سامحوني كلامي مبعثر ومو مرتب بس الي احسه عطول كتبته
موضوعي هذا يمكن يكون لطلب النصيحة منكم بس اكثر هو متنفس لي اني اكتب واطلع الغضب الي فيني لان احس اذا ماطلع بالكتابة راح يطلع بشي ثان والله اعلم كيف يكون وقتها
السالفة ومافيها اني من رجعت للبلاد وانا بيني وبين عائلتي في شرار مستمر اليوم مع امي باجر مع اخوي الي بعده مع ابوي وهكذا
مب عارفة ليش ولا شو المشكلة افكاري او نصايحي لهم صارت ماتعجبهم من اتكلم الكل بيقاطعني ويدخل بموضوع ثاني باختصار حاسة اني في غابة مو في بيت !!!
أنا ماتغيرت بالعكس صرت حمدلله متفتحة اكثر صرت اتقبل النقد احب اساعد الناس احب الشغل وصرت عدوة الكسل (هلي كلهم نشيطين) صرت احاول اكون بكل الاوقات متفائلة وافسر اي شي اسمعه او ينقال لي بطريقة ايجابية احس اني مستعده للتغير والتكيف اكثر مع هلي
الي صار يمكن يكون له علاقة بهالنقطة: من رديت وانا ودي اتطوع او اشتغل بدوام صيفي لان اجازتي مطولة وللحين مالقيت اي مكان سويت مقابلات وماحد ناداني للحين والحمدلله والوقت الي بالبيت صرت اقضيه اني اتعلم الطبخ خاصة من المنتدى دوم اطلع على وصفات يديده واطبقها بالبيت لدرجه الكل مستغرب الي يقولي تطورنا والي يقولي شكله المعرس ياي والي والي بس اقولهم اذا ماتبون عادي بتم بلا شغل ولا ادش المطبخ انا اطبخ لكم عساس استغل الوقت واسوي شي حلو مافيها شي اتعلم حتى للمستقبل اطبخ لزوجي المهم يتني اراء وردود تحطيمية من الدرجه الاولى ليش مادري !!!!
حاليا اطبخ بس بمقدار قليل اني بروحي اذوق الي اطبخه والي يبا حياه الله والي مايبا حمدلله ماينفر بالزباله يكون كافي لي وقتي الثاني يكون مقسم بين القران وبين شغل البيت (الكل ملاحظ اني صرت احب اساعد بالبيت ) الي صار ان الحساسية بيني وبين ابوي صارت مش محتملة
ابوي انسان تعليمه اعدادي واجتماعي وانا بنته الوحيده بين مجموعه اولاد الي صرت اشوفه حاليا ان ماقدر اتناقش معاه نهائيا وكحل مبدائي صرت بس اسمع له من يتكلم وياي من دون مااتناقش واعلق تعليق عادي نفس الوضع مع اخوي الي اصغر مني بدا يشتغل وبعد ماكنا احنا الاثنين توائم ودوم ويابعض الحين بالمرة كله ضرابة كله ردود غريبة يعني مااقول شي الحين الا القى رد ياكلني بقشوري واتحول انا الغلطانة بطريقة او بثانية انتهت السالفة الى ان عرضو عليه وظيفه وقبل لايسوي المقابلة قلت له اذا سالوك هالسوال لاتجاوب بهالطريقة ماشوف لكم الا الولد قام طول لسانه علي انتي مسوية نفسج عريفة وانتي وانتي وانتي !!!!!!!! وانا جذي @@ الموقف هذا صار جدام الوالده الي ماقدرت حتى تقول كلمة وحده تهدي الوضع طبعا انا سكت مانطقت بحرف قلت لهم يالله عيل بالتوفيج وتصبحون على خير ورحت لغرفتي صليت قيام الليل وقريتلي قران ورقدت هذا اخوي اصغر عني بسنة وماكمل دراسة دايما اشوف ان من واجبي اني انصحه واحبه اكثر عن باجي اخواني
قبل كنت اقرى سوالف وقصص ناس تكره عائلاتها بس ماكنت اصدق بس الحين انا ما اكره عائلتي بس ماحب الحين اتكلم وياهم يعني نيلس نسولف ونشوف تليفزيون وانا هادية لان تعبت احس ان الكل صار عنده موقف او صورة عني سلبية !!! تكلمت مع امي اليوم عن موقف البارح جان تقولي انتي الغلطانة انتي تعرفين ان الولد عصبي ورحتي تزيدي عليه وعلي انا 
انا هني خلاص قلتلها السموحه منج امي بس انا اشوف الكل ماقام يطيق مني شي ماعلقت علي وسكتت وانا سكت ومن الصبح للحين وانا ماتكلم الا اذا انسالت اجاب وعادي جنه مافيني شي بس احس خلاص لازم اسكت وماكون شي بهالبيت
ومن صرت اقول لصديقاتي عن الموضوع لقيت ان جوابهن واحد ادعي ان الله يرزقج بالريل وتفتكي وتبتعدي عن البيت وعن المشاكل !!! الحين يوم اتمشكل بالبيت الحل يكون بالزواج بالله عليكم ؟؟؟؟؟
انا ماقدر افكر جذي واساسا مقدر على مسولية الزواج حاليا بس استغرب ليش هالشعور يكون مجود بالعائلة يعني حمدلله لا ان صاير شي من بينا ولا انها فترة مراهقة ولا شي بس مب فاهمة كيف اتعامل مع البيت
للعلم ان تفكير امي صاير كله منحصر حاليا بالسحر والحسد والمطاوعة وانا ماداني هالتفكير ممكن اتقبل مرة مرتين بس اي شي اشكو منه يكون ردها اوديج عند شيخ يقرا عليج !!!!!
احنا سمعنا المشكله من طرفك انت
بس ماندري اهلك ايش وجهه نظرهم ..
قد سالت نفسك ليش انقلبت المعامله لك بهالطريقه ؟؟
يمكن هم شايفين منك تصرفات ماتعجبهم وانت مو حاسه
انا ما اقول انك غلطانه ؟ بس هذا احتمال
احتمال تكونين انت انسانه رائعه
وهذي المعامله منهم ناتج غيره منهم وهذا بعد
مثل ما قلت احتمال … مش اكيد
اللي بقوله لا تعبين تفكيرك ليش سوا فلان كذا وليش هذا قال كذا
خففي من حساسيتك تجاه بعض المواقف
واذا كثرة نشاطك والكلام و النصايح منك مضايقتهم خففي منها..
مو لازم كل شي نعرفه نقوله ..
انت تقولين انك اتخذتي اسلوب الاستماع منهم وجاب نتيجه
طيب مره تستمعين ومره تشاركينهم الحوار .. وتقربي لهم بالاسلوب اللي هم يحبونه
وشاركيهم جلساتهم لا تنعزلين لوحدك ..
اهديهم احيانا بعض الهداياا البسيطه …
الله وحده اللي يعلم اللي في قلوب الناس
عامليهم بالحسنى لله لا تنتظرين مهم المعامله بالمثل
واكثري من الدعاء ان الله يؤلف مابينكم
اتمنى افدتك بشئ.. و لا تتضايقين من كلامي 
الله يسعدك دنيا واخره
ثانيا لاتستوين حساسه وطنشي اي شي يكدر خاطرج وانتي من وين رديتي ؟ يمكن للحين ما تعودوا على وجودج فالبيت عليج بالصبر
حبيتج لإنج ما شاء الله تقرين قران وتقومين الليل
انا لاحظت ان من اهدى اليوم اخوي يحاول يتقربلي ويسولف بس حاس ان بعدني شايلة على خاطري بس قلبي معورني عليه بهدا لين باجر وبسوي مثل ماقلتو بعاملهم لله وبخفف من الحساسية ان شالله
تكلمت مع امي اليوم عن هالموضوع وقالتلي لاتاخذين بخاطرج الكل مشتاقلج بس انتي حساسة واخوج لاتاخذين عليه مهما كان يحبج ويغليج يكفي انه الاكثر واحد فينا يكلمج من تكوني بالخارج والي سالتني وين ادرس بهولندا
اشكركم مرة ثانية