تعالوا يا بنات بخبركم عن تجربتي مع الفيلا شيب
على فكرة يا بنات انا وزني 61 وعندي منطقة البطن ملعوزتني والزنود ,, وحابة اخلي جسمي متناسق
قبل ما اسوي الفيلا شيب،، سويت سيرج في النت وشفت الفيديو عنه اكثر عن مره ،، قريت تجارب البنات،، الي حسيت انها قليلة،، وفي كم من بنت ما مدحوه وقالوا انه الوزن يزيد عقبه،،
المهم انا توكلت على الله،، واتصلت على عيادة الدكتورة سعاد لطفي،، ورحت،، طبعا في المكالمة سألتها قلتلها كم سانتي احتمال اخسر قالتلي من 3 سم الى 5 سم واكيد بتخسرينهن،،وسألتها هل في دايت معين اسويه او رياضه معينه قبل الجلسة،، قالت لي لا بس تعالي ونحن بنسويلج الجلسة ،، قلت اوكي
في يوم الجلسة،،
دخلت العيادة وقلت للموظفة انه عندي موعد للفيلا شيب،، كلمتني وقالت لي هالمره انه احتمال خسارتي من 2 الى 3سم!!!! استغربت قلت لها غريبة انا يوم كلمتج اول مره قلتي من 3 الى 5،، قالت انا اعطيج اقل الاحتمالات،، وسألتني عن المنطقة الي ابا اسويها قلتلها ابا البطن مع الزنود جان تقولي اختاري منطقة وحده احسن عشان تركز لج عليها والمره الياية اذا تبين البكج سوي المناطق الباقية،، والجلسة 45 دقيقة.. قلت ما عليه،، ودخلت وكانت اختي وياي،،،
دخلت النيرس وخذت قياساتي وسجلتهن وحطت لي اللوشن على منطقة البطن مع اني كنت قارية انه يحطون جل،،وقالت لي بتحسين بالالم في المنطقة الي عند العظم تقصد القفص الصدري واحتمال يكون فيه كدمات حمرا وزقا فلا تخافين هذا يستوي للجميع،،بعدين بدت تمرر الجهاز على منطقة البطن ،، اول شي ما حسيت بشي عادي يعني شعور غير مريح،،قلت ماعليه،، وشوي شوي بدا الالم يزيد،، والحراره اتزيد،، والله يا بنات ما ابالغ ،، حسيت بحراره كأنه حد قاعد يمرر ولاعه على جسمي والله من كثر ما عورني صرخت بصوت عالي ،، وهي كل ما تخلص جزء تقيس حراره المنطقة بمقياس حراره لانه في لمت معين مسموح للحراره،، ومسكت نفسي وحاولت اكمل الجلسة،، وانا دموعي اربع اربع،،
خلصت النيرس بعد 35 دقيقة،، قلت لها انتوا قايلين 45 دقيقه،، قالت لا انتي ضعيفة ما يحتاج لج وقت وايد الاجسام الكبيرة هي الي تحتاج وقت اكثر!!!!! بس هني كنت غبية سوي لو قلتلها كملي على الزنود عالاقل بحلل الجلسة شوي،، بس ما يا في بالي اقولها،، بعدها بدت النيرس تاخذ قياساتي،، بس انا ما حسيت اني خسرت وايد،، و النيرس طلعت مب هينة فهي حست اني ماخسرت وايد فتمت ترص شريط القياس على خصري،، وعلى قولتها خسرت 3 سانتي،، سانتين من اسفل البطن وساني من اعلى البطن المنطقة الي تحت الصدر على طول،، !!!
وعد الدفع يابولي وقة اوقع عليها،، الي هي انه عادي يكون فيه كدمات زرقاء،، ولازم تكون الوحده تمشي على نظام غذائي وتلعب رياضة خلال الجلسات!!!!!!
وطلعت من العيادة وانا دافعة 2024 درهم على جلسة ما استفت منها الا اني لين الحين احس انه جزء من بطني محروق ،، بس ما في علامات الحمدالله،،
وهاذي تجربتي يا بنات،، حبيت اخبركم عنها عشان الوحده اذا تبا تسوي الفيلا شيب،، تحصل تجربة حد بكل تفاصيلها،،
إدعولي الله يوفقني ويحقق لي الي اتمناه،،،
لا تستسلمين من اول جلسه
ماشي غير المشي هو اللي يعدل شكل الجسم والجيم
انا بعد ما اصدق ها السوالف موووول وخاصه تقولين يعور وااااااااي
لا تاكلين فالليل غير سلطة وفواكه وابعدي عن الحلو اهم شي وكثر الملح
صدقيني امور بسيطة تتبعينها بتروح البطن والزنود ولا تحرقين جسمج ولا فلوسج