لااااااا للاختلاط والمياعه فالدوامات!!!!

اولا وقبل كل شيء خواتي انا ملقوفه ونصيبي بعده ما ياني

بس انا بغيت اتكلم وياكم فهالموضوع واطلع هالقهر الي فيني لعل وعسى انحصل حل لها المعضله الاجتماعيه الي صارت منتشره بشكل كبير فالدوام.

والله قلبي يعورني من المناظر الي اشوفها كل يوم وافكر مع نفسي يعني هالريال الى اي مدى بيغظ بصره والى اي مدى بيتجاهل والى اي درجه هو ملتزم عسب ما تغريه هذه التفاهات وحركات البنات

والمصيبه مرات الريال فحاله والبنت الي تتحرش بطريقه مباشره او غير مباشره

والحرمه مسكينه طبعا يالسه فالبيت خبر خير

يمكن هالحرمه واثقه في ريلها واكيد الي واثقه في ريلها هو قد الثقه ان شاء الله وما بيخذلها بس في ضعفاء النفوس الي انا ما الومهم من المناظر والمواقف الي شفتها.

هالظاهره صارت منتشره بشكل فظيع فجميع الدوامات تقريبا، سواء القطاع الخاص او الحكومي

يعني بالله عليكم الوحده يايه الدوام من الصبح صابغ ويها الوان ما خلت شي ما حطته والوان فاقعه تلفت الانظار

اما العباه يا إما راصه على الجسم او واسعه و نص الايد طالعه

والمصيبه يوم ترفع ايدها تعدل الشيله الي بنص راسها ظهر باطها

والكعب الي طاخ طيخ ماتم حد ما لتفت يطالع ست الحسن والجمال الي بدورها توزع ابتسامات ببلاش

وحصريا حق الشباب طبعا

والعطور الي فايحه من مسافه بعيده

بنات بالله عليكم هذا منظر موظفه جايه تؤدي واجبها الوظيفي

والله ما اعرف شو اقولكم ؟؟؟!!! ما ادري هالنوعيه من البنات شو يدورن بالظبط وشو نواياهم

اتوقع ان البعض منكن بينتقدوني لاني تكلمت فهالموضوع بس اذا انا سكت وانتي سكتي والثانيه سكتت مصيبه منو بتتكلم والساكت عن الحق شيطان اخرس

بغيت اوجه رساله لكل وحده تتبرج فالاماكن العامه سواء المولات او الدوامات وبالاخص الدوامات لان امكانيه احتكاكها بالرياييل كبيره سواء زملائها او المراجعين اتقي الله في نفسج وفي غيرج ولاتحملي ذنوب غيرج وفكري ان يوم العقاب ما بتنفعج كشختج بل بالعكس بتكون شاهد عليج

واتمنى من كل عضوه تعرف وحده من هالنوعيه ما تترد في ان تنصحها لوجه الله تعالى ولهذا قال عليه الصلاة والسلام ((والله لأن يهدي الله بك رجلاً واحداً خير لك من حمر النعم)).

(ومعنى حمر النعم هي: الإبل الحمر، وهي أنفس أموال العرب، يضربون بها المثل في نفاسة الشيء وأنه ليس هناك أعظم منه) فتخيلي الاجر الي بتحصلينه

عندج فرصة ثمينه فلا تفوتيه عسى الله ان يهدي بج ولو وحده وتتعض من نصيحتج او من خلال الموضوع

السموحه على الاطاله

نبا نسمع من المتزوجات

ويا ليت الي عندها اي تعليق تتفضل المتزوجات والملقوفات

اتقبل كل الردود بصدر رحب

وفعلا تفااهاات وقلة احب وحياااا …