للمتزوجات فقط الرومانسيات و غير الرومانسيات ماذا أعددت لعيد زواجك هذا العام؟ سؤال للمحتفلات و للواتي سيحتفلن ا أفكار لعيد زواج جديد
أخواتي أردت أن أقرأ أفكاركن.. و إجاباتكن حول عيد زواج مضى أو عيد زواج قادم
اكتبي خبرتك .. وكيف تستطيعين أن تأسري زوجك في ذلك اليوم
و أنا أعرف أن أغلب الرجال يعتبرونها رومانسية مفرطة لا داعي لها فلا يهتمون بهذه المناسبة ولا بشراء الهدايا و لكن الرجل حسب ما تعودينه و حسب طريقتك معه..حتى يتحول هذا الرجل إلى عاشق رائع في ذلك اليوم و يتقن فن تغليف الهدايا بعد أن كان يقلل من شأن هذه المناسبة التي تهتم بها بعض النساء و هي مناسبة لتقوية العلاقة و كسب اهتمام الزوج..
الآن ..أختي اكتبي لي عن :
أهم المحلات لشراء هدايا الزواج ( بطاقات – قلوب حمراء – ملابس نوم )
ماهي الهدية التي ترغبين في شرائها هذه المرة لزوجك؟ هل تهدينه مايحب هو أو ماتفضلينه أنت؟
أنواع الهدايا التي من الممكن أن تهدينها له:…عطور-أقلام-بوك-غتر و دشاديش – أدوات حلاقة – نعال-موبايل..ساعة..الخ
أين سيكون مكان الاحتفال ؟…في البيت ، أم في فندق؟
هل ترحبين بوجود أطفالك معك .. و أن يشهدوا إطفاء الشموع أم لا داعي للكعك و الشموع…فالاحتفالية خاصة بغرفة النوم فقط..
متى تفضلين أن تكون احتفاليتك؟…نهاراً أم ليلاً؟
ماذا يدور في كواليس غرف النوم
..بمعنى هل الحديث مقتصر على الإثارة أم أن فيه ذكريات حميمة لأول لقاء في ليلة الدخلة؟ أو أول لقاء أيام الخطبة أو..أو..إلى غيرها من الأسئلة و الإجابات التي أتمنى أن تتفاعلوا بها معي و لكن جزيل الشكر..
و باضيف لكم تجربة من أخت في منتدى عجبتني أفكارها بس حسيت فيها شوية مبالغة لأن الهدايا صارت كثيرة و وايدة و مايحتاي كل هذا..في أشياء سجلتها معاي علشان أنفذها و أشياء مابا أنفذها لأنها مبالغ فيها مثل ماقلت..اقروا انتوا و شوفوا ..تنفذون اللي تقدرون عليه
================================================== ======
================================================== ======
بنات بخبركم شو جهزت حق عيد زواجي ..
تقريبا صارلي شهر وشوي وانا اجهز لهذي المناسبة
يعني كل ما اسير السوق اشتري اي شي احس انه ممكن ايفيدني …
أول شي بالنسبة للهدية
… يبت كولكشن عطور وخليت زوجي هو اللي يختار العطور على اساس انهم لزوج اختي …
ويبت بدلة رياضة كاملة مع الكاب والجوتي والاندر وير …
ويبت كولكشن اشرطة وكتيبات دينية …
سي دي ألعاب …
وخذتله حق سيارته .. مخده عليها صورته . .. ومخدة عليها صورة اليهال في العيلة .. وسلسة عليها صورته وصورة الشيخ زايد …
( ترى الشباب ايحبون ايشوفون صورهم على الهدايا وانا لاحظت هالشي على اخواني وزوجي )
وبعد خذت قماش شغل سوري لعلبة الكلينكس اللي في السيارة .. بصراحة وايد حلوة ..
نقشت بيتين شعرهو كاتبهم على خشب على شكل كتاب (( هالبيتين طرشهم لي قبل ما اكلمه لاول مره بشوي … يعني اشترالي موبايل يديد هديه
.. مع رقم يديد .. واول ما فتحت الموبايل وصلتني مسجات فيها ابيات الشعر ..
هلا بك يا بعد عمري … عدد نجوم السما وأكثر ..
هلا باللي سكن قلبي … وصار حلمي فيه أكبر …
هلا بك يا بعد ناسي وأهلي … احبك ولا اقدر عنك اصبر …
هلا بك يا قمر ليلي … ونور دربي طول العمر …. ))
ثاني شي الغرفة ( لاني ساكنة معاه في بيت أهله ) أهم شي التغيير
يبت فرش جديد للسرير
علب للكلينكس ( شغل صيني عجيب )
اشتريت شموع صغيرة 100 شمعة ( برتبهم على شكل قلب كبير )
اشتريت تليفون جديد ( نفس التليفونات اللي كنا انشوفها في افلام الابيض والاسود )
اشتريت البوكس اللي انحط فيه المجلات ( شغل صيني بعد كتير حلو )
خذت اجراس كتير حلوين بعلقهم في الغرفة ليلة عيد زواجنا
اشتريت شمعدانين كبار
اطارات يديده لصورنا
أما الحمام ..
اشتريت ستاره عليها صور بجع
خذت مناشف يديده لي وله
خذت طقم لعدة الحمام
حتى معطر الجو خذت واحد يديد ( ريحه يديده )
اشتريت ملصقات بارزه لنباتات بحريه واسماك …
أما بالنسبة لي أنا ..
خذت أكثر من لبسة نوم … بس كلهم حمر … وقلت بجربهم وبلبس الأحلى …
واللي قررت البسها دزاينها اسباني .. شافتها اختي و اتجننت عليها …
طبعا اكسسوار احمر واسود ..
وناويه ان شاء الله اقص شعري قصة يديده وبصبغه … تقريبا يا احمر يا بني اشقر …
اكيد قبل عيد زواجي باسبوعين على الاقل ما راح احط ميك اب … وما بلبس اي شي يديد ..
طبعا هالشي مو معناه اهمال … بس لازم اخليه ياشتاقلي وانا بكامل اناقتي …
خذت فصوص ريمبو احتمال احط شي منهم على جسمي … يعني شي ايناسب لاني ما ابا اكون وايد اوفر …
العشا ..
انا سرت الباتشي وخذت علبة حلويات شكلتها على كيفي .. وتقربا خذت كل الانواع اللي ايحبها حبيبي ..
بشتري كيكه .. بس للحين ما اعرف شو اكتب عليها … ( ادور على شي مميز )
بشتري محاشي لانه يموت فيها … ومشاوي …
اشتريت مكسرات لانه بعد وايد ايحبها …
أما السيناريو …
للحين مب متأكده منه …
بس افكر اسجل صوتي على شريط … واطرده … في الشريط هذا بقوله شكثر انا احبه … وشكثر كنت سعيده وياه
… وبذكره ببعض المواقف اللي مرت علينا … وفي آخر الشريط دعوة على سهرة مميزه …
اتصور انه ما بيكون متوقع الموضوع لانه بيكون قبل تاريخ زواجنا بثلاث ايام لانه في يوم زواجنا بيكون مداوم في ابوظبي عشان جيه بسويه قبل ما ايداوم …
والباقي بفكر فيه … وبخبركم عنه …
في شي نسيت اخبركم عنه … انا شفت عند اختي كرت كبير وايد … وفكرت اخذ واحد نفسه وما اخلي شي ما اكتبه في هالكرت …
افكر في لعبة او حركة مميزة …. بس بعدني ما رسيت على بر …
باقي شي واحد ,, هو شريط فيديو لمسرحية كوميدية او فيلم كوميدي: فيلم صاحب صاحبه او فيلم غبي منه فيه او فيلم فول الصين العظيم
والله ما اذكر اذا في شي بعد ما كتبت عنه … بس اي شي اتذكره بكتبه حقكن …
عندي بعض الافكار ….
– تحجزون في فندق
– سوي حمام مغربي وحلاوة وصبغي شعرج هايلايت او كامل تحني وتمكيجي وسوي تسريحه بسيطه ( الريايل اعيبهم وهالي في الفديو كليبات مب احسن عنا ) ويستاهلون ريايلنا ليش نحرمهم من هالشي ولاتنسين المانكير ولواتحطين كرستال بيطلعن اظفورج كشخة
– لبسي فستان راقي وبسيط واذا ناويه تلبسين فستان ابيض بعد حلووو ( البسي طقم عرسج )
والبسي نفس قميص النوم الي لبستيه في يوم عرسج
– سوي طلبية كيكية صغنطوطه لنفرين وعليها شمعة رقم واحد
– اجبري ريلج اذا كان ماعنده ذوق ومايشتريلج هدايا انج اتروحين معاه محل المجوهرات وتشتريلج ساعة او خاتم او سويره او طقم اي شي ايناسب اماكنيات زوجج .. ويستحسن انج اتسيرين قبله بفتره وتتصلين له اتقولين عيبج الشي الفلاني وسعره كذا وخاطرج فيه …..
– اذا المادة متوفرة عندج اشتريله شي هو يختاره بنفسه وطبعا حدديله السعر وحذاري تعطينه الفلوس كاش ويلعببهن…
– سوي جو رومانسي اشتري شموع الي على شكل الجل وفيهن ورد او صدف ونجم البحر او فواكه ….بتحصلين هالسوالف في هوم سنتر او لايف ستايل
– حاولي تدرسين الامور كلها عشان يطلع مثل ماتبين وعشان لايطراء شي ايعكر في مزاجج في هاليوم
.gif "13 (30)")
المشاركة الأصلية كتبت بواسطة *مواطنه صالحه* 
– اجبري ريلج اذا كان ماعنده ذوق ومايشتريلج هدايا انج اتروحين معاه محل المجوهرات وتشتريلج ساعة او خاتم او سويره او طقم اي شي ايناسب اماكنيات زوجج .. ويستحسن انج اتسيرين قبله بفتره وتتصلين له اتقولين عيبج الشي الفلاني وسعره كذا وخاطرج فيه …..
ههههههههههه
عجبتني هذي اجبري ريلج
أنا عندي كبرياءءءءءءءءءءء
مستحيل إذا ماله خاطر يشتري لي مستحيل أطلب أنا منه
لازم يشتري لي من نفسه
و يسوي لي شيء من خاطره
أنا مابا يسوي لي شيء غصب عنه
عموما الريال يتعلم مثل الطفل حسب ماتعودينه من أول يوم في الزواج
و انتي بعد تتعلمين منه هالشيء معروف
عموما ماعرف شو بسوي في ذكرى زواجنا
مابي أسبق الأحداث
بس
جهزت شيء بسيط للحين ماكملت تجهيزاتي
بس ماقريت راي الحريمات
اشتغلي و جهزي من بعد العيد