مرحبا بكم خواتي .. ان شاء الله بنزل لكم في هذا موضوع صور من قصر الطوب كابي فاسطنبول فتركيا وأشياء خاصة بالنبياء عليهم السلام ( معلومة: ترى التصوير فالقصر ممنوع بس قدرت اصور بالدس والصور صج نادرة ، ان شاء الله بحط لكم صورة الاناء اللي كان يشرب منه الرسول صلى الله عليه وسلم وعصا موسى وعمامة سيدنا يوسف وغيرها)
بدينا هاليوم بزيارة مسجد السلطان أحمد أو يسمونه المسجد الأزرق لانه الديكورات من داخل يغلب عليها اللون الازرق ، وترومون تصلون ركعتين فالمسيد ، ووقت صلاة اليمعة تمنع الزيارة لانه يصلون فيه اليمعة.
طبعا هالمسيد صار له سنين طويلة بس لين الحينه الواحد لما يجوفه يحس بروعة التصميم والهندسة فهذاك الزمان ( ذكرني فمسيد الشيخ زايد الحينه من ناحية التصميم)
وهذا ميدان الخيل قريب من مسجد السلطان احمد, ما في شي بس عبارة عن المكان اللي كانوا السلاطين يسوون فيه سباقات الخيل ( الصورة فيها نحت لصورة للسلطان وأهله ووزراه اللي كانوا معاه)
وهنا قبل ما تدخلون اذا ما كان عندكم مرشد سياحي وكنتوا حابين تعرفون معلومات اكثر تقدرون تاخذون سماعات باللغة اللي تبونها وتسمعون معلومات عن كل مكان تسيرون له.
فهالصورة لاحظوا راسمين صورة مريم العذراء وفي بعد رسمه لاسرافيل بعدهم موجودين ( بالرغم انهم اضافوا اسماء الخلفاء والصحابة فالكنيسة)
وهنا في مثل مغارة عشان تصعدون للدور الثاني فالكنيسة , في مصعد كهربائي بس عن طريق المغارة أحلى وايد( الناس تصعد فدقايق ونحن خذنا اكثر عن نص ساعة لانه كل شوي نتصور)
وهاي اشياء خارج الكنيسة
وابدأ معاكم فحديقة القصر ( طبعا نحن كنا سايرين اخر شهر 10 فكان عندهم خريف وتلاحظون هالشي من أوراق الشجر)
وهنا قريب من الباب الثالث اللي يدخل عالقصر ويسمونه باب السعادة
وفاخر صورة هنا يظهر مطبخ السلطان , وكان السلطان يحط عصفور فالمطبخ لانه اذا احد فكر يسممه العصفور يشم الريحة فيموت العصفور فيعرف السلطان انه الاكل مسمم وغير هذا كان ما ياكل السلطان الا لما يخلي اثنين قبله ياكلون الاكل عشان يتاكد انه مش مسمم ، ومجابلنه في مجلس كان يقعدون فيه الوزراء قبل ما يدخلون لداخل القصر من باب السعادة بس السلطان كان مسوي فيه دريشة سرية فالجدار كان يقعد ويسمع الوزراء شو يقولون قبل لا يدخلون عليه.
وهاي صور من داخل القصر
اول شي يستقبلكم صنبور الماء هذا ، كان السلطان يشغله عشان محد يسمع هو شو يقول لما يكلم أحد الوزراء، غير هذا كان ما يعين من الحرس غير الابكم والاصم عشان ما ينقلون اي خبر يتكلم عنه مع وزراءه
والحينه نبدأ بمحتويات القصر .. هاي ملابس السلطان واهله قبل ( كان عندهم كل مكان اللبس واسع يدل على العز والخير)
لاحظوا انه فلبسهم دايما يكون مكتوب في شي مثل رياضيات ومسائيل حسابية وغيره
وهاي صور الخزينة العثمانية طبعا مثل ما قلت لكم التصوير ممنوع بس بالدس قدرت اصور..
طبعا المكان والخزينة مبهر بكل معنى الكلمة كله ذهب وجواهر ( ترى هاي اشياء صار لها مئات السنين بس روعتها تظل لين هالزمن)
خاطري فحزام الجنز هذا
شو رايكم فهالسيف
ونبدا الحينه فالمكان اللي صج تقشعر له الابدان ، اشياء قيمة لممتلكات الانبياء
هذا صورة الاناء اللي كان يشرب منه الرسول صلى الله عليه وسلم ( بس الصورة متحركة لانه مثل ما قلت لكم التصوير ممنوع)
وهذي عصا موسى الحقيقة ، اللي أمره الله أن يلقيها وتحولت الى ثعبان
وهذي صورة عمامة سيدنا يوسف ، العمامة اللي كان يلبسها أجمل رجل على وجه الأرض
وجفنا اشياء ثانية مثل شعر من لحية الرسول وختم الرسول مكتوب عليه ( محمد رسول الله) وجفنا سيف خالد من الوليد وجعفر الطيار وغيرها .. فعلا المكان روعة ويستحق الزيارة.
ولانه المكان مقدس .. تسمع هنالك القران 24 ساعة يكون شغال شفتات كل مرة يكون في احد يقرا القران من المشايخ عندهم وهاي صورة واحد منهم
وكل مخلفات ونفايات هالمكان تحرق وتتحول الى رماد ويحطونه فهالمكان ، لانه قلت لكم المكان يعتبر مقدس
وبعد يوم طويل وممتع قررنا نريح شوي وحليله هالتركي قال لنا لانكم مسلمين برخص لكم السحلب
وجفنا فهالمكان خالد ريل أسيل اللي فبرنامج هو وهي لان اسيل كانت تصور كليب فتركيا ، وبعدنا جفنا ممثلة تركية فنفس المكان..
ان شاء يكون عيبكم التقرير ، ترى عن جد هالصور نادرة ، وابا ردور تحمس عسب أنزل تقرير اسطنبول كامل..
سلامي
القصر