ينصحنيه بالإجهاض حسبي الله ونعم الوكيل فيه

الله يسلمكن قبل سنه .. يعني يوم كان عمريه 19 ياني واحد وخطبني .. وطبعا خطبة رسميه ..
وطبعا قبله يونيه وايدين بس ما صار نصيب ..
الموهيم .. بعد يوم الخطبه الرسميه .. نصحونيه اصلي استخاره .. صليت استخاره وارتحت كثير ..
وحتى الاحلام الي كنت احلمها كل تفسيرها خيــر ..

الي ياني واحد ع قد حاله .. يعني شوفن كل بنيه تتمنى ريلها يكون واحد ما يقصر ف حقها ..
والي ما شافته ف بيت اهلها تشوفه عندهـ ..
والريال ما يعيبه فقره ولا وظيفته .. مع انيه والله العظيم قبلها كنت اقول لو ياني واحد يداوم ف هالمكان يهبي اوافق عليه .. وحتى السياره الي عنده .. الحمدلله انا يالسه ف بيت اهليه ومخلصه ثنويه .. وظروفي ما سمحت اني اكمل بالجامعه .. بس اهليه ما قصرو خذوليه سياره .. وربي حتى السياره الي عنده .. مب قد المستوى .. وبعد ارد و اقول الريال ما بيعيبه شي .. لا سيارته ولا وظيفته .. وحتى انه مب مخلص ثنويه ..

وسبحان الله .. هالي ما كنت احبه .. موجود ف الي خطبني .. بس دامنيه صليت استخاره وارتحت .. قلت لا اعتراض ع حكمة ربيه ..
ويت الموافقه من صوبنا ..

والريال ملتزم .. عاده تعرفون من اولها قال اريدها تتنقب و تلبس قفازات و الخ ..
وهالشي من حقه .. مع انيه الحمدلله متحجبه بس ماا كنت اتنقب ..
بس شور ريلي كيف ما بطيع .. وقلنالهم ما عليه .. الحرمه لازم بتمشي ع شور ريلها ..

بعد ما طافت هالسالفه .. يوم يو يتفقون ع الزهبه تخيلو .. كم قالو يبغون يعطونا
سنه 2024 .. ف عمركم سمعتو وحده زهبتها 20 ألف .. والله ما صارت ولا استوت صح ..
بس بعد رضينا ..
يا ناس يا عالم جد سمعتو ف سنة 2024 بني آدمه زهبتها 20 ألف .. والي تقول 70 الف و 80 الف ما تسدنيه ..

لا تقولون شو الي جبرج .. بس الي الله كاتبنه صار ..
الحمدلله انا بعدنيه صغيره .. يوم انه توه عمريه 20 سنه .. والحمدلله جميله .. وهالكلمه من الكل ..
يعني ماشي يعيبنيه .. بس ماادري كيف صار جذيه ..

وحتى امايه حليلها كانت تقول الريال طيب .. يسد انه مدين .. وما بيظلمج ..
ودامه يخاف من ربه .. ما بيقصر عليج بعدين .. حليله الا توه من سنه مداوم ..
ويبغي يكمل دينه ..

وطبعا ف الزهبه .. ربيعاتيه واختيه وامايه .. ما قصرن ..
لين يا يوم الملجه .. طبعا قبلها … كل شي هم فصلو وانا لبست .. يعني الفستان والمكياج والمسكه ..
كل شي كل شي كان من اختيار اهله .. وانا رضيت ولا رمست ..

وبعد كانت الملجه ف بيتهم .. من اولها لا تعزمون وايدين والله ما بيسد المكان والاكل ع عدد الاشخاص .. وربي الحفله بكبرها من اهلهم ..
قليل الي كانو من اهليه .. ما فينا ع الفضايح .. عمرها ما كانت العزايم عندنا جذيه ..
عيل تخيلن حفلة ملجة يتشرطن ع عدد الاكل و الخ ..
بس بعد قلنا ما عليه .. الله كريم .. هذا كله مب مهم ..

وطبعا عقب سنه كان العرس .. يعني شهر واحد .. مع انه والله عندنا الملجه ما تطول اكثر من 4 شهور ..
بعد سكتنا .. الريال توه ف دربه .. يبغي ايمع لي العرس ..

خلوني اقولكم عن ايام الملجه .. والله عمريه ما ظهرت معاه السوق ..
ولا جد قاليه تعالي بوديج .. ولا انيه من المستحى طلبت منه ..
والله العظيم وربي شاهد عليه .. انيه ما كنت اطلب منه حايه ..
واذا طلبت بالكثير كنت اقوله هاتليه من ماكدونلز ولا باسكن ..
ومن المذهب انه لو يابلي لازم اييب للي معايه ف البيت .. يعني تخيلو ريال بطول وبعرض ..
يايب وجبه لحرمته بـ 18 درهم وما قدر اييب لاخوانها الصغار ..
والله اني ما ابالغ .. ساعات من الفضيحه من خواتيه .. مااحب اطلب منه .. لانه ماا اييب الا وحده ..
خواتي يتمن يعايبن ريلج .. بخيل .. عنبو ما يروم يشتري ..
ويوم اعور ويهه و اقوله .. يقوليه عطيني فلوس انا ما عنديه .. تخيلين يعني انا و2 خواتي .. معقوله هالكثر ما كان عنده فلوس .. ع ابسط شي يقوليه فلانه انا ورايه عرس .. لا تطلبين منيه ..
مع انيه قسم بالله غير الماكدونالز والاسكريم ما طلبت منه ..

تخيلو يعني سنه كامله وانا مالجه .. ما فصل ليه الا عباتين وشراليه نقاب ..
وعاد والعبي .. ساده قوم بـ 200 درهم .. وانا عند اهليه والله ما جد فصلت اقل من 800 و 900 وانتن ادرى بسعر العبي ..

ويغااااااااااااااااااار غيره الله لا يراويكن .. والله ما ابالغ ان قلت الكن يغار عليه من ابوه ..
يعني سنه كامله وانا مالجه .. ما جد سلمت ع ابوه ايد بـ بيد ولا حبيت راسه ..
لا وبعد يخليني اتغشى يدامه .. ولو ما تغشيت لازم اتحجب عدل ولا شعره ظاهره ..

و فـ السياره فليل ما في حد ف الشارع .. فاضي .. انا هو والليتات .. لا بعد اتنقبي ..
قسم بالله عنديه ضيق تنفس .. مااقدر بالمره اتنصخ .. وبعد عشانه اتنقبت ..
ويحب انيه اكون معاه شرات العيوز .. لا تتحركين .. لا تتلفتين .. والله بس يوم اصد واشوف السياره الي حذالنا .. يعصب .. وعادي يتواقع معايه .. لدرجه خلاص يطقع جويه و ارد البيت ..
كل ما اظهر وياه ع الحاله .. خلاص لدرجه انيه تعقدت منه .. اكره انيه اظهر معاه ..
وعصبــــــــــــــــــــــــــــــــــــي درجه أولى .. ع اتفه الاسباب .. يعصب ويصارخ ويكسر تلفونه ..

وفوق هاا كله .. اهم شي عنده كشخته .. لا تستغربون .. صح ملتزم .. يوم تشوفون واحد مربي لحيه ..
يكون شكله مبهدل .. لحيه طويله .. وكندوره قصيره وو الخ .. بس هو لا ..
لكشخته .. وربي اغلى الماركات ..

وبعد قلت ما عليه .. شو اسوي هاا نصيبي .. خلنيه بعدين بستانس معاه ..
لين يا يوم العرس .. تخيلو .. من الساعه 6 وانا ف الغرفه الي ف الصاله ..
طافت نص ساعه وساعه لين ما يت اخته .. وتخبرتها عن امها .. الي هيه عمتي ..
قالت موجوده .. قلت يوم انه موجوده ليش ما يت عنديه ..
واخته صغيره .. قلت شكلها ما تدري .. بعد ما خواتي دخلن عنديه ..
قلت الهن عمتيه موجوده .. قالن موجوده .. وانا روحيه مستغربه .. ليش ما يتني الغرفه ..
العاده العمه اتي .. اتشوف حرمة ولدها .. تبخرها .. بس والله انيه ما شفتها لين ما يت الساعه 11 الا ربع ظهرونيه خواتي من الغرفه ع الكوشه .. تميت يالسه لين ما شرف المعرس ..

ومن العادات والتقاليد والمذهب والسنه .. والذوق والادب .. انه ما يدخل المعرس الا معاه ريال من اهل العروس .. بس الحبيب دخل هو وابوه واخوانه ..
بتقولون وين اخوانج وابوج .. ابويه الله يرحمه متوفي ..

واخواني صغار .. يعني اكبرهم عمره 17 .. بس بعد ريال .. يعني ما يدخل القاعه الا واحد من خوانيه وياه ..
واخويه ما عنده موتر طبعا لانه صغير .. يعني المفروض .. من الادب والذوق انه يشله .. او يشلهم .. لانهم 2 بس .. يعني مب عشر ما بيقدر يركبهم وياه بالسياره ..
وفوق هاا بعد اخويه اتصلبه اتريه لا تتدخل لين ما اوصل انا .. ويوم ياي مع ربيعه ..
وذاك اليوم اليمعه .. والدرب زحمه ..

تخيلو الضيج الي يانيه .. ما شفت اخواني وياه .. وامه ابد ما شفتها .. والله لدرجه انيه قلت هاذي مب موجوده ف العرس ..

وبعد ما دخل ويا سلم عليه .. وروحو اخوانه .. ع فكره .. ابوه كان واقف حذاله ولا سلم عليه ..
سبحان الله .. لا تستغربون .. قسم بالله هاذا الي صار بالحرف الواحد ..

وعقب شرفت حضرت جنابها امه .. يت لا وبعد اول شي سلمت ع ولدها .. وخلاف سلمت عليه ..
وطبعا الصوره الجماعيه ..
لا تنسون لا اميه كانت موجوده ولا خواتي .. ترانيه ما عنديه الا 2 بنات و 2 اولاد .. ماما حليلها برع القاعه تتريه اخوانيه ..
تحاتيهم ليش تأخرو ..

وقسم بالله ما حشم ودخل وما دخل اخوانيه معاه .. اسميها ماما بعد ما وصلو اخواني .. يت لين الكوشه وعصبت عليه ..
بذمتكم من حقها ولا مب من حقها .. ؟
يعني انا ابويه مش موجود .. الله يرحمه .. المفروض لو اخوانك وابوك ما دخلو .. تدخل اخواني معاك ..

ومن زفونا و خلاص دخلنا الحجره الي ف الصاله .. طوالي ما مرن دقايق وعصب عليه ..
اونه زين الي سوته امج ..
والله من حقها .. وانا اقول من حقها ..
اووف قسم بالله ماكان عرس .. أرف ف أرف .. وربي ما استانست ابد ..
لين ما ظهرنا ورحنا الفندق .. وطافت هالليله ..
وطبعا الصباحيه ييت عند اهليه ..
ورحنا عند اهله ..

وتخيلو من اليوم الثاني .. ياي حضرت جنابه وهو كان منزلنيه عند اميه ..
يانيه بيت قوم اميه و شكله مضايج الف .. تقولون جبل احد ع راسه من الضيج الي فيه ..
تخبرته شو فيك وشو صاير ..
قاليه والله فلانه انا مااحب حد يرمس عنج .. قلت له ومنو رمس عنيه .. قاليه ترى امايه زعلانه وشاله بخاطرها عليج وقلت له ليش ان شاء الله .. قاليه يعني شوفو السخافه ..
ليش ما بستي راسها يوم العرس ..
يعني هيه الي حليها فرحتني وايد .. 24 ساعه كانت معايه ما فارقتني ..
قاليه الحينه يوم بتردين البيت بوسيها ع راسها واعتذري منها ..
وبعد سويت الي يباه .. مع انه والله العظيم انا مب قصدي مااابوسها ع راسها .. بس لانه امه صغيره .. وشبابيه .. من جذيه انا من ايام الملجه ما قد بستها ع راسها .. بس خدها ..
تبون تتخبرونيه عن شهر العسل .. فديتكن انا ما سافرت .. اكيد ما استغربتنن .. ما عنده حليله فلوس ..
شهر العسل ماليه كان ف البلاد وبعد تبغون تعرفون وين ..

ما خله بقعه ف البلاد وما ودانيه وبيتني هناك .هههههههه .. ادري ما بتصدقن ..
والله انيه ما سرت الا المبزره وبت ف الشاليه يوم واحد بس .. والله يوم واحد .. واخته واختيه كانو معايه ..
هيه هذا شهر عسل ..
والله مااقص عليكن هاذا كان شهر العسل ماليه .. بعد رضيت .. اخر الشهر .. وريلي ما عنده فلوس ..
بعد عشانه .. مااريد اضغط عليه ..

لين ما طاف اسبوع .. وطبعا اول يوم الخطبه قال لاهليه انا بسكنها ف شقه روحها ..
وبعد فتره يانيه وقاليه انه الدوام هو الي كان بيدفع بس كنسلو هالقرار .. وبعد ما بنى ف بيتهم ..
يانيه وقاليه انا ترانيه بديت البنى .. ع اساس انه ملحق .. وبعد ما خلص ورحت شفت ..
الا هيه غرفة وحده بس .. وحمام تقولون ققص حمام .. بس الحمدلله .. رضيت .. وربيه ما قلت له شي ..

والاسبوع الثاني من العرس .. يانيه وحالته العن من قبل .. هالمره جبل الهملايا ع راسه .. ونفس الرمسه ..
فلانه انا ماابغي اهليه يرمسون عنج .. قلت له شو صاير بعد .. والله يقولون انج يوم تشوفين امايه وابويه ما تسلمين عليهم .. قسم بالله يتني الجلطه وبعد سكت .. قلت والله اسلم عليهم .. ومنو قالك هالكلام .. قاليه سمعت وبس ..

وف الاسبوع الرابع .. اكشتفت انيه حامل .. ليتني ما حملت .. ولا مت ذاك اليوم ..
امايه الصبح يت شلتني عسب توديني العياده .. لانه بطني يعورني وانا ما كنت ادري انيه حامل ..
الموهيم ماما حليها روحها كانت برع البيت ومشغوله ومن اتصلت بها يتني طيران ..
وانا نشيت من العيله اللهم تسبحت وتلبست وظهرت .. يعني بس الفراش انا ما عدلته ..
واختيه كانت تبغي تشغل ليتات الغرفه .. لين ما انا اخلص ..
وتلبست وظهرت معاهم .. لانه عمتيه بعدها راقده و ريلي ف الدوام ..

الموهيم عقب نص ساعه اتصلبي ريلي محتشر ويصارخ وحالته لله وتقولون حد صارق حلاله ..
قلت له شو مستوي خير .. قاليه انتي ظاهره من الحجره ومب مبنده الليتات الي برع ..
يعني شوفو كل هالصريخ لانيه مب مبنده الليتات .. يعني شو صار حصل خير .. يعني انتو عندكم بدال البشكاره 2 .. شو بيصير لو البشاكير بندن الليتات ..
وطبعا اختيه هيه الي بالغلط شغلت الليتات .. وفلم هندي عسبت الليتات مبطله .. هالمره ما قدرت اسكت عنه .. تميت انا بعد اصارخ .. يااخي شو صار حصل خير .. روحو بندو الليتات وخلاص ..

الموهيم وعقب كمن يوم كانو مسوين عزيمه .. واهله ف بيتهم .. يعني انا وين بيكون مكانيه .. ويه الحريم .. بنات عمته وحريم عيال عمته وعماته .. بس تبغون تعرفون وين كنت انا .. ف حجرت اخته الصغيره ويه اليهالو الي اعمارهم تحت الـ 10 .. ما تصدقون ..؟! والله صدقو .. قسم بالله صدري انكتم .. ابغي اظهر اروح حجرتيه مااقدر اتنصخ .. وانا ليش ما ظهرت عند الحريم .. لانه الشباب الي من اهلم كلهم برع .. وياهم ف الصاله .. وهو طبعا والاكيد ما يرضى انه عيال عمته والخ يشوفونيه ..
وبنت عمته كانت تقوليه ما عليج منه سويله طاف وتعالي ..

الموهيم انا ما قدرت اتحمل .. تخيلو شو سويت .. عفدت من الدريشه .. لا تنسون انا حامل .. بس عسب اسير حجرتيه .. ماشي هالحل كيف اظهر من الحجره .. وحليلهم اليهال كلهم يو معايه ..

ويلسنا ف حجرتيه والباب مبطل .. وطلبتلهم من الدكان سوالف جبس وحلاوه وكاكاو .. ويلسو كلهم عندي تمو ياكلون عنديه وجذيه .. واختيه واخته كانو ع شبريتي وخربو الفراش .. عفسوه .. واليهال الجبس والكاكاو ع الزوليه .. وانا لانيه عفدت بطني يعورني .. زقرت ريلي قلت له .. تعالي ودنيه عند اميه .. بطني يعورني ..
وقبل لا اظهر .. قلت لاخته ..فلانه حبيبتي خربتي الفراش بليز رتبي ترانيه بظهر وبطني وظهري يعورنيه ما ااروم اوخي .. وقلت لليهال شلو القراطيس مال الجبس والكاكو وعقوه ف الزباله .. تكرمون .. وظهرت ورديت بيت اميه ..

الموهيم وبنفس اليوم انا بت ف بيت اميه .. ويانيه ريلي اليوم الي عقبه .. بس هالمره .. شايل كل جبال العالم ع راسه ..
قلت هالمره مستحيل تكون مشكله .. اكيد حد متوفي عندهم .. قلت له شو السالفه شو صاير .. قاليه اميه تقوليه .. ظهرو من البيت .. اميه راغتنيه .. تخيلو ..
قلت له ليش شو صار .. قاليه لانج قلتي عند اليهال انا ما بنظف الحجره وازقرو البشكاره .. وع فكره حزتها ريلي كان موجود ف الحجره .. وانا والله ما قلت هالكلام .. شرات ما كتبت فوق .. قلت لليهال ..
قلت له منو قايل للبشاكير .. عقبها قاليه لا انا الي قلت للبشاكير واميه سمعتنيه وعصبت عليه ..
وقالتله اظهر من البيت .. انته مب ريال .. انته ما تخلي حرمتك تسويلك شي ..
لا تغسل ملابسك ولا تطبخ لك ولا شي .. ياناس يا عالم وين اطبخ يوم انه انا ما عنديه مطبخ .. كيف اغسل وانا حمامي صندقه ..
ومضايج وحالته لله .. وقاليه خلاص فلانه لا تردين البيت .. وخلج ف بيت امج خلاص انا مضايج ما بروح هناك .. ملاحظه هامه .. بيتهم فيلا وبيتنا بيت عربي عادي ..
بس عندنا حجره ف البيت محد ييلس فيها .. قاليه قولي لامج انيه بعدل الحجره وبنيلس فيها ..
وتم يحن عليه بهالسالفه ..
وبنفسه قاليه انا ما برد بيتنا و اميه ما تبانيه ..
الموهيم انا اليوم الي عقبه وديت اختيه بوظبي عسبت حايه لها هناك .. وهالليله انا بت هناك .. وهو بات عندنا ف بيتنا ويا اخواني مع انيه ما كنت موجودهـ ..

بس انا وايد اتضايجت من هالسالفه .. مع انه عمتيه ما يت عنديه وقالت ليه هالكلام .. بس انا مااحب جذيه .. وانا فيه طبع انيه مااحب اشوف ويه الي مضايجنيه .. وعقبها بـ 3 ايام رديت وياه البيت ..
وقبل لا ارد قاليه سوي عمرج عاديه وان شفتي اميه سلمي عليها وحبيها ع راسها .. وانا رديت عليه وادري اني كلامي غلط .. قلت له ليش فديتك انا تونيه راده من الحج ولا اليوم العيد يعني عسب احبها ع راسها .. عنبو انا بالـ 3 ايام برع البيت هيه ولا اتصلت تتخبر عنيه .. وزين يوم انيه رديت ولا شفتها ..

وطبعا تعرفون اول اسابيع الحمل .. قسم بالله تعب تعب .. الوحده محتايه امها وياها .. تكون وياها ..
ولا لو مب امها حد يداري عليها ..

وانا تميت بيت اهليه .. يمكن مال 3 ايام .. ومن عقبها قلت له .. خلاص ظهرنيه سكنيه ف بيت روحيه .. انا ماابغي ارد هناك .. انا مب مستانسه ولا مرتاحه .. وكفايه انيه مب ماخذه راحتيه .. وكل يوم ظاهرين عليه سالفه .. من حقي ولا مب من حقي .. يعني انا ما طلبت شي منه .. من يوم ما ملجت كل ما قلت له شي قاليه فلانه ورايه مصاريف العرس ومن عرست اسمع منه ورايه ديون العرس ورايه ديون العرس .. ياااخي عيل انا لو الحينه ما استانست متى اظهر متى استانس .. ؟
متى بعيش شبابي مع ريلي ..
والله انا ما كنت بطلب منه انه يسكنيه ف بيت روحيه الا بعد ما صارت هالمشاكل ..
شو اسوي .. تعبت قسم بالله ما كملت شهر عندهم وكل يوم عافديلي بسالفه يديده .. قسم بالله تعبت نفسيا .. بتقولون عادي وبسطيه .. يااخي انا ابد ما استانست .. خلاص يا تسكنيه ف بيت روحيه ..
انا ماكنت زعلانه منه ولا شياته .. بس قلت له .. سكنيه ف بيت روحيه .. وهو شو يقول قاليه انا ما اقدر .. معاشي ما بيسد وورايه ديون .. انا شو طلبت منه و هو قدر عليه .. انا شو ذنبي ف ديون العرس .. يااخي لو هو كان مزوج عشر غيريه كان بيسوي نفس الشي .. يعني انا ماليه ذنب وهاذا وانا ما طلبت منه شي ..
قلت له عيل ما عليه .. انا بتم ف بيت اهليه ف هالحجره لي كان يقوليه عنها ومتى ما بغيتني تعالي ولين مااربي يعني عقب 9 شهور سكنيه ف بيت روحيه ..
قاليه خلاص اوكيه .. يومين تمي عند امج ويوم ف بيتنا .. قلت له اوكيه .. وبعدها يتنيه بعد رمسه انه عمتيه ترمس من ورايه .. تقول هاذي ماادري شو عندها كل يوم طايحه بيت اهلها .. يااخي تدرين انا حامل ابغي حد يداري عليه بعدنيه صغيره .. انتي عنبو حتى كلمه مبروك ما سمعت لا منج ولا من عميه ..
بعد هاا كله قولو من حقي اطلب انيه اسكن ف بيت روحيه ولا ..؟

الموهيم الحبيب الزوج الغالي العزيز شو سوى .. راح ورمس اخويه .. اخويه الي من ابويه ..
الي يعني اميه مب امه ..
احيد الي بين الحرمه والريال يتم بين الحرمه والريال ما يظهر وهاي كانت رمسته ..
وطبعا تدرون اكثر الاخوان الي تكون علاقتهم من الابو .. دوم بينهم مشاكل .. وحنا علاقتنا مب عدله ف اخويه ..
الموهيم هذا زاد الطين بله .. وريلي الله يسامحه يعني لو نيتك تقوليه انيه زعلانه وتبغي تراضيني .. يعني تخيلو لدرجه انه قاله هاذي من عرسنا ما يابتليه قلاص ماي .. كيف اييب لك ماي وانته حاط كارتون الماي ف الغرفه والثلاجه الصغيره موجوده وفيها الماي .. وانا رديت عليه .. واخويه تم يسب وانتي شو تتحرين عمرج شيخه اونج تبغين بيت روحج ..
اهنيه انا عصبت لدرجه فضييييييييييييييييييييعه … خلاص لو سالفت عناد انا حقيه ما بتنازل عنه ..