اشحالكم خواتي ^^
بليز ساعدوني لأنه طفح الكيل و أحس دمي يفوووور وأعصابي ما أقدر اتحكم فيها ^^
ولدي فديته كي جي 1 وعمره 3 سنوات و 5 شهور ^^
الله يحفظه هو وايد حركي يعني ما يقر في مكان كله يفتر شرق وغرب خخخ
المهم في المدرسه اشتكت معلمته انه عاض طالب الاسبوع اللي طاف ورحت ورمست وياها وتناقشنا وحسيتها بصراحه بارده ويلست عاد تتشكى ولدج كله يضارب وفوضوي قلت لها ولدي ما عمري شفته يعض في البيت مع انه عندنا عيال عمه ويانا في نفس البيت ويلعبون صح يتضاربون بس ضرابه عاديه و العض موول ما يعض و قالت امبلا هو و معاه ربيعه الثاني مشاغب فقلت اكيد ولدي شاف هاك وقام يقلد .. مب هذا المهم قلت لها لازم تعاقبينه يوم يغلط علشان ما يكرر غلطته ويعرف انه يوم يغلط بيتعاقب فقالت لااا حرااام هذيل يهال وما يفهمون انتوا حاولوا تكلمونه في البيت !! انزين شو الفايده انا اكلم ويصطلب يوم ويرجع اليوم الثاني لنفس الطبع ؟؟
ليش جدامي ما يضارب ولا يعض ولا شي وهناك على كلامه حسيت ولدي زومبي خخخ يعني مب مخلي حد في حاله لدرجه انها هي شخصيا مب قادره تسيطر عليه ؟؟؟
و أحين بعد طلعت لي المشرفه بنفس السالفه ولدج يضارب في الباص ويعض اليهال وانا أخاف حد يشتكي علينا بسببه ؟؟؟ قلت لها مب قادره تسيطرين على واحد ؟؟ قعديه احذالج وانتهى الموضوع تقول انزين اقعده في الكرسي اللي صوبي ويرجع يقوم ويسير يضارب ؟؟
قلت لها عصبي عليه ولو اضطريتي تضربينه على الخفيف اضربي المهم انج تسيطرين عليهم لانه اكيد مسؤوليه …
المهم انا بصراحه طفرت من الشكاوي .. والله لو تسمعونهم تقولون يشتكون على واحد عمره 10 سنوات مب 3 سنوات؟؟؟ انزين يوم هذيل مب قادرين يسيطرون على اليهال اللي عندهم ليش ما يطالبون بمساعدات ؟؟ و بعدين ليش ما يكون في ناس متخصصين يعرفون كيف يتعاملون مع الأطفال يعني على الاقل يعطوا هالمدرسات دورات في طرق التعامل مع مثل هالأطفال المشاغبين …
والله صدعولي براسي عنبو كل يومين بنط المدرسه حق شكاويهم ؟؟ بروحي حالتي الصحيه سيئه و ما أقدر أسير وأرد .. يخلون دمي يفور وبروحي عندي القولون العصبي و مب ناقصه عصبيه زياده .. ويغمظني ولدي من يرجع من المدرسه بدل ما استقبله بالأحضان وابتسامه تشق الويه استقبله بهزاب ونزاعه وصريخ وليش سويت جي وليش ضرب فلان وليش تشاغب وليش وليش وليش ؟؟؟
ولدي كان في حضانه قبل وفي بدايته كان نفس الشي يضارب ويعض لكن لأنهم ناس متخصصين عرفوا كيف يسيطرون على الوضع وكيف يخلونه يودر طبعه كان عندهم نوتي كورنير اللي يشاغب يوقفونه فيه 5 او 10 دقايق و بعد فتره بسيطه خلاص الحمدالله صار تمام التمام وبطل طبع الضرابه والمشاكل و كانوا يقولولي عن ولدي و هم يتولون حل المشكله هذيل لا يبوني انا احل المشكله بروحي مع اني قلت للمعلمه اتبعي معاه هالأسلوب لانه فاده في الحضانه وحتى فادني في البيت يوم يسوي شي غلط قالت لااا حرام ياهل ما يتحمل !!!!
شو تبوني أسوي والله احس عمري بسير الوزاره بقولهم عن السالفه وبقولهم حطوا ناس أكفاء يعرفون كيف يتعاملون مع كل أشكال الأطفال و لازم يكون في مساعده في الصف مع المعلمه هاي مب حاله كل صغيره وكبيره حطوا البلا على راس أولياء الأمور وهم ما لهم يد في الموضوع ولا حتى يتدخلون في حل المشكله ؟؟؟
قولولي شو أسوي طفرررررررررررررررررررررررررررت …
المشاركة الأصلية كتبت بواسطة ام جوجوجو 
يعني ما شاء الله دايما هي تكافأه على حفظه للسور القرآنيه وتقول اللي يعيبني فيه انه شطور ويوم اقوله يسمعني القرآن يقوللي اياه بصوت عالي ما يستحي ..
وحتى الكلمات هو حافظ الكلمات الانجليزيه ومعانيها حافظ الحروف عربي وانجليزي يعني ما عنده مشكله دراسيه .. لو كانت المشكله دراسيه جان خليته في البيت والله من كثر شكاويهم بس هو حرام شاطر وممشي في الدراسه عسب جي محتاره معاهم …
وهو يحب معلمته وحتى يوم أسأله عنها يمدح فيها واحسها طيبه وياهم بس المشكله انها ما تقدر تسيطر عليهم ولا تعرف كيف تتعامل مع اللي يغلط كل شي تقول لااااا حرام هذا ياهل !!
المشاركة الأصلية كتبت بواسطة جريئة آمين يا رب ..
ومشكوره على مرورج حبوبه ..
ام الغالية أحس الحل الوحيد هو الميس الي تدرسه لإنه يوم يطلع من البيت انتي علاقتج معاه تتوقف فما تقدري تراقبينه , بس الميس تاخذ مسؤوليتها ,و لازم تكون قدها ,, صح نحن ماقلنا حقها عابي الولد بطريقة مش حلوة او نلي علي ضرب
بس العقاب الهادف الي يؤدي لإصلاح أكثر ما يأدي لإفساد هذا المطلوب ,, العزل لمدة قصيرة , الحرمان من لعبة مفضلة له , يسوون له طاف 5 دقايق خخخ ماعرفتها بالفصحة , أو العقوبة الي محد يحبها يكتب أنا ولد زين 100 مرة وصدقيني هذي خدعة وايد زينة للا وعي لإنه تخلي الولد يصدق نه زين,, فتعاملاته السلبية تخف بطريقة ملحوظة
وان شاء الله الميس تتفهم أكثر وإلا هي لأسف غير مؤهلة لعملها !
وربي يسهل عليج ولا تحطي فخاطرج هذي سنة الحياة 
انا مس بالكي جي شوفي اختي من خلال وجودي بالروضه في كذا طفل تصرافاته قريبه من تصرفات ولدج يعني بهالسن اغلب اليهال يكونون حركيين و يضاربون ويحبون ياخذون اغراض غيرهم
بس المشكله هنيه انه المعلمه لازم تعاقبه على تصرفاته لانه اذا ما تعاقب هوه بنظره مب مسوي شئ غلط كيف بيعرف الغلط الا من العقاب يعني مثل ما قلتي تمنعه انه يلعب لمدة ربع ساعه تحط كرسي المشاغبين او تقعده طاولة المشاغبين وتخليه بعيد عن اليهال الثانيين وتقوله يوم بتستوي شاطر بنخليك ويانا عشان نحن ما نحب المشاغبين واكيد بتتعدل تصرفاته انا عن نفسي قدرت اسيطر على تصرفاتهم من خلال العقاب المثمر يعني ما نلجا للضرب بس للعقاب اللي مافيه اذا للطفل بالعكس يكون عقاب ايجابي حتى ساعات هوه الطفل من نفسه يقول اسفه وما بعيدها مره ثانيه وفعلا الاحظ انه هالتصرف بدا ينساه ويتجنب انه يسويه مثل ما قلتي يبالهم ناس تعرف تتصرف ويا اليهال ولازم لمدرسه تودر عنها انهم يهال وحرام تعاقبهم بالعكس هذا عشان مصلحتهم لان فهالسن الطفل يكتسب العلاقات مع اللي حواليه ويتعلم يتحاسب على افعاله ويكون مسوؤل عنها لاتقول يهال ما يفهمون الا ما شاء الله يفهمون واكثر عن لكبار بعد
ان شاء الله اكون افدتج واي استفسار انا حاضره وتحملي شوي ولا تعورين براسج ترا اغلب اليهال جذيه مب بس ولدج