اشحالكم عساكم بأحسن حال
ابي مشورتكم في طريقة تحبب ولدي في اكل الفطور قبل ما يروح الروضة
عمر ولدي 3 سنوات وشهرين .. السنة دخلته الروضة وفي البداية كان يفطر في البيت على كورن فليكس مع الحليب او سندويش واحد لكن لما شاف وعرف ان بالروضة بعد في الفطور الجماعي مع باقي الاولاد والبنات … خلاص صار يرفض الاكل بالبيت ويقول لي بعد لا ماما نآكل بالروضة ويشل الاكل ويحطه بالشنطة ………
تدورن كلكم بأهمية وجبة الفطور للطالب .. تساعدهم على التركيز والانتباه .. وانا قلبي يعورني على ولدي انه من الحين تعود على عدم الفطور بالبيت معناه حتى لما يروح المدرسة بعد ما في فطور
والله اني خايفة علية وآحاتية
الله يخليكم اللي عندها طريقة او اسلوب يحبب الاطفال في وجبة الفطور الاولى اللي بالببيت لا تبخلون علي والله يجزيكم الجنة
شوفي أنا أعاني مع ولدي بعد في سالفه الفطور لكني أغصبه غصبببببببببببببببببببب عنه لازم ياكل ..
حاولي تنوعين له بالأكل الصبح وسويله شي يحبه … غيري لا تسوين كورن فليكس وسندويتج ..
مثلا مرات سويله بيض عيون يحبونه اليهال ترى بس خليها صغيرونه علشان يستانس عليها وياكلها ..
أو اسلقي له بيض الفري ( الحبارى ) تراهم صغااار وأغلب اليهال يحبونهم علشان حجمهم صغير و فايدتهم كبييره ترى ^^
سوي له تمر بالسمسم على شكل كرات .. أو تمر بالناريل مثلا .. كوريه و قلبيه بالسمسم أو الناريل يعني وخليه ياكله .. التمر مغذي حتى لو ما أكل شي ثاني ..
سويله فطاير مثلا أو نقانق أو بطاطا أو دنجو ( حمص ) أو بلاليط لو يحبه …
وطبعا كوب الحليب شي ضروووووووووووووري جدا لازم يشربه .. انتي حاولي تحفزينه بكلمات تشجيعيه قوليله مثلا بتصير بطل و بتستوي أكبر من الطلاب اللي في صفك لأنك تاكل أكثر عنهم … و امدحيه طول الوقت وهو ياكل .. وحاولي تغيري له مكان الفطور لو أمكن ..
أنا مثلا مرات أخلي ولدي يفطر في الغرفه ومرات يوم أحسه مب متقبل الأكل أشل الأكل ونروح نقعد في الحوش أنا وهو نفرش حصير و أخليه ياكل …
ومرات أقطع له فراوله أو برتقال مع وجبه الريوق .. لأنه يحبهم وأقوله يا الله خلص أكلك بسرعه علشان تاكل الفواكه قبل لا يوصل الباص و طبعا يخلص بسرعه لعيوووووووووون الفواكه بس ^^
وفعلا نحن ما نضمن اذا هم بياكلون في الروضه مثل الناس أو لا .. ترى أغلب الأطفال ياكلون لقمه أو ثنتين و خلاص … فحرام يتم طول اليوم بدون طاقه ☺
بالتوفيق والله يحفظه لج ياارب
اشكركم على آرائكم الطيبة واللي بسعى عشان حبيب عمري اسويها
جزاكم الله خير