قصتي هاليومين خففن علي بليييز

عساكن بخير ونعمه يااارب

انا الحمد لله ما عندي اي مشاكل بحياتي ويا ريلي الحمد لله الف مره
ويمكن لاحظتوا اني دايما ارد عالحريم بهالقسم واحاول اعطي نصيحه للكل بس عمري ما حطيت موضوع يخصني

بس اليوم اباكم تواسوني شويه لاني وااااايد تعباانه والله اكتب لكم واصيح

ما اعرف شو صابني بس بقولكم القصه

من فتره كنت بعرس وحده من الاهل وتعرفت على حرمه او بالاحرى حرمتين هن ربيعات ويا بعض وكانن طول ما نحن بالعرس يحاولن يتقربن مني المهم انا تعرفت عليهن وتميت اسولف وياهن وتبادلنا الارقام وطلعت وحده منهن جارتي يعني ساكنه بنفس الفريج
قبل اسبوع خبرت ريلي اني بزورهن لان من يوم تعرفت عليهن وهن يعزمني المهم ريلي شوي كان متردد لانه ما يحبني اتعرف على حد ووايد يخاف علي مااعرف السبب ليش قالي انا بخليج تسيرين لهن بس بشرط حياتنا الخاصه اتم مبينا لا تشاركين حد بخصوصياتنا انا تفاجأت @@ وزعلت عليه اونه من متى انا اخبر حد بخصوصياتنا قالي لا انا القصد انهن عندهن عيال وبيسألنج ليش ما يبتي عيال ومن هالاسئله فانا ما اباج تعطيهن مجال لهالشي( طبعا مشكلة العيال مني وريلي مخبر كل عايلتنا انه العيب منه وحالف علي اني ما اخبر حد من اهلنا او اي حد يعرفنا شخصيا انه العيب مني )
المهم سرت عند حرمه من اللي تعرفت عليهن وصراحه من يلست وياها وهي تسألني عن حياتي وانا اتهرب وقالت انها تعرفني وتسمع عني انا وريلي وكان ودها من زمان تتعرف علي اونها معجبه باسلوبنا فالحياة انا وريلي وكيف انه مدلعني عالاخر ومن هالكلام صراحه ما اعرف ضقت من كلامها واستأذنت اني اروح قالت لي لاا والله ما تقومين حلفت اليوم عشاج عندنا واتصلت على الحرمه الثانيه انها تيي (للعلم هن حريم تقريبا ب الثلاثينيات من العمر يعني اكبر عني ) انا سرت لهن الساعه خمس وما طاعن يخلني اروح للبيت وكل ما قمت يحلفن وريلي يتصل علي كل دقيقه لانه مب متعود اسير عند حد واطول هالكثر ويطرش مسجات ومسجات وانا مب عارفه شو اسوي وما ظهرت لين الساعه عشر ونص وهن كل ما قمت يحلفن ويوم يتصل ريلي يقولن لي طنشي لا تردين عليه لازم يتعود على طلعاتج شوفينا نحن رياييلنا ولا يسألون لانهم تعودوا لاازم انتي تعودين ريلج انج تطلعين عند ربيعاتج قلت لهن انا ما عندي ربيعات وكل طلعاتي ويا ريلي وغالبا تكون عند الاهل ويكون ويايه او يلحقني تمن يقولن لي لااا ما يستوي جيه ويطالعن بعض ويضحكن انا صراحه ضقت وقلت لازم اسير المهم ظهرت ولا ريلي جدام بيت الحرمه ركبت وياه طبعا ما تكلم بس اول ما ركبت
قالي :لا حول ولا قوة الا بالله جيه تيلسين هالكثر
قلت له تراك احرجتني ويا الحريم ليش تتصل هالكثر شو سالفتك . والمشكله ريلي جدا هادي يعني لا صارخ ولا شي بس انا ردة فعلي كانت قويه واول مره بحياتي ارد على ريلي جيه
المهم هو سكت لين وصلنا للبيت عقب قالي: جيه ما تاخذين وحده من البشاكير وياج اقل شي يكون وياج حد انتي اول مره تسيرين عند حد غريب وتيلسين هالكثر وانا الصراحه طول الوقت كنت على اعصابي وخفت عليج
وانا معصبه واصارخ ما اعرف شو ياني والمشكله بداخلي احس انه ريلي ما يستاهل واحس انه كلام الحريم اثر فيني مع اني انا مب من هالنوع ابدا
المهم سرت صليت ركعتين وتعوذت من ابليس وقريت قرآن واستغفرت الين ياني رقاد ورقدت
ثاني يوم الصبح اتصلت الحرمه اللي كنت عندها اونه تعالي عندنا اليوم
قلت لها الصراحه ما اروم ايي لان البارحه وايد تأخرت على ريلي وهو مب متعود على جيه واليوم ابا ايلس وياه شوي
قالت لي وييييييييه لا دلعينه زياده عن اللزوم وتعالي ونسي عمرج ويانا ولا ترى نحن بنييج للبيت
وريلي كان حذالي قلت لها اوك انا شوي بشوف الوضع وبتصل بج قالت لي اترياج لا تأخرين

خبرت ريلي قالي حياهن بس انا اليوم وعدت الوالده انه نسير وياها المزرعه رباعه شو نسوي الحينه
قلت له خلاص عيل انا راح اعتذر منها واقول انه مشغولين اليوم وفعلا هذا اللي صار

سرنا المزرعه وتمينا يومين وعقب ردينا
اتصلت بي الحرمه تتخبر ردينا ولا لا قلت لها هيه حياج تعالي عندي اليوم انتي وربيعتج
يوني عالساعه اربع وتمن يسولفن والمشكله ان سوالفهن بس عن الحريم ورياييلهن وفلانه سوت وقوم فلان صابهم ومن هالسوالف وانا الصراحه مب متعوده على جيه لا مع اهلي ولا مع ريلي ما نحب نييب طاري الناس والله اني طول الوقت اردد بيني وبين نفسي (سبحانك اللهم وبحمدك اشهد ان لا اله الا انت استغفرك واتوب اليك ) عسب اكفر عن يلستي وهالكلام يدور
شوي بدن يرمسن عن ريلي واونه محظوووظ فيج واايد وانتي محظوووظه اكثر واكثر بس ليش ما يبتوا عيال قلت لهن الله ما راد قالت وحده الصراحه انتي ذوووق باللبس وبيتج صرااحه وايد حلوو وانييق وتعيبين الكل حتى يوم العرس ابهرتي الناس الصراحه وام ريلج دوم تمدحج بميالس الحريم
بس قالت لي لو تبطلين ادلعين ريلج وايد عسب لا يروح لغيرج لان الريال يمل جيه خصوصا ريلج معروف والكل حاط العين عليه
قلت لها وانتي شو عرفج اني ادلعه ولا ما ادلعه تراكم ماخذين فكره غلط
قالت لا بااااااااااين اصلا انا دووم اشوفه يظهر الصبح كااااااشخ وابتسامته شاقه ويهه وكله طالع وياج فمبين انج مدلعتنه بس تحملي ترى نحن كنا جيه وعقب كل شي انجلب
وتمن يسألني وااااااااايد اسئله خاصه اضيق بالخلق واونه اي صالون تروحين وشو من كريمات تحطين وشو تلبسين حق ريلج !!! وكل اللي يخطر فبالكن سألن عنه والله حسيت عمري بتحقيق مب حريم يايات زياره
وتمن على جيه الين الساعه 11 وانا كل شوي اقول بيظهرن خلاص ولا ظهرن ودقت الساعه 12 عقب سارن وريلي يالس بالميلس الخارجي من الساعه 7
عقب دخل ريلي طبعا ما قال شي بس على طووول سار اتسبح ورقد ولا قال كلمه وهااي اول مره يستوي جيه
انا من ساعة ما ظهروا الحريم وراسي يعورني عواااااااااار فضيييع ما رقدت الين الساعه خمس الصبح
نش ريلي وسار الدوام عقب اتصل بي الساعه 11 قالي البسي بنظهر شوي لبست وظهرنا سرنا صوب الممشى وانا طووول الدرب ولااااااااااا كلمه ويا ريلي وهو يسولف وانا موول مب وياه وهو واحليله يسأل وانا ما ارمس وسرحانه ودموعي نازله وهو يحاول باي طريقه يخليني اوك ما شي
عقب ردينا البيت قالي انا بسير سرت حجرتي وقفلت علي وتميت اصيح ولا تغذيت وريلي يصارخ من برع يباني ابطل الباب ما شي
عقب سار ياب عمتي وتمت تصيح مسكينه من برع عسب ابطل وبطلت لها الباب وتلوي علي قالت لي شو بلاج شو مستوي امبينكم وانا ما ارمس وريلي يحلف انه ما سوى اي شي
عقب هديت شوي وقالت لي تعالي نسير عندي بيتي انا ما اروم اخليج على هالحال وقالت حق ريلي انه ما يخبر اهلي عسب ما يخوفهم
وسرت وياها وعلى نفس الحال تميت الين اليوم الثاني ريلي ما تحمل قالي خل نسافر المانيا او اي مكان وغيري جو ونشوف دكتور هناك انا ما ارد بس اصيح عقب عمتي سارت يابت لي مطوعه تقرا علي وتمت تقرا تقرا لين رقدت وعقب ما نشيت قلت لريلي بسير بيتي قالي تامرين وردينا البيت البارحه وريلي طول الوقت ويايه ويقرا علي واحس عمري احسن الحمد لله بس بعدني كل شوي اصيح ما اعرف ليش
بس المطوعه تقول يا عين يا شي صايبني لان ريلي خبر عمتي عن الحريم اللي عرفتن انا وجيه وسألتني عمتي اليوم عنهن وشو قالن وجيه وخبرتها وهي تقولي اقطعي علاقتج فيهن
بس انا ما ابا اظلم حد الصراحه وعمتي تقولي انه العين حق

بس انا كل اللي كاسر خاطري الحينه ريلي ما يستاهل مني اللي شافه بهاليومين وهو قاعد يحاول يرضيني باي طريقه والله البارحه حتى ريولي باسن من اللي شافه وحالتي شقا كانت

المهم اسفه اني طولت عليكن واااايد بس والله اني حبيت افضفض وتنصحوني لاني واثقه انكن ما بتخلني وحالتي جيه كله صياح فصياح حاولت اغير جوي باي طريقه اقرا المواضيع الثانيه وارد بس كله اصيح ومب عارفه شو السبب ومنكده على ريلي الي من يومين ماظهر ولا سار مكان وكله يالس عدالي واصلا هو اللي قالي اكتبي لربيعاتج بالمنتدى يمكن يخففن عليج