شحالكن خواتي ؟
مثل ما وعدتكم اني بسوي تقارير خاصة عن رحلاتنا الأوروبية صيف 2024
و تقريري اليوم عن بحيرة كونغ سي konigssee الألمانية الخلااابة ^.^
بس هالتقرير غيير لأن صديقتي AL-Doomah فديييتها كانت ويايه هي و أهلها
و قضينا أحلى اللحظات عند هالبحيرة و اتمشينا ويا بعض و استاانسنا و لنا ذكريات حلوة فيها =)
رحلتنا للبحيرة كانت بتاريخ 17 / 7 / 2024 .. و طلعنا لها من قرية زيلامسي في النمسا
اول شي قمنا الصبح من وقت و اتريقنا و اتجهزنا و فتحت الدريشة اشوف هالمنظر الحلو
و بعدين اتحركنا من زيلامسي متجهين إلى قرية سالفدين و كانت وجهتنا الزحلاقية الصيفية ^_*
و فالدرب اتصلت بي الدوومة قالتلي هاه وين بتسيرون اليوم ؟ قلتلها الزحلاقية الصيفية في سالفدين جان تقول عيل بنتلاقى هناك و بنتزحلق ويا بعض .. قلتلها تم عيل بنتجدمكم و الحقونا
بس جهاز النفقيشن اللي عندهم خوّن فيهم و ما طاع يدّخل عنوان الزحلاقية لوول و بعد محاولات فاشلة وصفتلها الدرب و قلتلها بنترياكم في الخط و اتبعونا لين الزحلاقية.. و فعلاً استوى هالشي و سرنا الزحلاقية ويا بعض و اتزحلقنا و لعبنا و استاااااانسنا
الدوومة تذكرين يوم تخوفيني في الزحلاقية و انا اصارخ ؟ هههههه شرييرة كانت وراي و تسررررع اونها بتدعمني و يوم توصل عندي مره وحده تمسك بريك قوي لوول بس ونااااسة والله .. انا ما صوّرت في الزحلاقية لني مصورتنها من قبل في تقاريري
المهم بعد ما خلصنا من الزحلاقية نحن طلعنا قبلهم لان عندهم الصغيرونه حيااتي كانت تصيح فدييتها و يتشاورون يمكن يردون الشقة ..
و نحن طالعين شفنا لوحة على الشارع حاطين عليها صورة بقرة و حليب و كتابه بالألماني و قلنا ما يبااله اكييد يبعيون حليب فررش خخخ و ردينا اندوّر وين يبيعون الحليب بس يوم حصلنا المكان قالولنا الحليب يبيعونه الصبح من غبشه على الساعة 7 و مخلص الحين ما عندهم .. و هالصور من القرية :
هذي سيارتنا المرسيدس –> الناقل الرسمي في رحلتنا
بس الدوومة سيارتكم العجيبة كانت احلى صح ؟ ههههههه كنا نعرفها من بعيييد لوول
و هنيه ركبنا السيارة و انطلقنا إلى بحيرة كونغ سي في المانيا ..
طبعاً المسافة من زيلامسي إلى بحيرة كونغ سي 78 كيلو .. يعني بحدود ساعة ونص تقريباً و كنت ارمس ويا الدومة اشوفها اذا بيسيرون ويانا ولا لا
و في النهاية قرروا انهم يلحقونا و عطيتها عنوان البحيرة و طلعنا رباعه و هالصور من الدرب :
لو تلاحظون في هالصورة الجو مغيّم مع انه الصبح يوم ظهرنا كانت الشمس طالعة ! بس سبحان الله جوهم يتغير في دقايق
و فجأه بدأت تمطّر السما علينا ونحن في الدرب !
آآآه يا حلااات المطر يغسل الرووح من الهموم =)
و زااااد المطر و ما قدرنا نسرع لأن الشوارع خطيرة بين الجبال و تأخرنا في الوصول للبحيرة ..
و استوى الدرب من ساعة ونص لين ساعتين ونص !
صح تعبنا و تأخرنا لكن المناظر كانت ترد الروووح و اجواء المطر خياالية
و للحديث بقية لني الحين بسير الجامعة عندي كلاس ^.^
تابعوني عشان تشوفون البحيرة الخلااابة و ذكرياتنا فيها ^_*
قبل ما اكمل التقرير بخبركم معلومات بسيطة عن البحيرة ^.^
بحيرة كونغ سي من أروع البحيرات الطبيعية في اقليم بافاريا / المانيا و تتميز بطبيعتها الخلاااابة و الجبال المحيطه فيها و مياهها الكريستالية الشفافة و النقية و بتلاحظون هالشي فالصور
كااانت فالماضي مصيف الزعيم النازي هتلر و هذا دليل على انها من أجمل المناطق في المانيا للراحة و الهدوء و الاسترخاء =)
البحيرة عبارة عن منتجع سياحي متكامل يحتوي على المطاعم و المحلات التذكارية و الخدمات ..
و فيها رحلات بالقوارب والسفينة اللي ياخذونكم في جولة على البحيرة مع شرح المرشد السياحي و ممكن تنزلون من القارب و تمشون على الأقدام 10 دقايق عشان توصلون للبحيرة الجبلية الرهيبه
تبعد البحيرة عن ميونخ 151 كيلو و من زيلامسي 78 كيلو و من سالزبورغ 30 كيلو .
و هنييه اول ما وصلنا في الباركنات :
و يوم دخلنا حصلنا محلات تبيع اشياء تذكارية و تيشيرتات و حلويات و هالسوالف
و طبعاً المكان ما يخلا من المطاعم الريفية البسيطة و التقليدية
و مشينا مسافة دقايق و كنا نسولف انا و الدومة فديتها لين ما طلعت لنا البحيرة الجميلة بألوانها اللي تسحر الأنظار =)
شوفوا كيف الماي شفاف و كريستالي سبحاان الله ^.^
هذا اخويه بو الاحمر و اخو الدوومة بو الرمادي .. يتناقشون في موضوع على البحيرة و اكيد عن السوني ولا الكورة ههههه
اللي تبغي معرس ترفع ايدها ترى عيالنا حلوين لوول
هذا المركب اللي ياخذكم في جولة على البحيرة
بس للأسف نحن وصلنا العصر متأخرين و كانو مسكرين و ما لحقنا على آخر رحلة يعني رااحت علينا @@
هنييه سرنا نتمشى انا و الدوومة بروحنا و نسولف على ضفاف البحيرة لوول ^.^
و كانت الاجواء رووعة و المناظر ترد الرووح .. والله ذكريات حلوة
ماشي احلى عن اليلسه في هالمطعم .. صدق يفتح النفس ^_*
و اللحظات الحلوة دووم تخلص بسرعة بس تبقى الذكريات =)
الدوومة فدييتج واايد استااانست وياج و ما بنسى هالأيام ^.^
هنييه خلاص رجعنا عندهم لأن تأخر الوقت و لازم نرجع زيلامسي قبل ما تظلم الدنيا
و هالصور من الدرب :
سبحااان الله اللون الأخضر يسحر العيون و يريح النفس و يهّدي الأعصاب 
:
:
في النهاية اتمنى التقرير ينال على اعجابكم
و دعوة طيبه منكم تكفيني ^.^
روعه الصراحه