[/FONTالمهم انا من زمان ابغي احمل بس الله ماكان كاتب لي هالشي وماقدرت اصبر اكثر عن جي قلت حق ريلي لازم انسير ونفحص ونتأكد ان كل شي اوكيه ولا في البداية مارضى وقال نحن مافينا شي واصبري تميت أعاند لين ماوافق وسرنا عيادة في الشارجة وسوينا كل الفحوصات المطلوبة وطلعت نتيجة الفحوصات سليمة يعني مافينا شي بس انا ماقدرت أتريا لين ماأحمل طبيعي وقلت حق ريلي أنا أبغي أسوي تلقيح أصطناعي رفض الفكرة وقالي مستحيييل أحنا مافينا شي وتميت أعاند لين ماوافق وسرنا العياده وسوينا التلقيح وريلي ماكان مقتنع بهذا الشي بس عشان خاطري سوا معنى هو بعد يباه نونو المهم سويت التلقيح وعقب أسبوعين عرفت أني حاااامل وفرحت بس الفرحة مااكتملت طاح الجنين وحزنت وااايد وعقب رديد سويت مرة ثانيه تلقيح لاني كنت حاطة في بالي أني مابحمل طبيعي وماحملت ]تميت فترة وحملت طبيعي وريلي استانس وااايد لاني حملت طبيعي بس الفرحة مااكتملت هالمرة بعد الجنين ماكان فيه نبض من البدايه ورحت المستشفى عشان ينزلون الحمل قالوا تريي لين ماينزل بروحه قلت اوكيه طاف الشهر الثاني والثالث ومانزل الجنين>بعدني ماخلصت
يوم شفت ان الجنين مانزل وأنا دخلت الرابع حطيت في بالي أمل ان هالجنين سليم بس الدكاترة مايعرفون وكنت عايشة على أمل أن قلبه بينبض خلاص وكل حد كان يقولي خذي شي ينزل الجنين مب زين يتم في بطنج كل هالمدة وأنا مب طايعة بس آخر شي خفت وسرت المستشفى وكشفت علي الدكتورة قالت تنامين عندنا عشان انزل الجنين مب زين بيستوي تسمم ودخلت عندهم جيكت الدكتورة على الرحم وقالت الرحم مسكر عندج لازم نعطيج تحاميل طلق قلت اوكيه المهم افتك ولاأعيش على أمل أنا أني حامل تاريخ17/10/201925/12 انادخلت المستشفى وريلي فديته كان في الدوام وامي وحليلها كانت حامل أختي كانت وياي وايد لعوزتها المهم مانفع وياي التحاميل وماتبطل الرحم ولاسانتي عقبها عطوني طلق ثاني واشتغل العوار الي يمووووت وحاطيني الله يخس ابليسهم في غرفة الملاحظه مع الحريم الي فيهم ويع الولاده وهال اليوم كان احنس يوم عندي بدأ العوار عندي من الصبح الساعه ست كنت راقده ونشيت من العوار الي يذبح وتميت ازعاج ومحد يسويلي سالفه وعيت اختي قلت لها ازقري سستر خلها تعطيني مسكن السستر اتقول نحن نباه العوار يزيد أكثر وأكثر عشان الرحم يفتح تميت أصيح وأصارخ حاولت اني أستحمل العوار بس ماقدرت وكل شوي يجيكون كم فاتح الرحم ولاسانتي ويوم يحطون ايدهم اهني خلاص أحس ان روحي بتطلع خلاص وكانوا وايد دفشات السسترات والدكاترة بعد جني كنت عنزه عندهم وتميت على هالحالة لين الظهر يعني عوار متواصل يت امي قلت لها سيري رمسيهم خليهم يعطوني مسكن ماشي فايده والمشكله العوده ان شي ريايل يايين عندهم حريمهم يعني الغرفه متروسه وأنا خلاص قلت هاي نهايتي خلاص وتميت اسبهم واصارخ واتصيح مااقدر اتحمل العوار واقول في نفسي اسكتي ياحرمه عيب ماقدرت وامي فديتها اتصيح وياي واختي شردت حسيت شي ينزل وزاد العوار وازعاج اقول سستر تعالي بيطلع خلاص خلاص طلعي مااباه البيبي وفشله كل الريايل سمعوني انزين استحوا شوي واطلعوا برع لا ويت السستر وشلت قطعة لحم وكان كبير وفرته يدام عيوني في الزباله واهني قلبي اتقطع تميت احتشر عليها وماراح عني الالم لمدة اسبوعين وطلعت من المستشفى تاريخ 30/ 12بعدني مااااااااااخلصت
وعقبها قلت خلاص ماأبغي أحمل وأرتاح شوي وبعدين يتني الدورة تاريخ 22/1/2019وخلصت 26 المهم يوم خلصت الدورة مااعرف شوه ياني قلت حق ريلي اباه سوي تلقيح ولا اطفال أنابيب قالي ماشي ماطاع مني مناك ماشي قلت له خلاص بأخذ حبوب هرمون يساعد على الحمل بزور وافق وسرت عند دكتورتي الي اتعالج عندها وقلت لها اني أباه حبوب قالت ليش مايتيني وأنتي فيج الدوره قلت لها ماكنت أعرف اتقول مايستوي الحين قلت لها أنا مايخصني أباه الحبوب وعقبها قالت لازم أسويلج سونار وبعدين بخبرج قلت أوكيه وطلع عندي كيس دهني صغير وقالت البويضه عندج مب موجوده خلاص نزلت اذا في حمل بعد فترة بيبين واذا لا بتنزل الدورة ومايستوي اعطيج حبوب هرمون لان بيكبر الكيس وانا من النوع الي وااايد أحب شي اسمه جبس بيبسي وحلاوه وكاااافي عشان جي يظهر لي اكياس ساعات المهم في السياره ريلي رمسني وقال انا كنت اباج اتكونين حامل انتي خربتي علينا كل شي ويه الكيس الي وزعل مني لاني وايد آكل هالخرابيط واشياء الصحيه ابتعد عنها وقال ان هو مسافر تاريخ 18/2 وكان خاطره في نونو اول مره يقولي وماشي وقت خلاص انا مسافر اهني أنا تحطمت ريلي بيبتعد عني ست شهور ونسيت سالفة الحمل المهم طافت الايام وأنا كنت مشغوله ويه ريلي يوميا كنا نظهر برع وريلي كان يتسوق حق السفر ويشلني وياه وماانرد الا فليل وقت الرقاد وموعد دورتي كان اليوم الي بيسافر فيه ريلي وانا ماادري بالمرة ولا دوووم احسب الايام واعرف متى اتيني وكم آخذ تستر والاخت ناسية السالفه هال اليوم وكنت مشغوله ارتب أغراض ريلي وعقبها طلعنا تمشينا وتعشينا وسرنا سينما وردينا البيت الساعه ثلاث والساعه خمس فديته سافر بس قبل وصلني بيت أهلي وأنا بعدني مأادري بس كنت أحس أن الدورة بتنزل علي اي لحظه ويوم اسير الحمام واجيك مافي شي بعدني ماخلصت
ويوم سرت بيتنا أمي تسألني مايتج الدورة أقول لها لا لأن في مستشفى يوم سقطت قالولي يوم بتيج الدورة ثاني تعالي نسوي لج فحوصات عشان نعرف شوه سبب الاجهاض عندج وأمي كل يوم تسأل وأنا خبر خيروأمي معصبه علي وشاكه اني حامل سارت ويابت وياها تستر مب واحد ثلاثه المهم سويت الفحص طلع عندي خط غامج والخط الثاني مب واضح بالمرة خفيف وايد قلت مستحيل هذاحمل وفريته وفليل أنا ومرت وخواتي يالسين وخبرت مرت خالي وقلت لها السالفه جان اتقول هاتي الجهاز ويبته وعطيتها ياه ويوم شافت قالت انتي حامل يامينونه قلت مستحيل قالت تعالي شوي ويوم اجوف الخط الثاني واضح عدل وخبرت امي وعصبت علي قالت لي انتي توج مسقطه لازم كنتي ترتاحين وقلت ماكنت متوقعة هالشي وخبرت ريلي فديته استانس المهم سرت المستشفى عشان اسوي الفحص وسوست تحليل دم وعقبها قالت الدكتورة لازم سونار قلت اوكي يوم سوت قالت كيس الحمل عندج مب في الرحم برع ولازم تنامين عندنا عشان انزل الحمل واهني خلاااااااص كرهت الدنيا وكرهت نفسي قلت كيف أخبر ريلي وانا أمس فرحته وعقب قلت حق الدكتورة بروح البيت والمغرب بي عندكم الدكتورة اوكيه وحملت المسؤولية على أمي أذا صار فيني شي وخلت امي أتوقع وامي وحليلها زايغة المهم سرت البيت والاأشوف يدتي فديت روحها اتصيح وصيحتني وياها وعقب اتصلت في ريلي وخبرته وقالي أنا كنت حاس هالحمل بعد مابيتم واتضايج فديت المهم جهزت أغراضي وسرت المستشفى والشفت اتغير عندهم ودكتورة ثانيه شافت الاوراق قالت سونار قلت بس مليت فكوني خلاص قالت لازم المهم وهي اتسوي لي سونار أنا صوب ثاني والدكتورة ليش زعلانه تميت اطالعها ولا اشوف تطالع شاشه وتبتسم واتقولي منو قالج حمل خارج الرحم حملج طبيعي وداخل الرحم وانتي دوج اربع اسابيع وقالت الله ستر وعصبت على الدكتورة ثانيه قلت لو كنتو منزلين الياهل الحين وتمت تعتذر لي وامي استانست وريلي فرح ورديت البيت يوم بين النبض عند البيبي بدأوو يعطوني ابر مثبته كل أسبوع وكانو 8 ابر ومرت الايام ودخلت الرابع اول يوم امي فديتها رقدوها في المستشفى عشان ايسون لها عملية قيصريه وانت كنت عندها من الصبح لين فليل وامي كانت تعبانه ومب حاسه بعمرها انا كنت اشل اخوي واهتم فيه وفي الغرفه الي امي فيها كان وياها بعد 6 حريم نفس اليوم مسوين لهم عمليه قيصريه وهاي اتكون مخصصه حق الحريم الي توهم طالعين من العمليات ويتمون فيها يوم المهم حريم تعبانين ومب قادرين ايشلون عيالهو ويرضعونهم ويغيرون لهم الحفاظ ومساكين الياهل ايصحيون والسسترات مسوين طاف وانا قايمه فيهم كلهم اشربهم حليب واغير لهم الحفاظ ونص الليل انا تعبت وياني نزيف وامي خافت علي بعدني ماخلصت
وسرت الحوادث الي عندهم في المستشفى وقالت لي الدكتورة هذا النزيف من التعب لازم ترتاحين وعالمهم ماارتحت من كلامها ويوم ثاني سرت عياده خاصة وقالت نفس الكلام وعقبها خبرتني اني حامل ببنت ونفس الوقت ريلي كان متصل بصدفه وخبرته تم يصيح فديته مب مصدق اني وصلت في هالمرحله من الحمل لان كان متوقع نفس كل مرة وعقب كملت الابر ة وخذيت عشرين ابرة تثبيت وماشفت ريلي الا يوم دشيت السابع وكم مرة ترقدت في المستشفى لان كان عندي فقر الدم ويعطوني دم وكنت أعاني من الحساسيه وماكنت ارقد فليل ايلس اصيح وماخليت شي ما جربته وما كنت اقدر امشي احس بثجل يعني كنت امشي شرات البطة واخس ودشيت الثامن وانا خلاص طفرانه اباه اربي بسرعه في نهاية الثامن نزل علي ماي وماوقف سرت المستشفى وجيكوا علي قالوا الرحم مفتوح سانتي واحد بس وفطامي كانت ضاغطه على مراراتي وكان يعورني وايد وكانوا عاطيني موعد ولاده29عشرة وانا خلاص مافيني صبر تعبانه سرت وشربت زيت خروع وكلت أناناس لين مالاعت جبدي وشربت زعفران وجرفه وزعتر وزاد عند العوار وسرت المستشفى وماكان يظهر العوار في التخطيط ودخلوني المستشفى يوم الاربعاء والرحم مب طايع يفتح اكثر يدخلوني والولاده ويطلعوني مرة ثانيه احتشر عليهم ريلي وقالهم سولها طلق الحبيب يباني اربي بسرعه عشان بنته ويوم الجمعه دخلووني الولاده وحطولي طلة وانا خلاص ميتة من الخوف وتميت اقرا سورة البقرة وسورة مريم والنساء واقرا الادعية والدكتورة عندي وريلي يتصل هاه حطولج الطلق اقول هيه يقولي كم يبالج لين ماتربين اقول مااعرف واناخلاص لايع جبدي من اسئلة جنه ياهل اونه عقب ربع ساعه بتربين صح وليش ماابند التلفون في ويه والدكتورة ناقعه من الضحك وتميت اتريا العوار وماشي مول وكل شوي يجيكون تحت وانا اتعذب تميت لين الساعة ست المغرب وماشي عوار يت الدكتورة قالت الحين اطلعي برع سيري غرفتج عند اهلج وتمشي وكلي لج شي والساعه السبع تعالي بنحط لج طلق مرة ثانية طلعت وطاف الوقت بسرعه ويت سستر وراي وايد كانت طيوبه السستر ودخلت واشوفيهم مجهزين كل شي ويتريوني وحطو الطلق وماي زمزم حذالي وقريت قرآن مرة ثانيه وأدعية تسهيل الولاده واشتغل العوارمن شدة العوار تميت استغفر وانادي باسم الله واسمع حريم يصارخن واخاف اكثر الدكتورة اتهديني واتقولي كل وحدة ولادتها غير وانا خلاص حسيت اني بموووت وومحد يدري اني جريب بربي انزين قلت الحين سانتين متى بيكون عشرة اكيد بمووت قبل مايكون عشرة وكل شوي اشرب ماي زمزم طبعا ماصرخت لاسبيت لاقلت ماما ولابابا سبحان الله كل مااتالم قول يالله والسستر كانت اوكيه وياي عطنتني ابرتين قالت بيخف عنج العوار وبتتخدرين قلت لها لاتروحين قبل مااربي جان اتقولي انا زمامي بيخلص الساعه 11 وانتي قبل 11 بتربين قلت مستحيل وعقبها تخدرت وخف عني العوار بس كنت احس وصكرت الليتات ويلست حذالي نشيت الساعه 9الاربع واقول حق سستر اباه حمام الله يعزكم يايه اتخوز جهاز التخطيط والااقولها اباه اضغط وانا مااعرف شوه سالفه متخدرة احس عمري في حلم قالت خليني اجيك ويوم جيكت اسمعها اتزعاج وفرحانه 7سانتي وتحظني وعلى طول خلوني سرير الولاده ربع ساعه تميت اضغط لين ماطلعت فطامي الحلوه وسبحان الله ماحسيت بااي الم وانا اضغط امي واقفه برع عند غرفة الولادة ولاتدري عن شي واني ربيت وخلصت لانها حاطة في بالها اني بشل المستشفى بصوتي واول ماطلعت فطامي اتصلت ف ريلي وخبرته وصوتي مايطلع وحمدالله على كل شر وربيت 10/10/2019السموحة طولت عليكم وايد اعذرووووني خواتي والله يرزق كل خواتي بالذريه الصالحة الي في منتدى وبرع المنتدى
بسير ادور الجزء الرااااابع هههه والله تعب ياريت لو كان في موضوع واااحد
بسير اقرا الجزء الرابع ..
ربي يخلي لج فطامي يااارب ..
وياربي لا تحرمنا يااارب
كل مره اقول ما بقرا قصص الولاده و يني فضول و اقرا و اتندم ..
وأدعيلي ربي يرزقني الحمل هذا الشهر