فخاطرج تسافرين أوروبا؟ بس محتاآرة! والميزانية ما تكفي! عيل حياآج عندي

—————————————————————————————————-

شحالكن خواتي ؟

اليوم حبيت أقدملكن خدمة بمناسبة ترشيحي للإشراف

في البداية أشكر الإدارية (أم حمد) على ثقتها الغالية و ان شاء الله أكون عند حسن الظن ^_^

هالموضوع مختص في إعداد البرامج السياحية إلى أوروبا من الألف إلى الياء و بأرخص الأسعار ..

رحلات الطيران

حجوزات الفنادق

الشقق المفروشة

استئجار السيارات

رحلات القطارات

الخرائط و المسافات بين المدن

مدن و مناطق سياحية

بما ان عندي خبرة في السياحة الأوروبية و حجوزات النت قررت أساعدكن في إعداد البرامج السياحية إلى أوروبا بدون مقابل و بأسعار أرخص عن المكاتب السياحية و وكالات السفر والسياحة !!

الحجوزات من النت تطلع أرخص عن المكاتب السياحية لأنهم أكيد ياخذون عمولة و بعدين لا تنسون انهم يدفعون للإيجار و رواتب الموظفين و .. الخ و يبغون يربحون ما يشتغلون على الفاضي

و معظم المكاتب السياحية يتعاملون مع فنادق محددة لأنهم ياخذون عمولة منهم و يوم تختارين فندق خارج القائمة يرفضون و يذمونه عسب ما يخسرون ! و انا جربت هالشي شخصياً و احياناً يوم تمشين على رايهم تنصدمين بالفندق بعد ما توصلين !! لأن بعض الناس ما عندهم ذمه ولا ضمير

عسب جيه شو الحل ؟!

الحل انج تحجزين كل شي بروحج من النت و تخططين قبل السفر بفتره و تستشيرين أصحاب الخبرة =)

صدقيني ممكن الرحلة ما تكلفج ميزانية كبيرة و تقدرين توفرين واايد بس أهم شي التخطيط المبكر و على فكرة تذاكر الطيران تطلع أرخص اذا حجزتيها قبل الصيف بفتره طويله لأن سياسة شركات الطيران ان كل ما تقل عدد الكراسي في الرحلة ترتفع أسعار التذاكر ! و الفرق يكون كبير جداً ..

انا طرحت هالموضوع من الحين حق الصيف مع ان باقي 5 شهور تقريباً على الإجازة لأن العدد كبير ما شاء الله و ما اقدر اساعد الكل في فتره قصيرة و مثل ما قلت فوق الأسعار تطلع أرخص عند الحجز المبكر

انا ما اقدر أجاوب على كل الإستفسارات في نفس الوقت لأني مرتبطه بحياتي الخاصة و مشغولة في الدراسة لكن بحاول كثر ما اقدر اني أساعدكن بس السموحة ما استقبل رسائل خاصة عن هالموضوع و أي استفسار يُكتب في الموضوع و بجاوب عليه ان شاء الله
و قبل كل شي أذكركن اني مب مكلفه في هالشي و مب من مهام الإشراف بس هي خدمة شخصية مني بدون مقابل و ما ابغي الا الدعاء بالخير و التوفيق في دراستي ^_^

تحياتي للجميع