اشحــــــــــــــــــــالكم ^_^
واخباركم ؟؟ ان شاء الله تكونون بخير
اممممم ماعرف من وين أبدأ بس بخبركم واااااايد اشيا بخاطري لازم اوصلها لكم 
بس الي اعرفه انه في مثل هذا اليوم كان المفروض يكون عرسي ^^ تاريخ 6/7/2019 
بس الحمدلله ع كل ع حال قدر الله وماشاء فعل
استوا لي حادث ماحب اذكره بس احس لازم اذكره عشان ماتعيشون معاناه الذنب الي عشتها والي اعيشها احييييييييين
تاريخ 14/6/2019 صباح الخميس صار لي حادث كنت مع الوالده انكتب لي من السماء قبل لاينزل الارض والحمدلله على كل حال اللهم لا نسألك رد القضاء ولاكن نسألك اللطف فيه
كنت طالعه مع الوالده من بيت ريلي الي مستأجرنه انظف الشقه ونرتبها عاساس انا والوالده تييب زهبتي صباح الجمعه وتبخر ملابسي وترتبهم في الشقه
الحمدلله ع كل حال الله ماراد انه يكتمل هاليوم
كنت اقول لامي قبل ماطلع من الشقه يمه ارجعي مع اختي الكبيره وانا برجع مع البشاكير بس امي حلفت يمين انه هيه ترجع معايه والبشاكير يرجعن مع اختي الكبيره
وفعلا امي رجعت معاي وبمناقشه حاده مع امي في السيارة انا الله يهديني والله يسامحني احس كل ماقرب وقت العرس كل ماكنت انضغط اكثر واكثر فكان جوي ومودي كله عصبيه لاسباب كثيييييييييييييييره
اولا : كان حزه امتحانات للكليه ووايد نفسيتي ارففففف منهم والحمدلله ع كل حال يافرحه ماتمت تخرجت الاحد وصباح الخميس سويت الحادث
ثانيا: تجهيزات الشقه من الف الى الياء والزهبه والحشره وغلاااااااااااااااااااااء كل شييي استغفر الله تقول فلوسنا مافيها بركه كيف اطير تقول طياره استغفر الله
ثالثا: مقهوووووووره من دوامي بحكم سياستهم وعرسي فالصيف مايعطون اكثر عن اسبوعين ياجماعه انا عرووووس انزين … دوري لج واسطه عاد وذلي عمرج عاد حق الي يسوا والي مايسوا بعدددددد
كل هالعوامل اثرت فيه وفي نفسيتي لين مادخلت في نقاش حاد مع امي الله يسامحني بسس وصار الحادث الييييم
عبالي الشارع سيده ومانتبهت انه دوار ويوم قربت منه وانتبهت انه دوار درت الدوار عادي بس ع سرعتي ماقدرت اسيطر عالسياره
وانقلبنا قلبتين انا لانه لابسه حزام الامان تميت بالسياره ويالي كسر بالريل ورضوض وتشوهات وترقيع الجنب اليسار لانه يساري الدريشه
وامي الله يردها بالسلامة وتنش وتسامحني بس عالي سويتها بها والحمدلله ع كل حال
الوالده ماكانت لابسه حزام فطارت من السيارة وانضرب راسها فالشارع يالها نزيف فالمخ وترقدت فالعنايه المركزه وكسور في عده اماكن ولله الحمد ولاكن بفضل عيال زايد شيوخنا الله يطول لنا بعمارهم يتلها موافقه في خلال رابع 4 يوم الحادث انها تسافر بطياره خاصه الى المانيا
وبالفعل الوالده الحين تتلقى العلاج اللازم في المانيا ودعواااااااااااااااااااااتكم ياااااااخواتي لها لاتبخلوها ع امي دخيييييييييلكم
اللهم لا نسألك رد القضاء ولاكن نسألك اللطف فيه
طبعا مترقده انا في المستشفى واكتب لكم من على سريري هاه كلي الم وحسره اقول ياريت لو ما تناقشت هالنقاش الحاد وياريت وياريت…… استغفر الله العظيم كلمة ((لو)) من الشيطان ترا
حبيت اكتب لكم بخاطري وانصحكم بعده نصايح لوجه الله الي شفته انا ماباكم تشووووووفووووه والله
انا طلعوني من السيارة ميته اصلا بس بقدره قادر رب العالمين والصعقات الكهربائيه في الاسعاف عشت
الحمدلله في اشيااااااااااااء وااااااايد بقووولكم اياااااها واتمنا تاخذونها بجد وعبره لانه شعور ابدا مش حلو يوم الانسان يعيش انه مذنب
اتخيل اقول لو مت انا وماعشت شو سويت بحياتي؟؟؟؟؟؟؟
اتذكرت وااااااااااااااااايد
اولهم: امي فديتها الي كنت اعصب عليها مرات مسكينه بس والله مافي خاطري شي بس كنت مضغوووووووووووطه من كل شي انا احب امي والله العالم واحب التراب الي تمشي عليه بس اخر فتره لامتحانات وضغط وتجهيز عرس كنت وايد مستويه شرارة وناااار ع اي شي من كل حد اهلي ودوامي وربيعاتي حتى
ثانيا: اتذكرت الناس الي زعلانه منهم وماكنت اكلمهم عرفت انه الدنيا ماتسوا وانه كل شي وسسسسسسسسسسخ دنييييييييا نشيت ثاني يوم والله طلبت من اختي ادق لي على كل وحده ماكلمها وحتى دوامي بعد وطلبت منهم السموحه احسااااس ماينوصف كيف يوم تسمعيهم يسامحونج
ثالثا: اذا كنتي من البنات الي يسوقن حتى الشباب اذا كنتي في حاله عصبيه وضغط يفضل تقعدين وتهدين نفسيتج اقل شي 10 دقايق تستغفرين ربج بها وتشربين ماي عشان تهدا نفسيتج شوي ولا تتكلمين وتناقشين اي موضوع حاااااااد ويفضل تسمعين قران فالسيارة لانه النقاش الحاد وانتي تسوقين يأثر ع تفكيرج ويأثر ع نفسيتج ويأثر عالسواقه حتى فالله يخليكم نصيحه من اخت مجربه والله لاترمو بايديكم الى التهلكه.
رابعا: الله الله بحزام الامان لانه فعلا امان وعودي اي حد يركب معاج انه يلبس الحزام سواء تحب ولا تكره …. وهالله هالله عدم السرعه تراه الدنيا ماتسوا والله واي مكان تبينه بتوصلينه مايحتاج تقتلين عمرج بايديج ترا الفرقيه بس 10 دقايق مب اكثر ولا اقل سوقي اقل من مهلج عشان انتي تحمين نفسج وتحمين الي حوليج وماتعيشين شعور الذنب
واخيرا وليس اخرا علاقتج بربج اكييييييييييد
صلاتج
ادعيتج
قراءة قرآن
ترا هالي بتاخذينه معاج من الدنيا لا زهبه ولا شهاده ولا شقه ولا سيارة بنسحبها معانا القبر
والسموحه منكن طولت عليكن ولكن خواتي انتو حبيت انصحكن واعيشكن بمعاناتي الي اعيشها الحين
اضارب الدكاتره كل يوم بس عشان اروح والحق اشوف امي بس طبعا حالتي ماتسمح ع قوله الدكتور الحمدلله ع كل حال اقل شي 3 شهور لين مارد امشي طبيعي
دعواتكم بسسس وان شاء الله كل تأخيره فيها خيره اذا ماصار عرسي في نفس هاليوم ان شاء الله بيكون في يوم احلى واحلى هديه من رب العالمين وامي الله يشفيها ويعافيها وترد لي بصحه وسلامه يارب العالمين وتشل زهبتي وتحطها تبخرها وتحطها باديها داخل الكبت ….ياااااااااارب بقدرتك انت يا ارحم الرااااااحمين
والسمووووووووووحه منكن طولت عليكن
لاتبخلوا علينا بالدعاااااء
اللهم انت الشافي المعافي اشفي امي وجميع امة المسلمين والمؤمنين الى يوم حيييين شفاء لا سقم من بعده ياااارب العالمين
اللهم آمين .. اللهم آمين .. اللهم آمين
ربيٰ يشفيٰ لجٰ الوالدهٰ واناٰ بعدٰ تأجلٰ لكنٰ غناتيٰ
ف كلٰ تأخيرهٰ خيرهٰ ..
اللهم انت الشافي المعافي اشفي والده العمر راح
وجميع امة المسلمين والمؤمنين الى يوم حيييين شفاء
لا سقم من بعده ياااارب العالمين.
وامانهٰ غناتيٰ طمنيناٰ عالوالدهٰ فالموضوعٰ و ما بننساهاٰ بالدعاءٰ
و ربيٰ يشفيجٰ الغلاٰ و خليهاٰ عثرهٰ تقويجٰ لا حفرهٰ تضعفجٰ
ولا تندمينٰ ع شيٰ والحمداللهٰ ع كلٰ شيٰ .
اللهم انت الشافي المعافي اشفي والده العمر راح
وجميع امة المسلمين والمؤمنين الى يوم حيييين شفاء
لا سقم من بعده ياااارب العالمين.
الله يشفيج انتي والوالده وتفرح بعرسج
ويعوضج بسعاده وعرس أحلى من اللي تأجل اللهم آمين ،،
سبحان الله وبحمده … سبحان الله العظيم
الله يجزاكم خير
اللهم انت الشافي المعافي اشفي امي وجميع امة المسلمين والمؤمنين الى يوم حيييين شفاء لا سقم من بعده ياااارب العالمين
اللهم آمين .. اللهم آمين .. اللهم آمين
كل تاخيره خيره الغاليه ..
وهالحينه الفير ادعيلج من كل قلبي ان الله ييسر امورج ويرد لج امج سالمه معافيه يااارب ويشافيج ..
انسي الماضي ،، جدامج المستقبل حاولي تصلحين الامور اللي كنتي تشوفينها غلط ..
وكثري من قول "إنا لله وإنا إليه راجعون اللهم أجرني في مصيبتي واخلفني خيراً منها"
وطمنينا عن الوالده وعنج 
وان شاء الله ربي بيعووضج ف الايام الياايه وهالشئ مكتوووب لكم واهم شئ الحيينه صحتكممممممممممم ربي يشفييكم ويعافييكم ياارب