مرحبا الغاليات
حبيت اتناقش وياكم كيف كان تفكيركم قبل الزواج وبعد الزواج خاصة ان احنا عايشين فمجتمعات تقليديه
هل زادت رومانسيتج بعد الزواج مع وجود شريك حياتج 
ولا قلت ونسيتي شي اسمه رومانسيه بسبب الانشغال مع البيت والعيال
عني انا عشان التربيه التقليديه اللي عايشين فيها كنت استحي حتى افكر برومانسيه قبل الزواج هههه
مع العشره و التعود بيزيد هرمون الروماانسيه عندج
طبعا أنا كنت اتخيل وايد قبل الزواج واشياء رومانسيه نفس اللي بالأفلام والمسلسلات
ومثل ماتقولين بسبب تربيتنا وبيئتنا المحافظه مانقدر نصرح بهالامور ونتكلم فيها مع الغير
بس عقب الارتباط للمره الأولى انكسرت أحلامي من حيث الحب والاهتمام والرومانسيه وانحرمت من هالامور ،، كان في قلبي حب و رومانسيه بس شريكي مايساعد ,, وعالعموم انفصلت خلال أيام الملجه الحمدلله تعلمت وايد من تجربتي السابقه
وقلت لازم ما اتخيل وايد واعيش الأحلام الورديه 
وحاليا انا مالجه للمره الثانيه
هالمره وايد تغيرت احس ما استويت رومانسيه وعاطفيه نفس قبل واحلم واتخيل ،، أفكر بعقلي أكثر من مشاعري وبالمسئوليه و بالواقعيه
والحمدلله جي مرتاحه
يعني باختصار
رومانسيتي قلت بسبب اللي شفته ، وصرت عقلانيه أكثر ، بس مشاعر الحب والموده انا متأكده انها ما اتيي الا مع العشره والايام والحمدلله لاحظت هالشي
أيام الملجة طبعا أيام ماتتكرر ولا تنعاد، وحتى الرومانسية اللي فيها غير
لأن انكون يدّد يعني تونا فرِش تونا انعرف بعض
بعد الزواج بالنسبة لي الحمدلله الرومانسية والحب موجودين، ويقلون ويزيدون حسب الظروف والانشغال
الموضوع يعتمد عل شخصية الزوج والزوجة هل هم رومانسيين أو لا، وهل يعطون هالموضوع أهمية كبيرة بحيث يحاولون قد ما يقدرون انهم مايسمحون للأشغال اليومية انها اتأثر على الرومانسية والحب والتجديد
الأشغال وايد تاخذ من وقتنا وتحرمنا من وايد أشيا انحبها، لكن مثل ماقلت لازم نعطي هالشي أهمية كبيرة وانمارس الرومانسية في كل صغيرة وكبيرة عشان نقدر انوفق بين كذا شي
شو يعني رومانسية ترى على فكرة اسمع عنها بس لغاية الحين مب مقتنعه فيها يعني تقصدون الشعور بالراحة والسعادة والرضى
ولا لها مفهوم ثاني
انا وحده ما اهتم لاني كبرت وقبل لا اعرس كنت صغيرة يعني عيب
ولما اكبر اكثر بصير عيوز بعد عيب
هههههههههههههه اسولف اسولف
لكن ابصراحة ما احب الرومانسية احسها مياعه وقله عقل
الانسان اذا الله من عليه بالصحة والعافية
وبشريك حياة متعاون
يحمد ربه ويشكره
ياما بيوت تهدمت بسبب افكار و اوهام عن الرومانسية
الرومانسية عالم حلوووو
مب عائشة رضي الله عنها كانت تتسوك بنفس سواك الرسول صلى الله عليه وسلم وهو يحتظر.. عشان ريقها يكون في ريقه قبل ان يموت؟
توفى صلى الله عليه وسلم في حظنها
وكان صلى الله عليه وسلم يحب السيدة خديجة ويثني عليها ويظهر محبتها.. ويتأثر لذكرها… وكان وفي الها.. وحتى بعد ما اتوفت كان يكرم صديقاتها
وكانت عائشة رضي الله عنها تغار من السيدة خديجة وهي ميته
تقول السيدة عائشة:
"ما غرت على أحد من نساء النبي صلى الله عليه وسلم ما غرت على خديجة وما رأيتها ولكن كان النبي صلى الله عليه وسلم يكثر ذكرها وربما ذبح الشاة ثم يقطعها أعضاء ثم يبعثها في صدائق خديجة فربما قلت له: كأنه لم يكن في الدنيا امرأه الا خديجة؟ فيقول: (إنها كانت وكانت وكان لي منها الولد) وفي رواية مسلم عن عائشة رضي الله عنها قالت: ما غرت على نساء النبي صلى الله عليه وسلم إلا على خديجة وإني لم أدركها قالت: وكان رسول الله صلى الله عليه وسلم إذا ذبح الشاة يقول "ارسلوا بها إلى أصدقاء خديجة" قالت فأغضبته يوما فقلت خديجة فقال: "إني رزقت حبها
"
رواه مسلم
ادعو الجميع لقراءة
روضة المحبين ونزهة المشتاقين لابن قيم الجوزية
عن الحب..
في الجاهلية وفي الاسلام..
من أروع الكتب