قبل ما ابدأ فالموضوع يا لييت تقولن ما شاء الله و لا حول ولا قوة إلا بالله لأن العين حق و انا تعبت منها و انضريت وايد !
أنا – و أعوذ بالله من كلمة أنا – بنت ناس وعرب هب ناقصني شي و كل اللي يعرفونيه يحبوني لني وايد اجتماعية و متواضعه و احب اساعد الناس و دووم يقولون لي انتي قلبج طيب و ع نيّاتج و محبوبه من الجميع الحمدلله و اخلاقي تشهدلي 
لكــن مشكلتي هي الجمال !! هيه لا تستغربون صح انها نعمة من الله لكن احياناً تستوي نقمه يوم تغترين فيها و يحسدونج الناس .. خواتيه انا ماحب امدح عمري والله و هب خقاقة بس بخبركن هالشي لانه جزء من المشكلة ، انا وايد جميلة ما شاء الله جمالي رباني من الصغر كل العيون عليه و مرضت وايد من العين والحسد لأن بعض الناس ما يذكرون الله يوم يعجبهم شي
لدرجة انه مره وحده من الحريم عقّت عليه رمسه في العرس بدون ما تذكر الله و ياني التهاب فظييع في عيوني وصلت لدرجة العمى بس تلاحقونيه على آخر لحظه ..
المهم اني كبرت وهالشي متأصل فيني و كنت مغترّه بجمالي من داخلي يعني واايد واثقه من نفسي بس هب خقه على الناس ولا اني اشوف عمري احسن من حد ؛ لا بالعكس وايد متوضعه الحمدلله
و عقب ما خلصت الثانوية واايد انخطبت بالعشرات و كل مره ارفضهم و اطلّع عيوب فيهم و محد عايبني لني ابحث عن الكمال مع اني اعرف ان هالشي مستحيل و ما بحصل واحد على مواصفاتي 100% لأن الكمال لله سبحانه وتعالى .. و بعد لني كنت متأكده اني اذا رفضت بيخطبنيه اللي بعده و اللي بعده و ما بينقطع نصيبي لكن انا لين متى ؟ انا الحين في بداية العشرين و العمر يمضي
و يوم اشوف البنات اللي من حولي كل وحده تتمنى تنخطب و تعرس و تعيش مع انسان يستر عليها و يصونها و طموحها تكون زوجة و أم ، الصراحة احس اني وايد بطراآنه و ارفس النعمة بدال ما اشكر الله عليها و احسدهن على هالقناعة لأنها صدق كنز
المهم آخر مره شافني اخو ربيعتيه وانا داخله بيتهم و خطبنيه و هنيه صلب الموضوع .. الريال ماعليه قصور و ألف من تتمناه لأنه ولد ناس معروفين و مصلي و مسمي و أخلاقه طيبة و عنده دكتوراه من أمريكا و يشتغل دبلوماسي و أهله وايد راهين ما شاء الله و حالته المادية فوق الممتازة .. يعني باختصار معرس لقطه على قولتهم
انا صليت استخارة كم مره و مرتاحة للموضوع لكن متردده شوي لأن شكله عادي جداً مب وسيم وانا احلى عنه بوايد (هو مب خسف يعني شكله عادي) .. و النقطة الثانية ان امهم اماراتية أصل من عايلة مرموقه بس ابوهم من دولة خليجية و من العوايل المعروفة في هالدولة و هو عنده جواز الامارات (دبلوماسي) يعني لو خذته عيالي بيطلعون مواطنين بس المشكلة انهم هب مستقرين بين هنيه و هناك ! يعني نص أهلهم هنيه عندنا و نصهم في بلاد أبوهم و هو وايد يسافر عند عمّاته و عمومه و عندهم بيوت و أملاك و شركات هناك
و الريال شاريني و يبغيني من الخاطر و محتشر على اخته كل يوم ترمسني عن الموضوع و تقول لي اخويه معجب فيج و يقول اذا وافقتي مستعد يسويلج كل اللي تبغينه و بتسكنين في نفس امارتكم بياخذلج بيت و بتكملين دراستج و بيسويلج عرس لا صار ولا استوى << اغراءات هههه
و آخر مره والله وصلتنيه هدية منهم قيمتها بحدود 300 الف و على اساس انها من ربيعتيه بس انا عرفت انها من اخوها و رديتها !!
انزيين الحين انا محتاره و أعرف ان اسبابي سخييفة و تافهة و ما عندي سالفة اذا رفضت بس انصحوني و عقلوني لني لو تميت جيه شكلي ما بعرس آخر شي 
و السموحة على الإطالة بس جيه طبيعتي احب اكتب التفاصيل الدقيقة
والله بيجدم اللي فيه خيير ..
لاتنسيين ان الشرع وصى بان نتزوج من ترضون دينه وخلقه
انا اعرف بنات من هلنا جي حلوااات و واايد ييهن خطاطييب
و يرفضن ع اسباب تافهه او بدون اسباب
وكل ما تجدمن بالسن قلت الايجابيات ف المعاريس عرفتي
تحسين من كثر مايرفضن الله عاقبهن اخر شي
احين كل اللي يتقدمون كبار ولا معرسين ولا مفلسيين
كله من بطرتهن والله يتندمن على اللي رفضوهم
يوم يسمعون بحالهم احين وعيالهم <>
يالله الله يرزقهم بالريل الصالح
والله يوفقج ويجدملج الخير
صح رقي عمررج دوووم صج العيين حق
والله يوفقج
أناا بعد وآآيد خطبوني .. ويوم أرفض أحس الناس تكرهني من الرفض .. لأن أقلبهم من الأهل ,,
ودوم يقولون تراا القطـــار مب دوم بيوقف عندج .. بيمر عنج خخخخخخخخخ
ما أباا غيـــــــــر إلي في بالي .إلي يبااني من قلبووو . ربي ييسر دعواااااتكمــ
دام انج صليتي واستخرتي علييج انج تتوكلين على الله والله بيسر الامور ان شاء الله0
عزيزتي اقعدي مع نفسج وشوفي نتاايج قراارج بالرفض تراا الجماال فااني 0
الله يهديج وايسر امورج ويسعدج عنووني
عليج بها
وما خاب من استخـــــــــــــــــار…