هذي اول مشاركة لي وياكن.. وحبيت تشاركوني في مشكلة صديقتي العزيزة
بسبب أختها وصديقتي هذي انسانة مثقفة وخلوقة و موهوبة و متخرجة من الجامعة
من كم سنة ومالقت وظيفة حالها من حال الناس.. وتدرون يلسة البنت فالبيت مب عيب
مب نفس الولد اللي لازم يطلع ويشتغل ويصرف على نفسه واسرته وجذيه
المهم هي عايلتها عندهم خير بس فيهم بخل
عكسها هي والمشكلة عندها اخت مطلقة وعندها عيال بس اعوذ بالله
كلامها شرات السم يوم اسمعها كيف تكلمها وانا وياها عالخط
صديقتي يوم تطلقت اختها كانت كله تمدحها وانها كانت مظلومة والسبب من الريال
لكن تقول بعد عصبية اختها عليها حست انها انخدعت فيها مثل كل الناس اللي يزورونهم
ويتعاطفون ويا اختها وانها مسكينة و ماتستاهل ..
صديقتي مثل اي وحده عاطلة عن العمل تنام وتيلس عالتلفزيون و النت مثل اي حد
دام مالقت نصيب لا بزواج ولا بشغل
لكن اختها اتهمتها ان لها علاقات عالنت و علشان جذيه هي دوم تيلس عليه
تواجعت وياها و تخاصمن لفترة ما يتكلمن فالبيت بعدين صديقتي قالت هذي اختي مهما صار
وردت لها عادي.. لكن أختها الله يهديها ماخلتها في حالها وخلت كل اللي فالبيت يشكون في اختهم
وعندها خوات وكلهن هذي الاخت أثرت عليهن و صار مثل اللوبي ضد اختهن الصغيرة
و حسستهم ان اختهم فيها حالة نفسية ومريضة لان صديقتي اول مابدت اختها تستفزها
كانت تسكت لكن كم بتسكت اخر شيء دافعت عن نفسها و ردت لها الصاع صاعين
لانهم فالبيت مرة مايبون يضايقون المطلقة ويكفيها اللي هي فيه
فعلشان جذيه ولان اختها ما سكتت مثل الباقيين و هاجمت مثل ماهي تهاجمها
خلت الكل يفكر انها مريضة نفسية مع انها ماشاء الله عليها وين ماتسير الكل يحب يتعرف عليها
حتى اختها المطلقة من قبل تقول لها ماادري الناس شو عايبنهم فيج يكلمونج انتي وانا لا
يوم يكونن فصالون ولا عيادة ولا محل الكل يكلم الصغيرة سواء اللي يبيعن
او زايرات في العيادة اما هي لا
وترسن راس امها بافكارهن والحين حتى امها مب مرتاحة لها وكله تشتكي منها
وتقول لها لو ياج معرس بنقوله انتي مب طبيعية ولا عندج اخلاق
واقسم بالله العظيم ان المسكينة مظلوووومة وحبوبة مع الناس الا اهلها بسبب اختها الله يسامحها
ماقصرت حتى الخدم والخدامات والسواق قالت لهم ان اختها مب نظيفة وكله تيلس عالنت
الحين صديقتي مختنقة من البيت لا تقولون لها روحي قدمي فتوطين ولا غيرها
لانه مابيفيد.. هي الحين حلفت ما تكلم اختها الى يوم القيامة لانها تقول اذا ياني القلب تراه بسبة اختي
وانتي الشاهده ..
وهي بس الحين تريد تحسن علاقتها مع باقي خواتها وخوانها وامها طبعاً
بصراحه اسوأ ما في هالدنيا ان الوحده ماتحس بالامان فبيتها
واختها الله يسامحها واللي كانت كله تمدح فيها تسوي بها جذيه
واختها بعد خبرت كل صديقاتها ان ربيعتكن هذي تراها علة و مريضة نفسيه
وانا من بينهن بس ما صدقتها اعرف ربيعتي من زمان و اختها هي المريضة عقب الطلاق
وتيلس كله تقول لها الله يعينه اللي بياخذج هذا وبعده نصيبها ما يا
عيل لو ياها واحد حد يروغ الخير عن اخته
انا وخواتي شو ما صار بيننا بس نرد خوات واكثر بس هذي خواتها ماادري كيف
واهلها عندهم واسطات ويقدرون يشغلونها بس مايبون
وغير انها يوم تريد تشترك في دورات قالوا لها اشتغلي و براتبج دفعي للدورة
واذا بتسير مكان اختها تيلس كل مرة تتصل بالدريول وتحسسه ان اختها سايرة تسوي جريمة
مع ان الخدامة وياها .. ماادري بشو انصحها لان اختها شخصيتها قوية ومأثرة على الكل
وما تبى اي حد يرد عليها حتى تيلس تسب أمها جدام الناس
وامها بدال ما تخفف عليها ويا العودة في كل شيء تقوله يمكن خايفة من لسانها
بس حرااام والله البنت مظلومة و اذا اختها ماتطيقها هذا مب ذنبها
هي من قبل كانت كله تسير وياها اي مكان تباه وحتى تنش من الفجر مع انها تنام للظهر
علشان اذا اختها المطلقة تبى تسير مكان الصبح اما اختها ما ترس عينها شيء
و تعايرها لانها مالقت وظيفة وتقول لها بنات الناس احسن عنج
وامها نفس الشيء تقول لها بنات الناس احسن عنج في كل شيء
صدق انقهرت على حالتها الله يهديهم بس وشو تسوي علشان تكسب امها على الاقل
احس عايلتها مادية واذا هي عندها راتب بيرفعونها فوق اما انها عاطلة ومالها حظ
يسوون بها جذيه مع ان مب عيب يلسة البنت فالبيت لازم تتوظف وهي مالها يد فالموضوع
اتمنى تخبروني بشو انصحها كل مرة تتصل وتقول لي شو اسوي الناس كلهم مفكريني مريضة نفسية
حتى اللي يزورونا فالبيت بسبة اختي باقي شوي وبتقول لهم مينونه ودوها المستشفى
مااستبعد عقب ما شفت اختها
وشو سوت بها أتمنى تساعدوني علشان احل مشكلتها ونكسب اجر
بس باين للقصه وجه ثاني احنا مو عارفينه
لانه ما في اهل بالدنيه بيحكوا عن بنتهم شي مو فيها ومثل ما انتي حكيتي عندهم بنت مطلقه يعني بهمهم ما يطلع سمعه على بناتهم الثانيات
الله يستر على جميع بنات المسلمين حبوبه
وخليني اكون صريحه معك انا ما بقدر احكم بقصه سمعتها من طرف واحد وخصوصا اني ما بعرف البنت الي بتحكي عنها
الله يهديها ويهدي اهلها
مشكورة الغالية عالرد
اختها تفكر كل اللي يقعد عالنت
صاااااااااايع
تفكيرها سطحي جداً
والمشكلة هي تغااااار من اختها لانها دايماً
تاخذ الاضواء عنها و الكل يسال عنها
ولانها شاطرة موهوبة في كل شيء
لكن مالها حظ بالشغل مب بايدها
ولو كان فيه صحيح من اللي تشك هي فيه
ما قالت لها روحي اشتغلي بالعكس بتقول لها اقعدي فالبيت احسن
عن الفضايح
بس تعايرها بقلة حظها بالدنيا و ولان عندها صديقات وااااايد عكسها
وامها تعتمد عليها كثير اكثر من اختها المطلقة
ومع ذلك ماتقدر تدافع عنها و تسايرهم
دام هي واثقة من عمرها ..
وبعد تحاول تدور شغل ع سب شويتنشغل بعمرها .. وتلقى شي يلهيها…
والله يعينها والله
مشكورة الغالية عالرد والله يعينها ويصبرها