مسائكم سعادة وعبادة/أخر مشترياتي المميزة من أدوات الحلويات

مسائكم رحمة وعبادة وسعادة .

ماشاء الله الاسبوع مر بسرعة البرق .بما إني باجر إجازة قلت خلني أسهر وأشوف أخواتنا العضوات . ما بطول عليكم . اليوم سويت شوبنج حق موضوع انشاء الله بتعرفونة جريب . وطبعاً الأمر ما يخلى من أمور مميزة وأدوات حلوه بالذات لوصفات الحلويات . وحبيت أشاركم بعض منها . بإسم الله نبدأ:-

اهني صوره جماعية حق بعض الأغراض الي اشتريتها من محلات تافولا ومن محلات ثانية .

اهني عندنا لوح تبريد الفطاير أو البسكويت أو الكيك . عبارة عن لوحين وفيهم بلاستك أزرق . يتثبت بطريقة بسيطة ويصير عندج لوح تبريد دورين . عملي وحلو وما ياخذ مكان .

الأمر ما يخلو من الألوان لقيت لوني بطيخي فاتح وايد عيبني . وبعد اخضر فاتح جدا يعطي تأثير بسيط وباهت عكس اللون الأخضر الي نحن متعودين عليه.

أختكم شوكلاتة تموت في شي امسه قلوب ولون وردي فما بالك لو اجتمعو ويا بعض . لقيت هذي المجموعة المميزة فيها 3 ديزانيات بس الي في النص وايد حبيته ودخل قلبي من أول نظرة .

واهني صوره من الجنب توضح الألوان . وايد مميزة ورائعة .

واهني مجموعة قطاعات . عيبني فيهم الوردة والفراشة والأرنب . والي عجبني أكثر وأكثر لون القطاعات المميز . اهني العلبة قبل ما أفتحها .

يتبع أحبتي

اهني أوراق للخبز . حبيت لونهم والدزاين الي عليهم . واستخداماتها عديدة للحلويات وللموالح .

واهني مجموعة قطاعات ثانية اسمها قطاعات الزفاف . وايد حبيتهم (انتي كل شي حبيته) لا صدق حبيت شكل الكيكة الي 3 طوابق . وأنا واقفة في المحل سرحت تخيلت عمري قاعدة في مطبخي ويالسة ألون هذا البسكويت بالأيسنج . لين ما يت وحدة (وقالتي ممكن شوي لو سمحتي ). ويوم شافت ويهي قالتي مب انتي … قلتها هيه نعم أنا خخخخخ .

وايد هذرتي . نرجع لموضوعنا . لقيت من ضمن قوالب الشوكلاتة . قالب فيه دزاينات للتزين الكب كيك والتارت والشيزكيك . يعني بدل ما تعبين الشوكلاتة في كيس تزين وترسمين , بكل بساطة تعبين القوالب هذي وتعطينج دزاينات مميزة ودقيقة بنسبة كبيرة جدا . اهني شكلها من جدام والشوكلاتة الي مزينة الحلويات هي الي في القالب نفسة.

واهني شكله من وراء لاحظوا مكان تعبئة الشوكلاتة .

وأخيرا وليس أخراً وبالانجليزي . the last but not lest قطاعات البيبي . وعبارة عن مجموعة مكونة من 4 قطاعات مختلفة الأشكال والألوان . اهني العلبة وهي مسكرة

واهني شكل القطاعات بشكل أوضح وأدق . لاحظوا كيف .

شيف شوكلاتة