حبيباتي انا وايد محتاره في موضوع الوظيفه
عشان جي حابه اشوف راي المعرسات
شو رايكم في الشغل
تفضلين انج تكونين ربة بيت ولا موظفه
يوم شاورت ريلي عادي عنده اداوم ولا ايلس في البيت
بس احسه يشجعني عالدوام عشان اكسر الروتين ويمكن عشان المعاش اني اوفر عليه شوي اذا بغيت سياره ولا شي
مع ان الحمدلله ظروفنا زينه بس تعرفون الانسان يطمح للاكثر لو بغى يدلع نفسه ويسافر ويستانس
واخوي خبرني اذا الحرمه مب محتاجه للوظيفه ما انصحها تداوم
لانها بتقصر نوعا ما في وقتها للبيت او العيال او الزوج ، وفوق هذا مشاكل الدوام وايد من غيره وحسد ًكلام القيل والقال وامور تشيب لها الراس والواسطات والظلم
وقال ان الحرمه معززه مكرمه في بيتها وملكه لا احد يتأمر وعليها ولا شي الا ريلها
عكس الدوام
وبعد اخاف من شي معين
ان اذا الحرمه اشتغلت الريال يقطع مصروفه عن الحرمه ( وهذا من حقوقها ) ويطلب منها لو احتاج او يحط عينه على فلوسها
حتى اللي حواليها من يعرفون انها تداوم يحاسبونها اكثر من الناحية الماديه والهدايا وغيره
فشو رايكم للمعرسات بالذات
ندمانه انج تداومين ولا العكس
ولو خيروج بين الوظيفه والبيت شو تختارين
وين راحتج وسعادتج اكثر
مع العلم اني معرسه من كم شهر وساكنه بروحي يعني علي شغل البيت كله، ونفس الوقت ريلي مشغول ف اكثر وقته برع البيت
للعلم عندي سيارتي يعني الحمدلله اقدر اروح بيت ابوي او اطلع او اروح لاهله
يعني اغير جو الحمدلله بس القصد اني اغير روتين و انجز شي
فكرت في مشروع بسيط ابدي فيه بس بعد مب متأكده
يا بيتي او شغلي، و وايد اعرف حريم مجبورات انهن يشتغلن عشان
حالتهم الماديه، لكني ما اشجع الزوجه انها تشتغل لعده اسباب منها:
١- بتقصر ف ريلها وبيتها واذا هي ركزت ع بيتها ف بتقصر ف شغلها.
٢- اذا الريل تعود ع انه حرمته تصرف ع عمرها وتاخذ اللي تباه وقت
ما تبا ف احتمال كبير انه يشل ايده من المصروف او انه يتعذر ياخذلها
شي هي تباه بحجه انه عندها ولو هو رفض ف هي بتاخذه من بيزاتها.
٣- لو كان الزوج مادي يمكن يطلب مره ولا مرتين من حرمته، بغض
النظر عن الحاجه لكن مرات الحرمه حتى لو تعرف انه ريلها بيلعب ف
البيزات بتعطيه ويمكن هالشي يخليه يتعود انه دايما يطلب منها.
٤- لج انتي افضل، لانه معروف سواء ف الشغل ولا الجامعه السوالف ما
تخلو من الحش والقيل والقال ف يلستج ف بيتج بتبعدج عن هالاشيا
٥- انا أؤمن وهاي وجهه نظري انه سواء زوجه او بنت من اتداوم وخاصه
ف مكان مختلط ف حياءها يقل شاءت ام أبت، ودايما شبابنا يقولون الوحده
من اتداوم اول فتره بتكون ملتزمه عقب بتبتسم شوي وعقب بتسولف وعقبها
ينشل حاجز الحياء ومثل ما نعرف الحياء شعبه من شعب الايمان.
٥- الشغل معروف انه للماده بس ماعرف البعض ليش يحاول يغطي هالشي
ويظهره على انه اعتماد ع النفس ! الشغل عمره ما كان اعتماد ع النفس
لانه لو كان كذلك ما بيكون اجباري ع الريال انه يشتغل واختياري للحرمه
الاعتماد ع النفس مب ف الشغل ع كثر ما هو مدى تحمل الفرد لمسؤولياته.
واخيرا، اشجعج ع انج تسوين لج مشروع اتديرينه منها تشغلين وقت الفراغ
اللي عندج ومنها تيمعين لج حق المستقبل ولعيالج ان شاء الله، لا حد يتأمر
عليج ولا تبتعدين عن بيتج والحينه ما شاء الله اغلب الحريم يدخلون مجال
الاعمال الحره بس يحتاج منج بذل مجهود مضاعف وبتتوفقين ان شاء الله
من عقب ما شفت بلاوي الخدم قمت اخاف وأفكر الف مره كيف بداوم وبخلي البيبي عند بشكاره ماعرف شو ممكن تسوي من وراي حتى لو عاملتها بالتي هي أحسن!
بس الحياة صعبه الحين وكل شي غالي ومعاش واحد ما يسوي شي خصوصا لو الريال عليه ديون و راتبه مب قوي وايد لازم الحرمه والريال يتساعدون وأكثر شي يكسر الظهر بنيان البيت بروحه هم ومصاريف
و الوحده لو اختارت راحتها واليلسه فالبيت لازم تتنازل عن وايد اشياء وكماليات مثل السفرات والكشخه والفنادق الفخمة لأن الريال كم بيعطي وبيصرف يقطع عمره مسكين
واخر شي انا ما اشوف نفسي فالبيت لاني درست كم سنه وتعبت وعندي طموح ومستقبل وأهداف ودي احققها عشان أثبت نفسي واكون شي فالمجتمع
لكن مثل ما قلت في بداية الموضوع الشي اللي ممكن يخليني اختار اني أكون ربة بيت هو عيالي احس قلبي بيعورني وماقدر اخليهم تحت رحمة البشاكير
