كلمة للي زوجها ما يبادلها الرومانسية

ليش ما انعيش بطبيعتنا وبمشاعرنا ونكسب الثاني باسلوبنا مب بأساليب انطبقها واحد واثنين وثلاث والمتضرر الوحيد المراة سوي وسوي وسوي والريال حتى ما يفكر انه يقوم يحط عطر هي اتحبه .. اصلا لو اتذكر انها اتحب هالريحة ولا .. انا اتكلم عن البعض وعن فئة تصتدم بالواقع حتى الباقي من رومانسيتها بيتلاشى مع الايام

اليوم كنت افكر في هالموضوع وانا يايه الدوام ..

وبديت احلل الموضوع .. واوصل لأبعاد ثانية

خلونا نتناقش .. انتي رومانسية لابعد الحدود .. وريلج واقعي

كيف تطلبين منه انه يكون لج رومانسي .. اتخيلي واحد متعين يديد في وظيفة وما يعرف للشغلة كيف بتلومينه انه ما يعرف يشتغل وهو اصلا اول مرة يجرب هالشغلة

في رأي المتواضع انه الرجل الغير رومانسي صعب انه يكون رومانسي بالطلب

يعني اني انا كل يوم افتح معاه موضوع وندخل في نقاشات عقيمة مالها حل انت ليش ما اتسوي لي جيه وجيه … انت ما اتحس .. ما اتشوف شو اسوي لك .. انزين ما فكرنا شو ذنبهم اذا ما يعرفون

او ما يحسوون .. وبحط تحتها خط ما يحسون

لانه الرومانسية من القلب ومب بالطلب .. اللي ما يسوي هالشي من نفسه صعب يتلقنه يمكن اذا يبا بيتعلم بس لو مب طالع من داخلة صعب انه يتعب نفسه ويفكر لانه اصلا ما بيي في باله

الرومانسية وكلام الحب مب فعل فقط وهو احساس اكثر من انه فعل
والنهاية بتكون وحدة بتنتهون بضرابه وحساسيات وتراكمات ما تنتهي لانج بتلفين وبتدورين في موضوع واحد ماله نهاية ولا له حل .. وبدال ما اتعليمنه بتنفرينه منج وما بيفكر انه يتقرب منج

كيف بيقول كلمه حلوة وانتي جارحتنه بكلمه ولا بلفظ ما تقصدينه

اللي تبا تعطي تعطي بنفسها بدون ما تتريا واتلوم الطرف الآخر .. او انها تستسلم واتعيش الواقع مثله
او انها اتم اتحاول عشان توصل اللي تبغية .. باختصار الرومانسية ما اتي بالطلب من احد الطرفين بتي بإحساس داخلي .. مستحيل تطلبينه ..

وكلمة اخيرة خلونا اذا حياتنا الحمدلله خالية من المشاكل الكبيرة نتهاون في هالموضوع وانعيش بسلام يعني ليش انكبر الموضوع في شي ما يسوى اتعرفون ليش ما يسوى .. لانه هالموضوع اهون من الموت لا سمح الله او الطلاق او الخيانه اوالضرب والإهانه اوالإدمان اوالتقصير في حقوقج كزوجة او او او .. شو يعني لو الريال بس مب رومانسي او ما يعرف يعبر عن اللي في داخله المهم انه معاج ولج ويحبج بس باسلوبه .. خلونا نتأمل بالنعم اللي عندنا وما انكون فاضيات واندور ورا المشاكل لاني على ثقة انه اغلب هالمشاكل ماشي مشاكل غير انها تراكمات سببها قلة الرومانسية .. حتى مب انعدامها

لانه الريال يوم يتذكر حرمته بشي بسيط حتى لو اتصل يسال عنه هو رومانسي بس بطريقته يت في باله وحب يسمع صوتها .. اسمحولي طولت بس خليتها مساحه للبوح ..

اتريا اتناقشوني في وجهه نظري .. وانشوف تجاربكم في هالموضوع .. هالضرابة والمشاكل يابت نتيجة وصار احد الاطراف رومانسي .. او في تجربة ثانية نفعت وياكم ..