خواتي حابه افتح موضوع للنقاش ،، انا مش متزوجه بس قولن اني يالسه اقرا واتثقف فهالموضوع =) عشان جي هاليومين كله مطيحه فهالقسم 
عندي سؤال محدد واعتقد واضح ..لانه اللي اشوفه انه تدخل الاهل بين الزوجين هو السبب فاغلبيه المشاكل ،،او يمكن ما يكون سبب مشكله بس يبني حياه زوجيه غير سعيده او غير مستقره لانه الاطراف متحمله او تعودت .
– فهل مجتمعنا يقبل ان الزوجين يعيشون بروحهم ويكونون مسؤولين عن اتخاذ قراراتهم 100% وما يدخلون الاهل بينهم الى في حاله انه الزوجين طلبوا الاستشاره ؟؟ ولا التدخلات لازم تصيير 
– بعدين فرضا الزوج مب قادر يطلع فسكن مستقل ،هني الزوجه تكون مضطرة تحتك ويا اهله … فمن ناحيه المنطق ف الحياة الزوجية انها تكون مسؤوله عن اهله !! تطبخ لهم او تساعدهم ماديا او انه لها الخيار فهالموضوع .
(( انا وجهة نظري تقول انه الزواج هو مشروع ، وعشان ينجح هالمشروع لازم الطرفين يستقلون ويستقرون مع بعض ويخططون عشان يبنون اسره .. بس المجتمع شي ثااااااااااااااااني !!! يعني لا بييت ولا تخطييط وفوق هذا حياه الازواج اللي يخططها ويبنيها ويحددون متى يطلعون ومتى ما يطلعون ويحددون متى اييبون عيال اول شهر ولا ثاني يوم هو الاهل ))
ارجوكن خذن راحتكن فالتعبير 
وسوري انا كثرت الاسئله بس لاني شفت في تناقض بين الكتب واقوال العلماء الاجتماعيين ( طارق الحبيب اكبر تحيه 
) وبين المجتمع وعاداته
– هل مجتمعنا يقبل ان الزوجين يعيشون بروحهم ويكونون مسؤولين عن اتخاذ قراراتهم 100% وما يدخلون الاهل بينهم الى في حاله انه الزوجين طلبوا الاستشاره ؟؟ ولا التدخلات لازم تصيير
في البعض من الآباء و الامهات لا يقبلون ان يعيش أبناءهم في سكن مستقل ،،،، ما اعتقد أن التدخلات تصير في كل العائلات يعني على سبيل المثال صار لي خمس سنوات عايشة في بيت أهل زوجي محد تدخل في حياتي انا و زوجي ،،،، بس طبعا الحياة في بيت مستقل يكون احسن في حال ان أهل الزوج من النوع الي يفتعل المشاكل ،،،،
– بعدين فرضا الزوج مب قادر يطلع فسكن مستقل ،هني الزوجه تكون مضطرة تحتك ويا اهله … فمن ناحيه المنطق ف الحياة الزوجية انها تكون مسؤوله عن اهله !! تطبخ لهم او تساعدهم ماديا او انه لها الخيار فهالموضوع .
يستوي في بعض العائلات ،،،، انا ما دخلت المطبخ الا لمرات محدودة و معدودة حليلها ام ريلي ما تغضب حد على شى ،،،، ياليت الكل مثلها الله يحفظها لنا ،،، المساعدة المادية يكون من الزوج مب منج انتي مثلا انتي تاكلين في نفس البيت و بنفس الصينية و نفس الاكل فلازم تساهم ون بمبلغ اذا كان أهل الزوج غير مقتدرين ماديا
السكن المنفصل ضروورة حاليا نتيجة ان معظم الطلاق في المحاكم نتيجة تدخل الاهل و اهل الزوج
اللي ما يروم ياجر شقى صغيرة ع قد الحال لو بأي سعر هذا مب قد زواج سوري يعني
وما ينفع يكون بو عيال اصلا
و المواضيع ما شاء الله ها اليومييين تثبت صحة كلاميييييي
لأن أشوف ان أنا وريلي أولا في بر عمتي الله يطول بعمرها..
بس بنفس الوقت امورنا الخاصه ابداااا محد يدخل فيها لا من طرفه ولا من طرفي..
اثنينا عاقلين وفاهمين ان مشاكلنا تخصنا وبس مهما صغرت او كبرت..
بعض العمات ما يتعاشر والبعض ينحط عالجرح يبرى.. وكل وحده ونصيبها..
الله يرزقج حبيبتي ويوفقج في حياتج ^_^
المهم / خواتي اللي ردوا ،،اشكركم ع الرد وانا طرف محايد فموضوع السكن لانه الظروف هي اللي تحكم ،خاصه مجتمعنا بشكل عام يربون عيالهم عشان يكونون ابناء بارين وما يهيئونهم للزواج ..فطبعا البنت والولد يكونون فرحانين لانهم ما بيتحملون مسؤوليه بيت وطباخ وعيال ..الخ
او ممكن مثل الاخت Um Sha5bo6 و @miss pink@ كان عندهم السيطره على حياتهم وحابين وجود اهلهم بينهم ، وانا اصلن من وعيت ع الدنيا ما شفت ابدا ابدا حد من مجتمعي المتحفظ انه اثنين متزوجين طلعوا سكنوا بشقه او حتى فكروا يبنون بيت من اول يوم ، واعرف ناس قدرتهم الماديه واايد واايد زينه بس عايشين بغرفه وحمام هم وعيالهم ووااايد سعيدين بزواجهم !! وناس قررت تطلع من بيت اهلها عقب 20 سنه زواج ولازالو يتعمدون ع اهلهم فامور البيت
بس انا اللي اريد اوصله ،، انه في شخصيات معينه " مثلي" احب الاستقلال والاعتماد ع نفسي بكل شي.حتى مرات يكون عندي تحفظ من ناحيه الخدم ،فبعد الزواج الحرمه اذا طلبت انها تختار الحياه اللي هي تباها وان تكون راضيه تتحمل مسؤوليه البيت من طباخ وغسيل ..هي تختار شو تاكل ومتى ترقد وما تحب حد يراقب تحركاتها وطلعاتها من البيت !! والاهم انه وجهه نظرها للحياه تقول انه الزوج اذا ما طلع من بيت اهله وعاش حياه ثانيه وجرب ياكل اكل غير الي متعودنه ونمط حياه يديد ما راح يحس انه متزوج ،،حتى لو كانوا اهلها واهله طيبيييين وما يدخلون بس اكيد وجود بيت مستقل راح يبعد الزوجين عن اهلهم بشكل او بآخر وانا مجتمعي يشوف هالشي غلط وبكون قليله ادب وشريرة اذا قلت لزوج المستقبل ما اريد اسكن ويا اهلك ،،
كملن ردود بلييز =) …..
فيه فكرة وصورة نمطية ما خذينها البعض عن أهل الزوج وعن أمه بالذات وأنه معظم أمهات الأزواج شريرات ويفتعلن المشاكل وسبب الإنفصال بين الأزواج ! وهذه الصورة خطأ وهي من الصورة المغلوطة اللي تنتقل للبنت قبل الزواج وتصدقها وتصير قبل حتى ما تتزوج مشحونة من أم زوجها المستقبلي .
ما أقول هذا من فراغ , أخت صديقتي مخطوبة وبعدها ماتزوجت ولا حتى شافت أم خطيبها إلا مرتين , تخيلوا كانت تسألنا كيف تحطي حد لعمتها(أم خطيبها) من الحين ؟؟؟؟؟؟؟؟؟؟؟؟ فقلت لها : ليش أنت شو شفتي على عمتج ؟ قالت : ما شي ! ما أعرفها بعدي والله والمرتين اللي شفتها فيهن باين أنها زينة بس أعرف العمات لعينات !!! ربيعاتي كلهن يقولن كذا !!!
هذه مثال بسيط ! يعني الوحدة من تعرس تصير تتوقع أي تصرف من عمتها هو الشر بعينه وتصير تفسر الكلام على كيفها ولو زوجها تغير عليها تقول بسبب أهله ولكن المشكلة أنه الوحدة فينا ما تنتبه لتصرفاتها وكلامها اللي ممكن يسبب ضيق لعمتها أو لأهل زوجها , وما تشوف عمرها بس تقول أنه أهل ريلها هم راعين مشاكل ويدخلوا بحياتها !صح فيه نسبة قليلة جداً أمهات الزوج راعيات مشاكل وهذا على حسب الشخصية , ولكن غالبية العمات طيبات وعاديات وهذا اللي شايفتنه حوالي .
ومافيها شي لو الوحدة عاشت في بيت أهل زوجها , وفيه أسباب وايدة تستدعي ذلك . ولكن لو الزوج مقتدر وأهله ما محتاجين لسكنه معاهم ممكن يسكنوا بروحهم . وتراه معروف أنه نسبة العنوسة عندنا مرتفعة فلا تحطوا شرط البيت المنفصل عقبة جديدة في وجه الزواج !!!!!
خواتي , أهل الزوج والعمة بالذات ممكن تكسبيها بكل بساطة بالكلمة الطيبة وحسن المعاملة والإبتعاد عن اللي يضايقها وحسن الظن وحسن النية .ومثل ما تعتقدوا أنه العمات وأهل الزوج السبب في الإنفصال , تراه في عمات وأهل أزواج كانوا السبب بعد الله في إستقرار حياة الزوجين وأستمرارها .
أنا شاهدة وعارفة قصص واقعية كثيرة حصلت تثبت كلامي ولكن ما أبي أطول عليكن الحين . فخلينا نكون عادلين وموضوعين وما نخلي العمة وأهل الزوج شماعة لفشلنا في حياتنا الزوجية اللي يكون في معظم الأحيان بسبب سوء درايتنا وعدم نضوجنا وسوء وتصرفنا و اختيارنا وسوء تعاملنا. والسموحة منكن طولت عليكن .