يمكن الله رايد لج تسوين الكيراتين في هالمركز.. مش في xxx..
مع اني اروح xxx .. وعميلتهم واحب شغلهم بس سبحان الله كنت مترددة اسوي الكيراتين عندهم
المهم
قبل 5 ايام بالضبط.. سويت الكيراتين
اولا الريحة كانت تجنن.. يعني ريحة الكيراتين حلوة مش فظيعه مثل ما سمعت من البنات.. فهالشي أكد لي ان الكيراتين اللي عندهم غير من اللي عند الصالونات
والشغل خذ منها 4 ساعات بالضبط + نص ساعة غسيل شعر قبل الشغل..
وقالت لي 5 ايام لا تغسلين شعرج
شعري صار شرات الفلبينيات حتى خواتي كانوا يضحكون على شكلي
وقبل ما اطلع من المركز.. باعولي شامبو مع بلسم.. خاص في الكيراتين.. وقالت لي استخدميه ع الاقل لمدة شهر.. وبعدين اقدر استخدم اي نوع شامبو.. وحتى قالت لي معلومة ما سمعتها من باقي البنات
قالت لي ان الكيراتين هذا دايم.. يعني يضل في شعرج.. مو مثل ما سمعت في المنتدى ان لازم كل 3 شهور تسوينه..
المهم..
الحين قبل ساعة لما غسلت شعري..
استخدمت الشامبو.. وعقب البلسم (ملاحظة.. بنات البلسم لازم تستخدمونه عقب اي شامبو .. لان الشامبو يزيل غلاف الشعرة.. والبلسم يرجعه ويحميه… لكن البلسم ما ينغسل به فروة الراس شرات الشامبو.. يعني لما تستخدمين البلسم لازم بس تحطين كمية في ايديج وتدهنين به اطراف الشعر .. مو فروة الراس.. وهذا اكبر غلط البنات يسوونه عشان جذي تطلع لكم قشرة واللي يطيح شعرها… فالله يخليكم اي شامبو تستخدمونه … لازم تستخدمون البلسم معاه.. والبلسم لا تخلونه يلامس فروة الراس)

نرجع لموضوعنا <<<< بنذبحها هالبنية كل شوي تطلع برا الموضوع
اتخيلو لما غسلت شعري..

وااااااااااااااااااو

وااااااااااااااو

واااااااااااااااو

تبارك الرحمن لا اله الا الله ما يحسد المال الا صاحبه
تبارك الرحمن ولا حول ولا قوة الا بالله
والله ما عمري حلمت ان شعري يصير بهالروعة
نعومة + لمعان + ريحة حلوة + بلا تموجات او تجاعيد (قصدي الكيرلي اختفى وشعري صار سايح شرات الفلبينيات لكنه مو مثل التمليييييييييييس ابد.. في فرق كبييييييييييييييييييير)

والله اني مستانسة واااااايد ع التجربه

وحبيت افيدكم

الرجاء من اي وحده ما نفع معاها الكيراتين..قبل ما ترد على موضوعي تسأل نفسها هالسؤال؟
هل الكيراتين كان فيه ريحة حلوة وايد؟؟
هل استخدمتي شامبو الكيراتين بدون كلوريد الصوديوم ماركة امريكية في اول شهر من الكيراتين؟؟
هل تركتي الكيراتين اقل شي 4 ايام في شعرج؟؟
هل خبيرة شعر سوت لج الكيراتين.. مع مراعاة النظافة وتجفيف الشعر ووضع الكيراتين على خصل.. واستخدام الكواية لتثبيت الكيراتين؟؟

اذا جاوبتي على نعم عن كل هالاسئلة.. ولازال شعرج فيه مشاكل او الكيراتين خرب شعرج.. ارحب بردودج.. ونصايحج
لكن لو كان اجاباتج كلها لأ او وحده منهم بس كانت (لأ).. ويايه تعترضين ع الكيراتين اللي انا سويته .. اقول لج عزيزتي لا تكتبين الرد عشان ما توهين البنات

لان الكيراتين انواع .. والنوع اللي استخدمته متأكدة انه مختلف عن اللي موجود في الصالونات

واللي حابة تستفسر عن اي شي تراني حاضرة

وانا ليش كتبت لكم تجربتي مع الاكس تنسو.. لاني قلت يمكن بسبب اني سويت الاكس تنسو قبل الكيراتين هو اللي خلا شعري سااااااااااايح ولا احلى
ومافيه تموجات
لان الاكس تنسو يقلل تموجات الشعر..
بس مو متأكدة لو شعري اللي اشوفه بسبب الثنين.. ولا بس بسبب الكيراتين..
لكن متأكدة اللمعان ونعومة الملمس من الكيراتين

ودمتم بود

(فديتها امي وها دخلت علي وشافت شعري وتخبلت وقالت لي حلال عليهم اللي خذوه مني)

ياااااااااااااااااااااي رووووووووووووووووووعه

والله البنات حيروني

كلن يمدح الشي اللي سواه

فيه بنات تمدح التنمليس الدائم

وفيه اللي يمدح الكيراتين

ابي ارسى على بر .. انا عرسي شهر 6 وابي اسوي هالشي قبله بشهر عشان اصبغه بعد ..

بليييييز حد يشور عليي شو اسوي

فخاااااااااطري اسوي…ماقالولج شو من انواع الشعر اللي ممكن يسووله الكيراتين؟؟؟ لأن شعري ناعم بس مب ساااااااااايح وانا ابا شي يعقه لوووول…

وحده من خوات ريلي كانت مسويه…وانا كنت داااايما اظن ان هذا شعرها وكان وااااايد عايبني..وعقب عرفت انها مسويه كيراتين..خاصه ان مر عليه تقريبا سنه وكان الشعر اليديد بادي يطلع لها..فبين الفرق شوي…طبعا ماكنت بلاحظ الا لأنها خبرتني لوووول…

وياليت تخبريني كم كلفج شغلهم؟؟؟

وبالبركه عليييييييج الشعر اليديييد….

مرحبا ..الغاليه …انا ما جربت الكراتين بس بأذن الله بجربه الشهر الياي بسويه …بس بنقل لكم تجربه اربعتي المقربه لي وانا سرت وياها ..يوم سوت الكراتين ..وبالفعل شرات ما قلتي مريم نفس الخطوات والوقت والنتيجه ..واحسبه اضمن عن التمليس لان التمليس لي بعد صديقاتي مجربينه ويختلف من بشره لبشره وهو يحرق الشعر احيانا ..او يعقه ..فأحس الاسلم الكراتين …ودعواتكم انه يولام شعري لان شعري وايد خفيف ..ويطيح طبيعي ..بس بتوكل عالله وبأستشير أخصائيه جلديه عن مدى تحمل فروة رأسي قبل لا اسويه

مبروك عليش الشعر الجديد حبيت اسألش الكيراتين اللي سويته هو عباره مثل التمليس يعني ما يحتاج تستشورين شعرج وكم مدة التمليس سته شهور او اكثر واخيرا اذا ما عليش اماره كم كان سعره وكم طول شعرج يعني انا طول شعري قصير لين الكتف انتظر ردش

فديتج انتي استخيري ربج وتوكلي عليه
انا هذا اللي سويته.. يعني كنت اصلي القيام واطلب من ربي يساعدني في تجهيزاتي ويدلني على ناس شغلهم زين وماراح يغشوني او شغلهم ماراح يضرني
والتمليس ما انصحج فيه لانه يضعف الشعر
وانا عن دراستي للكيميا اقول لج التمليس يخرب الشعر.
لكن اللي عرفته.. لو تبين تسوين تمليس… سويه من الحين.. وعقب التمليس بشهر تقريبا.. سوي الكيراتين..
لان الكيراتين عبارة عن علاج للشعر لكنه مش تمليس..
يعني ينعم الشعر… ويخليه سايح بس ما اعتقد انه تمليس ابدا..
انا اختي مسويه تمليس.. لكن اان شعري مجعد فما احتاج تمليس.. وهذي لما سويت الكيراتين في فرق كبير بين شعري وشعرها
صحيح ان شعرها سايح
بس باهت
مافيه لمعة
لكن انا شعري سايح وما يبااااااااان ابدا اني مسوية اي شي
يعني اللي يشوفه يقول طبيعي

صح فديتج هو شكله اللي يشوفه يقول طبيعي
يعني ماراح يعرفون .. وهذا اللي مخبل بي تبارك الرحمن
وانا كلفني 3000 لان شعري طوله متوسط على قصير
يعني نازل على جتوفي..

والله يبارك فيج غناتي تسلمين

انتي توكلي على الله وخلي امورج بيده..
واستشيري اخصائية جلد يكون افضل

بنات ارد واكرر

اي شامبو تستخدمينه لغسل الشعر.. لازم تستخدمين البلسم بعده.. لكن لا تخلين البلسم يلامس فروة راسج.. دلكي به اطراف شعرج … واغسليه.. لان الشامبو يضعف روابط الشعر.. ويخليه متقصف.. والبلسم هو اللي يحميه ويقويه…

لكن اذا خليتي البلسم يلامس فروة الراس.. راح تعانين من قشرة وتساقط شعر..

وشي ثاني

لا تسووون هالشغلات في الصالونات يا بناااااااااااااااات
الكيراتين مثله مثل الليزر
يبي له خبيره
يبي له دكتورة..
صحيح مرات الصالونات يكون عندهم احسن الاجهزة.. بس ما يعرفون يستخدمونه ابد.. بس يقرون التعليمات ويجربونه ع الاوادم وانتي وحظج.. يا طاح عليج يا ماطاح عليج
الكيراتين نفس الشي

وشي ثالث

الكيراتين اللي استخدمته ريحته حللللللللللللللللللللللللوة
لكن اللي قريته في المنتدى من شكاوي البنات ان الكيراتين اللي استخدمنه ريحته تضيق الصدر .. وقوية لدرجة انهم يفتحون الدرايش عشان يسوونه… وهذا انا مامريت فيه ابد

فانتبهن لهالشي