مسااكم الله بالخير..
انا حابه ابدأ بمشروع (صبابات قهوة) بغيتكم تفيدوني لو سمحتو..
مب عارفه كيف ابدأ وكم بيكلفني المشروع..دورت دراسة جدوى بس ما حصلت معلومات كافيه
محتايه مساعدتكم
الله يوفقج يارب الشغل عمره ما كان عيب وبالعكس فكرتج حلوة
واللي اعرفه انج ادورين حريم او بنات مستعدات يشتغلون معاج ماعرف كيف ولا من وين اتحصلينهم
و توزعين اعلانات فالنت نزلي اعلان فالوسيط وبي سي فالبي بي اعرضي خدماتج واستعدادتج التامه لتلبية الافراح والمناسبات
طلعي ارقام مكاتب تنسيق افراح من الوسيط وشوفي المكتب اللي يوفر هالخدمه واساليهم شو المشروبات اللي توفرونها وخذي فكره واذا راعي او راعية المكتب ولد حلال بيساعدج ويخبرج ويعطيج افكار عن خدمة صبابات القهوة وكم تكلف وممكن يفيدج اكثر عن اي حد
وموفقه يارب
شوفي اول شي شروط استخراج الرخصة
انا ماعندي خبرة في الموضوع بس بقولج عن اللي انا اشوفه في المناسبات
لازم حرمة تكون مسؤولة عنهم وممكن تكونين انتي
الصبّابات منهن مواطنات او خليجيات او جنسيات عربية مختلفة
انصحج تاخذين اللي عندهم اقامات على ازواجهم او آباءهم أرخص وأوفر مايحتاج سعر استقدام ولا استخراج فيزا لهم ولا توفير سكن
بتفصلين لهن لبس موحد ( اثواب او مغربيات او بدلات)
توفرين اطقم دلال ومباخر وعطور
الخدمات اللي يوفرونها
شاي احمر
شاي كرك
زعتر
حريروّه
حليب بالحلبة
شاي اخضر
وممكن مأكولات شعبية
خبيص
بثيث
قروص خمير ميني
قروص جباب ميني
رطب / تمر حسب الموسم
هريس
ثريد
برياني
طبعاً شو تقدمين على حسب اهل المناسبة والاسعار تختلف على حسب الطلب
وبعد الاسعار تختلف على حسب عدد الصبّابات
انتي خلي عندج ارقام الصبابات وتعاملي معاهم باليومية بس
عشان وقت عندج مناسبة تتصلين بهن ويحضرن وتدفعين لهن نهاية اليوم
ممكن تنزلين اعلان "مطلوب نادلات أو صبّابات دوام جزئي وحددي اي إمارة"
واحتفظي بالارقام اذا وحدة مب قادرة تحضر يكون غيرها متوفر
المناسبات اللي تقدرين تقدمين فيها الخدمة
الأعراس
ليلة الحنا
حفلة الخطوبة / الملجة
العزائم الكبيرة
العزى
بالنسبة للمأكولات لاتطبخين بنفسج
انتي اتفقي مع مطعم شعبي نظيف وخذي سعر خاص
وبالنسبة للشاي وباقي المشروبات الساخنة ممكن تسوينها بنفسج في البيت او ممكن تحصلين الصبابات عندهن خبرة
بالنسبة للعطور سألي اللي بتطلب منج الخدمة اذا هي بنفسها بتييب العود او انتي تييبين لها ونفس الشي بالنسبة للعطور
وفي كل الاحوال انتي اللي توفرين عدد من المداخن والفحم و الولّاعة الخاصة
وتحتاجين ترولي التقديم وصواني التقديم
ممكن تحطين حساب في الانستجرام عن خدمتج مع صور الدلال والاكلات الشعبية والارقام وتحددين في اي إمارة
الحين اللي يبا يدور على خدمة يدور في الانستجرام
يفضل قبل تقديم الخدمة استلام مبلغ يغطي مصروفاتج وبعد الانتهاء تاخذين ربحج
او تاخذين المبلغ كامل مقدّم
عشان ماتتورطين مع اللي مايدفعون او ينقّصون حقج " بس عليها"
لا تنسين الصبابات يبن اجرتهن وتكلفة الخساير خذيها مقدم
لكن الصبابات عطيهن فلوسهن بعد مايخلصن الشغل
ان عطيتيها مقدم تحضر دقايق عقب تقولج ياني اتصال الولد مريض والا ريلها سوا حادث او اي يعذر وتفلت من الخدمة و تتورطين، امسكي عليها
وفي النهاية اذا خذتي كل الاحتياطات ترى الخدمة هذي بسيطة والله ييسر لج و يوفقج