فضيحة الساحره في العزاء

ولا حول ولاقوة الا بالله

فكرت وايد قبل ما انزل الموضوع هل اكتبه ولا لا ؟؟ طول الدرب وانا راده من العزاء افكر ياربي معقوله فيه حريم تمكن منهم الجهل لهاي الدرجه ؟ وارد اقول يمكن ضعف الايمان !! واسمع امي تقول حق اختي (( اللي مايخاف الله خاف منه ))

عقدت العزم اني اكتب هالموضوع مب لمجرد كتابته لكن هو بمثابه رساله لكل وحده تسول لها نفسها تسحر ريلها او خطيبها او اي حد ثاني ,, اترككم مع القصه الواقعيه

اليوم الصبح قمت علي صياح ولدي فديته وانا ارضعه اشوف ليت تيلفوني يغامز قلت خير ان شاء الله ,,المهم طلعت الوالده الله يحفظها كلمتها تقولي اليوم لا تسيرين الدوام بنسير نعزي فلان توفى "ولد عمها " من اماره ثانيه ومسكين هذا ولد عمها كان مافيه شي فجأه مرض ومات خلال اسابيع بتيكم السالفه

دخلنا العزاء وكان غير عن كل عزاء حضرته في حياتي صدق احساس ماينوصف يابنات من دخلت اشوف مرت الريال المتوفي يالسه في نص الصاله وشعرها منكوش وجحالها نازل لين خدها وتصفع عمرها انا بغيت اطلع من الزيغه ريلي قامت تنتفض ماتتخيلون يابنات والله تحسين عمرج في فيلم رعب تون بطريقه مرعبه والادهي والامر الكلام اللي كانت تقوله

(( انا اللي ذبحته ,, انا اللي سقيته وتم ميهود ,, انا اللي حطيت له السوى وذبحته ,, يقولي بطني يعورني ,, يقولي راسي يعورني ,, انا اللي طبيته ,, قالي المطوع"قصدها الساحر" هذا قوي قلت زين زين )) وتمت تقول كلام وايد وتخربط بناتها يحاولن يسكتنها تصارخ عليهن (( خلوني اقول خلوني ابرد الضو اللي واريه في افادي وتصارخ صريخ مب طبيعي ))

ماقدرنا نيلس وكل اللي في العزاء مب مستوعبين اللي يستوي تحسين انج طلعتي برع دايره العقل والمنطق اصلا تحسين انج مب من الاحياء ,, واللي كاسر خاطري عياله صغار وكبار انحرموا من ابوهم بسبب جهل امهم وسفاهتها حسبي الله عليها وعلي كل من تلجأ لها الطريج

كانت ويانا مرت مطوع المسيد وتقول حق امي صدق ان السحر يذبح وايد ناس ماتوا منه لانه بسم الله عليكم يسبب امراض خبيثه من القاذروات اللي فيه واللي تدخل في الدم خاصه اللي ماكول او مشروب

الله يحفظنا وياكم ويبعد عنا كيد الساحرين ومكر الماكرين ويرد كيدهم في نحرهم اللهم آمين

وها الله الله في عماركم تحصنوا بآيات الله والاذكار

في حفظ المولى