::قلبي عليه::

اشحالكم بنات وحريم..

من كم يوووم وانا عايشة فحزن وهم..

ابا شي يخفف علي مابا كلام يغث ويعور القلب اللي فيني كافيني..

ببدا معاكم انا وزوجي صارت بينا مشكله عادية وكبرت ووصلت للطلاق
وانا الي طلبت الطلاق ومع محاولات اصلاح اقتنعنا نرد لبعض وثاني يوم قال لا..
والكل استغرب ليش شو صار.. تعرفون شو رد؟!! قال لهم افلانة مسوية شي وانا مابتكلم فيه..
زين واجهني يا ريال اتصل له ابا اعرف شو صاير مايرد..
عقب كم يوم وفي ذمة اللي قالي اونه ياه اتصال من وحدة ..طبعا انا شاكة فوحدة وتطلع منها هالحركات لكن مابا اظلمها ان بعض الظن اثم.. المهم تقوله مرتك تكلم واحد ..وفعلا انا كنت اتصل به عسب ابوه هو اللي كان ماسك موضوعنا والي يصالح بينا وهذا شخص متزوج وابو عيال وزوجي يعرف اني كنت اتصل به وحاولت اني اكلمه افهم السالفة و ادافع عن نفسي ماعطاني فرصة.. خاصة ان ابوه اول مابدت المشاكل كان يقول عني كلام مب زين بس ما توقعت ان زوجي بيصدق كلمة انقالت عني وكنت واثقة من هالشي لانه كان واثق مني لدرجة كبيرة لكن…. والاتصال هذا يا فوقت زود النار حطب … المهم هو اصر انه خلاص ما يباني وتطلقت ووعد يرد لي كل حقوقي..
لكن من بعدها دريت انه فصلوه من الدوام ومشاكل مع اهله وطلع من البيت..
يعني ظرووفه مب شي واهلي ناويين يطالبون بحقوقي ..انا حقي اباه وما بتنازل عنه بس هو فضرووف صعبه.. اقولهم اصبروا عليه يرتب حاله يقولون بيضيع حقج لو ترييتي اكثر خاصة انه طافت فترة من طلق وانا طلعت من عدتي.. والي ينازعني ويقولي ليش تراعينه انتي ماقلتي له لا داوم ولا طلبتي منه يحط نفسه فهالموقف..
انا اعرف مالي ذنب فذا.. بس مب هاين علي وصل لهالحالة وازيده بروحه عنده ديون وجمعيات .. ادريانه هو اللي ياب لنفسه بس الرحمة على الضعيف..والا شو تنصحوووني..
والله قلبي عليه وكل يوم ادعيله الله يفتح عليه ويهديه ويعوضه خير عني وعن وظيفته..

السموحة طولت عليكم انصحوني الله لا هانكم..

الله يرزقج ويعووووووووووووووضج ان شاءالله