Flora Creek للشقق الفندقية في دبي بالصور حياكن

علومكن ؟ عساكن بخير ..

الويكند هذا قضيناه في دبي .. ليلة وحدة عالسريع ..
قلنا نشم شوية هوا .. ونغير جو قبل زحمة الاتحاد ..

وحجزنا في فلورا كريك للشقق الفندقية في دبي ..
وهذا نحن بركنا جدام الفندق ..

وهذا هو الفندق ..

في منطقة ديرة .. حجزنا فيه لأنه قريب الفستيفال سيتي ..
وكان خطري أسيرها من كثر ما مدحنها البنات وقالن انها مكان هادي ..

الفندق صراحة ما عليه كلام .. حجزنا سويت غرفة وصالة ..
وفيه مطبخ وحمامين .. حمام في الغرفة وحمام برا ..
وفيه غرفة غسيل صغيرة فيها غسالة ..
وعدالها مثل ستور صغير فيه طاولة كوي وكواية ..
حجزنا عن طريق مكتب سياحة عالم العطلات ..
وطلعت الليلة ب1050 درهم شامل الإفطار ..

يالله خلونا نروح نشوف السويت ..

هاي صور الصالة ..

ولاحظوا هنيه المطبخ مطل عالصالة ..

هذا المطبخ .. وعلى فكرة مجهز بمواعين من جدور وصحون وأكواب ..
وفيه مايكروويف وبويلر وتوستر ..

هذا الحمام الخارجي ..

غرفة الغسالة ..

حمام غرفة النوم ..

وهاي غرفة النوم ..

وفيه تلفزيون في الصالة وغرفة النوم .. إل جي فلات ..
يابولنا منز للبيبي ومفرش ..

ويادوب ارتحنا شوي وطلعنا سرنا صوب الفستيفال سيتي ..
تغدينا وتمشينا .. بس ما ارتحنا هناك .. صح المكان حلووووو ..
بس مترووووووووووووووووس ناس .. ماشي مكان ..
لا في المطاعم ولا الكافيهات .. ولا مواطن ..
كلهم هنود واخوانا العرب .. ما شاء الله عليهم ..

المهم عقب طلعنا وسرنا حديقة الممزر .. الدخول بالسيارة ب30 درهم ..
دشينا خذنا لفة وطلعنا .. ماقدرنا نقعد من الزحمة ..
ونفس الشي ولا مواطن .. منقرضين في دبي هههههههههه ..

طلعنا من هناك ماعرفنا وين نسير ..
قلنا بنمر بيبي شوب عالأقل نسوي شي بفايدة ..
وماعرفنا وين بيبي شوب في دبي ..
وطرشت مسج حق الغالية (كررروووزة) وما قصرت ردت علي بسرعة ..
وخبرتني عن اماكن بيبي شوب وسرنا اللي عدال برجمان ..
تسوقنا وخلصنا وطلعنا ..
وعقب ردينا الفندق .. لأن الوقت كان متأخر ..