شحالكن الشيخات ؟
اليوم عندي استفسار و ان شاء الله تساعدوني ..
انا انخطبت عقبال كل البنات ويعرسون قبل العيد ان شاء الله ^_^
ناويه اسوي حفلة خطوبة لان خطيبي عنده ظروف خاصه فبتكون الملجة بعد سنة او اكثر بإذن الله
لكن ما اعرف شيء انا اكبر وحده فالبيت وانا اول وحده في العايلة تتزوج ما اعرف شيء عن حفلة الخطوبة متوتره ساعدوني و الله يحرم وجه كل من ترد علي او ترفع الموضوع عن النار آآآآآمين
1. الحين انا مادري محتارة اسوي حفلة خطوبة صغيرة بين الاهل بما انه باقي واايد عن الملجة يعني حفلة حريمية وعزومه عشا بسيطه ؟! ولا اكتفي بالخطوبة الرسمية بين الرياييل وهدفي الاشهار لان الملجة مطولة
2. ماعندي فكره شو الترتيبات والتجهيزات لحفلات الخطوبة ما صار وحضرت حفلة خطوبة قبل .. شو تسوي العروس شو مطلوب منها فهالحفلة اقصد شو فقرات الحفله او شو احداثها .. هي بتكون حفلة حريمية يعني امي وخواتي وام المعرس وخواته وفالبيت والرياييل بس ينزل لهم عشا لا معرس بيدش وولاشي ولا المفروض اني اتغطى ويدش يلبسني الدبله شو هو المتعارف عليه سااعدوني ؟
3. حفل الخطوبة تكاليفها تكون على المعرس ولا على العروس ؟ ربيعتي قالتلي ان اهل المعرس هم اللي ايبون صينية شوكليت + الدبله + العشا ؟
4. شو هو يوم الخطوبة ؟ ربيعتي قالتلي انه اليوم اللي ايون فيه الحريم عسب يشوفون البنت (طبعا انا ما اقصد النظره الشرعيه) اذا امه وخالاته وخواته شافوني بالنظره الشرعية قبل ليش يوم الخطوبة هذا هل هو ضروري ؟؟
ساعدوني خواتي الغاليات ادري فديتكن ما بتقصرون وياي ..
الي عندها خبره في الموضوع ما تخبل علي، وان شاءالله نستفيد كلنا من الموضوع
بانتظار المشاركات والسموحة 
الحفله عسب ينتشر الخبر وتتأكد الخطوبة .. مب بس رمسه .. بس اشهار للناس ان هالبنت صارت مخطوبه لفلان
ولان الملجة مطوووووووووله رغم ان نادرا مايكون في حفلة خطوبة بس لان الملجة عادة تكون عقب الخطوبة بـ اسبوعين ولا شهر
بالكثير يعني لين ما يتفقون الطرفين و بعدين يملجون و ثاني يوم تكون حفلة الملجة ..
واللي اعرفه ان اي بنت ملجتها مطوله تسوي حفل خطوبه وأي بنت عرسها مطول تسوي حفل ملجه
ودام المعرس بيكون موجود – ليش ما اتيبون المليج او المطوع او الشيخ حسب شو تسمونه و يكتب الكتاب و في نفس اليوم تسوون حفلة بسيطة تعزمون فيها اقرب الاهل و الاصحاب و خلاص
بالتوفيق
و انتي ما تعرفين شو يصير بعد سنه كيف ترضين الملجه تكون بعد سنه يمكن تسدين على عمرج باب
الصراحه ما انصحج تسوين حفله الا لما بتملجين لان وحده قريبه مني عانت من هالشي
كل مره كان يقولون والله عنده ظروف و مدري شو
و حتى لو كان الشخص هذا عن طريقج ،، لا تضحين على حساب عمرج
انا مابي اكون سلبيه بس فكري عدل اختي مووول ما ينفع هالشي غلط في غلط
ع الاقل ينكتب الكتاب
و تسوين عزيمه صغيروونه بين بيتكم و بيتهم مب لازم حفله
وايد بنات يملجون و نفس اليوم العروس تكشخ للمعرس و يكون شي عشا لبيت اهل المعرس و العروس
و الشي ما بيكلف وااايد
والله يوفقج وييسر امرج ويتمم لج ع خير حبيبتي