water Marbel Nail Art

السلام عليكم ورحمة الله وبركاته

اليوم حبيت اشارككم تجربتي في تطبيق الماربل ديزاين ع الاظافر واستعرض معاكن نتائج تجربتي و شو اللي تعلمته منها ^^

طبعا طريقة الماربل تختلف عن طريقة وضع المناكير العادي لانه يتم تطبيقها في الماي.. ويمكن اغلبكم يعرف بس ماجربتوو.. فأنا جربت عشان اخبركم ان الشغلة سهله واشجعكم

هذي صورة من النت للماربل ديزاين

وهذا فيديو عشان تشوفون طريقة تطبيق الديزاين

https://www.youtube.com/user/cutepoli…/8/D9A_9FH7e-A

والحييين بستعرض الكم تجربتي ^^

الأدوااات :

بنحتاج كوب ماي + مناكير+ لزق+ اسيتون+ منقاش " عود الاسنان" او قلم او اس شي ضعيف

الخطوة الأولى:

نختار الالوان اللي بنستخدمها في الديزاين .. وهنيه انا اخترت درجات الازرق

الخطوه 2 :

نلزق اطراف اظفر باللزق.. وواضح الشي بالفيديو. سمحولي ماعندي صورة

بعدين نحط البيس على اضافرنا لحمايتها من المناكير " البيس عادةً يكون شفاف ومتوفر في محلات بيع المناكير والمكياج"

وبعدين نحط طبقة مناكير بيضا عشان بيبن الديزاين

طبعا انا استخدمت ظفر صناعي للتجربه والعرض فقط … والتطبيق على اظافركن يطلع احلى..

جربت اسوي الديزاين بدون ما احط مناكير ابيض.. طبعت تجربة فاشلة.. وجربت استبدل اللون الابيض بلون اخر.. بعد كانت تجربة فاشلة .. بس عادي ممكن تستبدلون اللون الابيض بلون اخر بشرط يكون لون فاتح

خطوة 3:

نحط مااي في الكوب..

من تجربتي,, الماي بدرجة حرارة الغرفة هو افضل شي.. يعني مايكون بارد ولا دافي.. وانا بالعاده اعبي الماي من الولف وعلى طول استخدمه واذا برد ابدله
و نصيحة.. اذا كانت الغرفة بارده بندي المكيف لان المناكير بيجمد بسرعه بس مب تذبحن عمركن من الحر وتقولن انا قلت

بعدييين نبدا انقط المناكير في الماي بالدور ولازم نكون سريعين عشان مايجمد..

في الفيديو بتشوفون ان مناكيرها واايد سائل.. و نحن اغلب المناكير اللي عندنا بالحسرة ينقط لذلك…. دخلي الفرشاه في المناكير وطلعيها بدون ماتمسحينها في راس الغرش واذا حسيتي القطرة عالقة في الفرشاة تبى تنزل بس في نفس الوقت ماتبا تنزل.. حطيها على سطح الماي وبإذن الله بتنزل في الماي

يتبــــــــــــــــــــــــــــــــــــــــع

نستخدم المنقاش او القلم في رسم اشكال عشوائية

للاسف اعلم كم هي قبيحة هذه الرسمه

بس صراحة جدا صعب اشتغل واصور و و و كله في نفس الوقت .. والكيمرة ذبحتني لين تلقط وماعندي حد يساعدني

في تجاربي السابقة يوم كنت ارسم .. كنت احسه بسرعه يجمد و تتقطع الرسمه.. بعدين اكتشفت السر

لازم يوم تبدين ترسمين او بالاصح تحددين .. تمشين المنقاش على سطح المناكير مب سطح الماي,, يعني قبل كنت ادخله في الماي و ارسم ,, هو عادي بيصير بس مابيمديج الا وبتشوفين المناكير قام يتقطع او يلصق في المنقاش.. لذلك امشي على سطح المناكير

خطوة 5:

وهي الخطوووة المرتقبة اللي نشوف فيها النتيجة .. نحط الظفر في الزاويه اللي نحن نباها تنطبع على الظفر و نخلي الظفر في الماي ثواني .. بعدين انييب المنقاش و نشيل باقي المناكير اللي على سطح الماي

اهمية هالخطوه انه اذا مانظفنا الماي من زوايد المناكير.. احتمال يوم نرفع الظفر يلصق باقي المناكير في الظفر و يخرب الديزاين و يروح تعبج هبااء منثورا

وبعد ماننظف الماي نطلع يدنا من الماي و تنااااا

ها ها ها ادري مب وايد حلو لان الظفر وايد عملاق ولان الرسمه اللي رسمتها شوي عبيطة .. بس جربتها على اظافري و حصلت على نتيجة جميلة ومرضيه الحمدلله
و بعدين نحط طبقة من التوب كوت " بعد مناكير شفاف يوضع لاضافة لمعه وللحفاظ على الديزاين " << خطوة مب مهمة

الحلو في هالشي انج اول ماتطلعين ظفرج من الماي يكون ناشف. مايحتاي تتريينه ينشف

للحصول على نتائج افضل,, خلي التموجات في الرسمه كبار مب مثل ماسويت..انا سويتهن وايد صغار ,,

وبعدييييين نشل اللزق من على الظفر و ننظف حول الظفر اما باستخدام اعواد القطن مال الاذن بعد اضافه الاسيتون الها.. او باستخدام هذا الشي الجميل اللي انصحكن بشرائة لانه بيريحكن واايد في تنظيف الزوايد.. و اذا خيستي ظفرج ترومين تنظفينه بكل سهوله

بتلقون مثلة في انجلوت

وهنييييه سويت تجربة اخرى باضافة قطرات مناكييير اكثر ^^

بس ماحطيت النتيجة محافظة على مشاعركم و عشان ما احبطكم P:

وتم بعــــــون الله وبحمده .. اي استفساار اي تعلييييق انا حااضرة .. اتمنى انكم استفدتو من الموضوع و اتمنى انه كان واضح

و في انتظاار اراائكم و تجااربكم .. و ان شاء الله يكون الموضوع دافع الكم لتجربة شي جديد في عالم المناكير

واذا لقيت تفااعل بنزل الكن موضوووع اخر