~~ من بريد المشكلات ~~

المشكله:

انا اشتغل في شركة خاصه من سنتين .. ومدير القسم اللي اشتغل فيه واللي هو مديري غير مسلم و غير عربي ..

وهو من النوع الفري وايد .. يعني عادي يلزق عدالي و عادي اذا لمس ايدي .. وها يسويه من غير قصد .. يعني يوم اكون ماسكه القلم وهو يبا القلم ياخذه من ايدي بداعي ان مستعجل و من هالحركات ..او اذا يبا ورقه او اسلمه اوراق دوم يحاول ان يلمس ايدي ..

انا ما خبرت ريلي عن حركاته .. لان ما يهمني اصلا .. وما حبيت اخرب على عمري واخبر ريلي وبعدين بيقولي قدمي استقالتج وايلسي في البيت لين ما تحصلين شغل ثاني ..

انا وايد احب شغلي ومرتاحه منه واااايد .. بس المدير هو اللي مسويلي ازمه نفسيه .. واقول في خاطري دام اني مرتاحه في شغلي خلاني اتغاضى عن هالشي ..

المهم .. مرت الايام على هالحال وانا ساكته ولا اشتكي لاحد .. الين ما ستوى موقف من اسبوعين تقريبا ..

كنت موديه صور لي في عرس وحده من الاهل .. والصور ما خذتنهم لان ربيعاتي يبون يشوفون الصور ..

وهاك اليوم وديت الصور الدوام والبنات شافن الصور .. وبعدين حطيت الصور على مكتبي ..

ونسيت ادخلهم في الشنطه ..((((وها الغلط اللي سويته )))

وكنت مشغوله واااايد هاك اليوم .. وكنت ابا اودي اوراق لقسم ثاني .. وقمت عن مكتبي وسرت القسم الثاني ..

ولما رديت المكتب .. شفت مديري يمشي وراي لين ما وصلت المكتب .. ويلست عالمكتب ومشغوله و ما انتبهت عالصور .. ولما مديري وقف عدال مكتبي (( الصور كانوا داخل غلاف مثل الكتاب )) يعني اذا فتحتي الغلاف بتشوفين الصور .. وما انتبهت عالمدير يوم فتح الغلاف وشاف اول صوره … وان اما انتبهت ان كان يطالع الصور الا لما قال اووووه اس ثات يو ((( يعني اوووه هاي انتي ))) وفجأه انا طالعته وقلتله بليز اتز نوت الود تو يو تو سي ماي بكجرز (( يعني منو سمحلج تطالع صوري)) قالي اوه سوري …

وبس انا خذت الصور ودخلتهم الشنطه <<< بعد شو يا حسره

وبعدين كل ما اسير مكتبه يخز فيني ويطالعني من فوق لين تحت .. والمشكله ان يقولي والله انتي وايييييد حلوه .. انتوا ليش مغطيين هالجمال كله .. والطامه الكبرى يوم قالي ((( يور هاسبن اس فيري لاكي تو هاف بيوتفل وايف لايك يو))) يعني اكيد ريلج محضوض ان عنده حرمه حلوه مثلج …

قسما بالله طنشت السالفه وفيني غصه .. ما روم اتكلم واشتكي لاحد .. لو خبرت ريلي والله لا يكفخني ويقولي ليش تودين صورج الدوام ..

سكت يوم يومين ثلاث .. وكل ما احاول انسى الموضوع .. ايني المدير يذكرني في السالفه .. يوم يدق علي عالمكتب يقولي هاي بيوتفل ليدي .. ((( هلا بالحلوه )))

افففففففففففففف واللي يقهر اكثر واكثر .. المدير كان بيسافر بلاده .. وقبل السفر بكمن يوم قالي (( ابا اشوف صورج مره ثانيه .. دام اني شفتهم خلاص خليني اشوفهم مره ثانيه …. وانا الغبيه اقوله اوكي .. بنات والله ما اباكم تعصبون مني .. والله هاي كانت ردة فعل سريعه والله ما توقعت ان بيطلب من هالطلب .. وانا لاني تفاجات من سؤاله فرديت بهالرد الغريب … وثاني يوم يقولي وين الصور وانا اقوله اوووه نسيت الصور بكره بييبهم .. وقلت يمكن بيحس على دمه وبيقول اكيد ما تباني اشوف الصور … بس ثاني يوم يسالني نفس السؤال وانا ارد و اقوله اني نسيت الصور ..

يقولي انتي اكيد ما تبي اتيبين الصور لي .. صح ؟؟ بس انا ابا اشوف الصور قبل لا اسافر .. وانا اقوله اوكي ..

بناااااااااااااااات بليز شو اسوي ما قدر اخبر حد عن موضوعي لريلي ولا لأحد من اهلي لاني ما ابا اخسر شغلي ..

شو اسوي ؟؟ ساعدوني