السلام عليكم ورحمة الله وبركاته
اشحالكم يا سيدات الامارات
اممممم… ماعرف كيف ابدأ الموضوع ..
امممم
كل اللي اقدر أقوله بأني تعبانه نفسيا ..والله تعبانه ..واحس إن الحمل اللي بقلبي كبير ومب قادرة أتحمله اكثر وانا بعدني 26سنه
والسبب إني مطلقة .. صحيح بأن محد يضايقني بهالكلمه..وأهلي مب مقصرين فيني ..ولا ربيعاتي وكلهم معاي وحوالي ..لكن الذكرى تذبحني..ويوم افكر إني بكبر بالعمر وبظل وحيدة أتعب أكثر وأكثر
انا تزوجت وعمري 21 سنه ..تزوجت شخص يكبرني بـ 8 سنوات وحبيته كثييييير
لكن بعد 4 شهور من زواجي.. بعد ما حملت بالشهر الثاني.. إكتشفت إن زوجي يشرب خمر..
صحيح انا كنت اشم عنده روائح كريهة لكن بحياتي ما توقعت انه بيكون خمر
واكتشفت وتأكدت يوم شفته سكران ويتمايل في المشي..صحيح انا سكت عنه ووديته الغرفه عشان يرقد ولكن اليوم الثاني يوم سألته عن الموضوع اللي صار عصب علي ..وسوا نفسه شريف مكة ..وعقب انا سكرت الموضوع بس خليته يحس بأني انا شكيت فيه عشان يخاف شوي ويترك الخمر
وبعدها خلاص قمت اميز ريحة الخمر ..اميز ريحته اذا كان شارب ولا لأ
وصارت مشاحنات كثيرة من بينا خلال فترة حملي..بخصوص هالموضوع ..لكن طبعا بدون علم أهلي بأي شي.. وقلت بصبر عليه لين ما أولد بالسلامه يمكن يشوف عياله ويهتدي
لكن للأسف هو استمر على هالشي ..وانا تجرأت وفاتحت والده بالموضوع ..
وطبعا اهله يدرون بكل شي ولكن ساكتين ..ويوم كلمت والده وعدني بأنه بيكلمه
وبعد ما كلمه ترك الشرب 4 شهور تقريبا ..وانا مالاحظت شي عليه
وبعدها بـ 4شهور رجع له مره ثانيه ..فكلمت والده مره ثانيه فترك الخمر شهر..ورجع له ..
وانا كلمت والده مرتين والمره الثالثه مستحيل ارجع له ..
فقلت خلني اتقرب منه اكثر حتى بمواضيع شربه..وانا من النوع المتفاهم ..والصبور..
فحاولت بأني اسأله اذا كان فيه تقصير من صوبي يخليه يشرب..فقالي لأ
وسألته هل هو بدأ يشرب في قبل الزواج ولا بعد الزواج ..والجواب كان قبل الزواج
وخبرني عن أشياء كثيييرة عنه وين يشرب ومع منو والأماكن اللي يترددها دايما واشياء كثيرة وانا طبعا اسايره
وحاولت اني استدرجه بالكلام ..عشان اخليه بالتدريج يترك الخمر
وقلت له عن فكره وبإسلوب حلو ..بأنه بس يشرب الخمر يومين بالأسبوع
طبعا رفض
وحاولت معاه كذا مره لكنه رفض..وانا كنت اجيب له المواضيع بأسلوب سلس وحلو..عشان يتقبله مني..لكنه يرفض ويقولي ..انشالله بس اصبري علي..مب الحين
فــ تميت عنده على هالحال 3 سنوات واكثر
وانا تعبت منه ..
جبت منه بنت وحده ..ومابي بنتي يوم تكبر يعايرونها البنات في المدرسه بنت السكير.. او مثلا اذا جبت ولد ..يطلع مثل ابوه …
فققرت اني أفاتح اهلي بالموضوع
خبرت أبوي..بدون علم أمي ..وقلت له ككككككل شي.. وطبعا ابوي انصدم ..لانه على بالي بأني انا اسعد وحده من خواتي في زواجها ..وفجأة انصدم يوم قلت له ابا اتطلق منه
انا صحيح قلت لأبوي ابي اتطلق منه..لكن..كنت ابي اهدد زوجي بإني خبرت عليه اهلي.. عشان يهتدي شوي
المهم
ابوي خبر امي بالموضوع
فعقب .. ابوي اجتمع بزوجي..اقصد طليقي .. وحاول يفهم الموضوع منه ..لكنه بكل وقاحه قال لأبوي هيه انا أشرب ..وقلل أدبه على أبوي وطلع
فأنا هني اصيرت على الطلاق ..منن القهر ..لكن بنفس الوقت كنت ابا ارجع له ..لأني ما ابا اتطلق بس مجرد تهديد
كنت اتمنى انه يرجع ويعتذر من والدي .. كنت اتمنى انه يردني
لكن.. بعد مرور 3 شهور طلقني طلقة وحده
وانا طبعا مستحيل ما نزلت كرامتي ولا اتصلت فيه
مع اني والله احبه أحبه أحبه ..وهو ماعرف ليش جي سوا فيني ..خرب حياتي ..
الحين انا صار لي 2 ونص من تطلقت واحس نفسي خلااص مب قادره اتحمل أكثر..
مابا أكمل حياتي..وأعيش على كلمة مطلقة
فيه خاطري اتزوج.. لكن المشكلة منو بيقبل بي كمطلقة..صحيح ان انا انسانه عفيفه وبحياتي ما غلطت ولا بغلط انشالله ..لكن الناس منو بيفهمهم هالشي..لأنهم دايما يحطون اللوم على الحرمة أكيد هي السبب..
المهم
انا من انفصلت عنه غيرت رقمي .. واذا يبا يشوف بنتي ايي بيتنا ويشووفها
ومرات ياخذها عنده كل اسبوعين او كل 3 اسابيع واتم يومين عنده
وقبل شهرين انا سافرت مع بنوتي (عمرها 4 سنين) الله يحفظها برع البلاد لأن امي مريضه وتتعالج برع ..
فـ يوم وصلنا المطار ..تفاجأأت بطليقي ..شاف بنتي وحظنها وعيوونه علي انا (واخوي اللي خبره بوقت رجعتنا والحجه يبا يشوف بنته)
المهم فــ بعد يومين من روجوعنا بالسلامه.. طليقي يا البيت وقال يبا ياخذ بنتي عنده البيت عشان اتم كالعاده يومين .. وانا حطيت ملابسها واغراضها بسرعه وطرشتها معاه
بس تفاجأة عقب يومين اخوي يتصل ويقولي بأن بنتي بتم 3 ايام عنده .. وبعد الثلاث ايام قالي بتم بعد يوم المهم طولت وتمت عنده اسبوع كاامل
وانا طبعا ولا مره كلمته من تطلقنا ..وهو سوا هالحركه بس عشان يكلمني .. انا طرشت مسج على رقمه وقلت بأني ابا اسمع صوت بنتي
واتصل فيني وكلمتها ..وعقب هو خذ السماعه عنها وقعد يكلمني ..ويقولي بأنه يحبني وما يقدر يستغنى عني ..وبأنه من زمان يبا يكلمني بس مب عارف كيف
وقالي بأنه يبا يرجعني ..فسألته انا ..هل هو ودر الخمر ..البدايه جذب علي ..بس بعد اصراري صارحني ..وقالي بعده يشرب ..المهم انا قلت له اذا يباني يتعالج وطبعا رفض وقالي هو برووحه بيترك الخمر بالتدريج ..
المهم وهو يتكلم يخبرني عنه وعن حياته ..والله انه كسر قلبي من غير ما يحس
قالي بأأنه تزوج ..من وحده عيميه ..وهي مطلقه واكبر عنه بسنه وعندها عيال كبار ومتزوجين
والله يوم قالي جي انا تظايجت ..بس سويت نفسي عادي
وقالي بأنه مب مرتاح معاها وهو حاليا كمل معاها سنه ونص وكله من بينهم مشاكل ويبا يطلقها
..
المهم تقريبا قعدت اكلمه يومين لين ما رجع بنتي البيت ..وعقبها ما رمسته
وهو كله يتصل فيني ويطرش لي مسجات وانا ما ارد عليه
….
المهم اليوم الصبح ..اتصل علي ورديت عليه لأني الصراحه مشتاقتله واايد وبغيت اعرف شو سوى بموضوع الخمر وبموضوع الحرمه الثانيه
عن الخمر قالي بأنه يخفف منه حاليا ويشرب بفترات متقطعه
وقالي عن حرمته .. بأنه تصالح معاها على إنه يروح لها يوم واحد في الأسبوع ( لأنها ساكنه عند عيالها في البيت وهذا سبب الخلاف)
وقالي بأنه يبا يرجعني انا
وقلت له الحرمه الثانيه ..قالي عادي اثنينتكم بخليكم على ذمتي
وانا قلت له ما احب حد يشاركني باللي احبه
المهم انا سكرت عنه بس والله اني مظاايجه
ومب عارف شو اسوي ارجع له ولا شو
بليييز فيدوني وانصحوني وادعوولي بالتوفيييج
الحينه بين فتره وفتره يوم اطرشين بنتج عنده في شنطتها حطي شريط محاضرة دينية عن شرب الخمر
وسلبياته بطريقة حلوة يعني المحاضر مايكون ممل يسردها بشكل لطيف ويخلي الواحد يتحمس انه يكمل ..
وخاصه اذا كان طليقج مش من النوع اللي يحب يسمع محاضرات دينية ..
مثلا ادعيه على شكل كتيبات صغيره .. يقراهم ويتقرب من الله عز وجل .. ويترك الخمر ان شاء الله
خلي هدايته وتركه للخمر على ايدج فديتج .. حاولي مرة ومرتين .. تركه مش مسألة سهلة وانا صعبة
لكن مع الاصرار وقوة الارادة والعزيمة على تركه الواحد بيتركه ولو كان مدمن بشكل كبير.
حتى بنتج يوم بتكبر بتلاحظ على سلوك ابوها يتغير وراح تسأل عن السبب ؟! فلا تخلين هالتساؤلات ادور حول بنتج
والله يحفظها ويخليها لكم يارب ..
والله يهدي طليقج ويترك الخمر واذا في نصيب تردون لبعضكم .. ان شاء الله تكونون لبعض ^_^
ربي يوفقج ويسهل عليج امورج آمين يارب
الله يوفقج ياربي
على قوله المصرين ظل ريال ولاظل حيطه
والله يسعدج