والصلاة والسلام على أشرف المرسلين نبينا و حبيبنا محمد ( صلى الله عليه وسلم ) أما بعد .
إن شاء الله أنا راح أبدأ بهالنصايح ومن عقب موضوعي أبغيكن خواتي تكتبن مواضيع مفيدة للجميع وراح تكون في ميزان حسناتكن بإذن الله وراح نتشاور ونقدم لبعض أفضل النصايح و اللآراء لأنكن كلكن راعيات بيوت و عندكن خبرة في الحياة الزوجية و ما بتبخلن على خواتكن العضوات .
واسموحوا لي عاموضوع المتواضع .
( النصيحة الأولى )
ما يطلع زوجج من البيت إلا وهو متريق من إيدج و لو مب كل يوم ، يوم إنتي ويوم الخدامة عسب ما يحس إنج مهملتنه من ناحية الريوق .
( النصيحة الثانية )
حاولي قدر الإمكان إنج إنتي إلي تستقبلين بو عيالج عند الباب وطبعا بإبتسامه حلوة عسب يروح عنه التعب لي شاف إبتسامتج .
( النصيحة الثالثة )
خلي الغدا دايما من طبخج و بدعي لحبيبج من فترة لفترة و ما تطبخ الخدامة إلا إذا كنتي برع البيت و بتتأخرين .
( النصيحة الرابعة )
خلج دايما نظيفة و كاشخة وغيري طريقة لبسج و اختاري دايما الألوان إلي ما لابستنها عسب تلفتين إنتباهه .
(النصيحة الخامسة )
حاولي دايما ترقدين عيالج قبل حتى تكونين متفرغة لحبج .
( النصيحة السادسة )
أهل ريلج دايما بيني له إنهم غالين عندج وغلاهم من غلاه و تودديلهم واعزميهم وزوريهم دايما .
( النصيحة السابعة )
دايما نادي بو عيالج بكلمات مختلفه لتجديد الحب ( حبي – حياتي – فديت قلبك – روحي – عمري ………..) .
( النصيحة الثامنة )
طرشي له مسجات و هو في الدوام تذكرينه بحبج و شوقج له ، وحتى إذا طرشتيله مسج تبين شي أكتبيله كلمات حلوة مثل ( حبي ما عليك أمر ممكن تاخذ لنا خبز وأنت ياي من الصلاة – فديت روحك غناتي بنتعبك شوي بس اليهال في خاطرهم يطلعون اليوم …………………)
النصييحة التاسعة )
يا خواتي الحبيبات لا تصدقون المسلسلا ت أبدا لأنها تحمل أفكار هدامة تهدم الحياة الزوجية و ابتعدي عنها و لاتخلين ريلج يشوفها أبد .
( النصيحة العاشرة )
أبد لا تخلين بو عيالج يرقد وهو زعلان ولا معصب عليج و دايما بادري بالإعتذار من حبيب قلبج .
أتريا نصايحكم و مواضيعكم
والله يوفقنا جميعا لما فيه الخير والصلاح
جعله الله في ميزان حسناتج
تقبلي مروري..
^^