شحااااااالكم حبيباااااااااتي الحـــوااااااااااااااامل
اولا اشكر كل وحده دعتلي في الموضوع اللي كتبته ختيه ام علاوووي
وثانيه بغيت اخبركم قصة ولادتي في الكورنيش … اسميني عشت اكشن ما بعده اكشن
القصه واااااايد طويله … لاني كتبت كل شي بتفصيل الممل
الله يسلمكن .. بما اني مريضة سكر فقالتلي الدكتوره انه لازم اربي بعد ما اكمل الاسبوع 38 من حمالي
وصادف اني يكون التاريخ 9/9/2019 … موعد روتيني عادي في الكورنيش … سرت وجابلت الدكتوره باكستانيه ( نقينا ) ( Nagena ) ماشاءالله عليها دكتوره شاطره .. هاي اللي تولد ونفس الوقت اختصاصها حوامل اللي فيهن سكر
لهني وكل شي تمام … يوم سرتلها قالتلي ام زيوووود اليوم بتولدين ان شاء الله … وجهزت اوراقي عشان ادخل الكورنيش
ودوووني … الغرفه اللي بتم فيها على الساعه 12 الظهر .. طبعن الغرفه كانت مشتركه ويا حرمه ثانيه .. وعقب نص ساعه يت الدكتوره وسوتلي الطلق صناعي … يعني تقريبا على الساعه 3 بدا الويع كل شي ويزيد وبما اني بجر … ما كنت اعرف انه هالويع معناته طلق … وحليلي كنت يالسه امشي في الكوريدور مال الدختر … ويوم يزييييييد الالم … حليلي اتم لاصقه باليداااار جني ( بريعصي لاصق باليدااار هههههههه ) ويوم يخف ارد وامشي … ويوم يرد يزييييييد ارد والصق باليداااار ههههههههه ما ادري ليش كنت اسوي جي بصراحه كنت ارتاح .. لاني جربت اني ارقد على ظهريه بس ما رمت اتالم وايد
ويوم ما قدرت اتحمل … زقرت الدكتوره وقلتلها شو ياني … هالبنيه تتيبس في بطني … شوفي شوبلاها … حسبالي بيسووولي اسكان ( تصويير )
فقالتلي تعالي بجيك عليج من تحت وبنشوف اذا الرحم فاج عندج والا لآ … عادي هني طنقرت شو ها
كل شويه اتجيكووون بس تعبت .. فقالت عيل كيف بنعرف اذا اندخلج حق الولاده والا لآ … جان اسلم امري لله .. وجيكت وقالتلي ماشاءالله عليج … فاج عندج 5 سانتي … ما ادري ليش قلبي انقبض يوم قالتلي يلا ولاده … حسيت اني بصيح … كيف بربي … وعقب شوي بتكووون عندي بنوتتيه اللي تريييتها من زماااااااااااان … افكار تتقرقع في راسي … ما دريت بعمري الا وانا يالسه على الكرسي المتحرك وسيده صووووب غرفة الولااااااده جي تقريبا على الساعه 6 المغرب
ودشن تقريبا … 6 دكاتره ودايه وحده … طبعن اتجهزت حق الولاده … ولبسوووني هالقميص اللي اصلا ما يغطي شي واترقدت على الشبريه .. وحطوا هالجهاز اللي يراقب البيبي وتحركاته وبدن يجيكن اشيا على الكمبيوووتر … وانا يالسه محتشره يلا ترا زاد عليه الالم … جان اتقولي دكتوره هنديه … مافي خوووف حبيبتي .. هزا مافي شي ولاده مايجي كده وخلاص … شويه بعد انتي هزا اول بيبي يعني تقريبا انتي يريد 12 ساعه داخل هني
وانا امبققه عيوووووووووني … شو 12 ساعه بمووووووووت مافيني حيل … احس بالالام … انا اصلا خوافه اتروع يوم يعورني شي هههههههههههه … فووووق هذا كنت خايفه اني امووووووت وانا يالسه اربي وما اشووووووووووف بنوووووتتيه … وعقب ريلي بيعرس وبييبلها مرت ابووو ..واتعذب بنوتتيه … كل هالافكاااااااااااااار في بالي وانا يالسه اتالم في غرفة الولاده ههههههههههههههههه ماشي شغل صح … وايد متاثر بالافلام الهنديه
المهم … شو صار … اييني الالم … واتقولي الدايه ( الافريقيه ) بس واااااااااااااايد حنونه .. اتقولي شقايل اسوي البوووش … قلتلها ما اعرف … فقالتلي نب الحين عقب بتعرفين يوم قريب البيبي يطلع
جان اطنشها … فديتها مرت خويه كانت ويايه في الغرفه … وامي برااا حليلها من تسمعني اتعصر اتصيح هههههههه …
ومرت خويه فديتها يالسه ترفع معنوياااتي .. اتقولي ام زيووود لا اتصارخين هدي بالج … وحاولي تظغطين على تحت … عشان بنوتتج تظهر .. ولا تظغطين على ويهج مب زييين
المهم يالسه تعطيني من النصايح … يوم اتشوفني بديت اتويع … والويع الخايس يروووح ويرد … يروووح ويرد … وكل شويه واستحر واحس الدنيا ضوووو مب قادره اتحملها … وكل شويه اقولهم عطوووني ماي بااااااااااااارد ابا اشربه ( شفتوووني كيف متفيجه ههههه )
خلاااف … يت دكتوووره وقالت هبيبتي هزا ماي في داخل ما يطلع … نحن في يطلع اوكي مافي خوووف .. وما اعرف شو سويتلي … جان يصب مني ماااااااااااااااي … ماشاءالله جنه بحر
وعلى فكره كل ما كان اييني الويع واتضغط على تحت … كان ينجب مني ماااي بعد … وانا مستغربه كل هالماي في بطني عيل وين بنتي ؟!!!!
المهم يوم الجد … وظهر مني الماي كله وخلالالاص … هني بدا الشغل العدل … والالام اللي عمري ما بنسااااااااه … وفوق هذا الدايه اتقولي شقايل اسوي بوووش … وطبعن انا كله اسوي غلط … مب عارفه شقايل … هذا وقته يعلمني شقايل البووووش
انا الحبيبه شوكنت اسوي … اظغط على بطني واكتم نفسي … فويهي كان يحمر وعيوووني شويه وبتظهر ههههه … وهني تشتغل حرمة خويه لا لا مب جي … اظغطي على تحت … جنه فيج امسااااك
وانا هني اقولها كيف جي …؟ اتقول هذا هو البووووش ماشي غيره … يلا شدي الهمه يوم ايييج الويع ردي سوي مثل ما قلتلج وبتربين بسرعه ان شاء الله
المهم مني ومناااااااااااااك لين ما طلعت روووووووح اللي وياي … وخليتهم على اعصابهم ظبطت حركة البووووووووش … ويبت بنتي حبيبتي ههههههههههههه بس على الساعه 2 الفير … يعني اليوم الثاني … كان التاريخ 10/9/2019 .. مع اني شديت حيلي على اساس ايبها في 9 /9 … بس هاي اراد الله
المهم انكمل … فديت اللحظه محلاها ياربي يابوها بخياسها ههههههه وخلوها على بصدري فديتها … حسيت بشي ثااااااااااااااااني ياربي احساس حلو والله … وعقب ساروا ينظفونها ويت الدكتوره اللي بتسويلي الخياطه ..
هالشي عادي لين هني … قصة ولاده عاديه خاصه حق اللي هم شراتي … يعني اول ولاده
المصيييييييييييبه وين ؟؟؟!!!
يوم دخلوني غرفتيه … طبعن انا كنت حاجزه VIP فعطوووني غرفه عاديه بس ارووووحي … خواتي ما قصرن عدلنها وجهزنها
اتضح اني فقدت تقريبا 6 لتر دم من جسمي اثناء الولاده .. فوق هذا انا مريضة سكر
المفروووظ كانوا يعطوووني مغذي … عشان اعوض اللي فقدته … بس لا ماشي منه
وبنتي كان فيها بوصفار على الخفيف … حطوها على الحراره لمدة نص يووووم وعقب شلوو عنها
تميت تقريبا 3 تيام واليوم الثالث رخصوني …
سرت صوب هليه … حسيت بارهاق .. قلت يمكن عشان السبوووح … سبوووح الدختر مب شرات ما تسبحين في بيتج
جان اقول حق ختيه … ام علاوووي … ديري بالج على بنتي … انا بسير اخذلي دوووش قالتلي برايج
اقولكن بس حدرت الحمام – عزكن الله – شويه الا ام علاوووي تسمع شي طاح طااااااااااااااااااخ
ادق الباب عليه تبا تسالني وانا ما ارد عليها … جان تكسر الباب الا واتشوفني … طايحه ومغمى عليه
حاولوا يوعووني … بس ماشي فايده …يت وجيكت السكر لقته ناااااااااااااااااااااااازل وايد واصل 21 وهذا يعني حالة غيبوووووووووووبه لمريض السكر
على الطول فديتها يابت عصير فواكهه وشربتني اياه … لين ما فجيت عيوووني وودتني حجرتيه … المصيبه الثانيه اني ما كنت متذكره شي ؟؟؟؟؟؟
اشوف بنتي على الشبريه اقول منو هاي ؟!
ام علاوووي امبققه عيونها @ — @ … ام زيوووود بلاج هاي بنتج ما كملت اسبوع حتى ؟؟
اقولها اتقصين على منو انا ما عرست عشان ايييب بنت؟
ما اتذكر حد من هليه … وابويه اللي متوفي اتحسبه عايش
اثري الغيبوبه سووتلي .. فقدان ذاكره مؤقته 
وكلهم يالسين حوووووووولي ويصيحووون ؟؟ خايفين عليه فديتهم … بس ماشاءالله ام علاوووي صح انها كانت خايفه عليه واتصيح … بس هالشي ما كسرها لانها لو تمت اتصيح بزياده بتروع امي وباجي خواتي
فعرفت تتصرف صح … خلتني ارتاح … وعقب يابتلي البوم عرسي .. وشويه شويه لين ما اتذكرت كل شي …؟
بس بصراحه … اللي استوا عقب الغيبوبه … انا ما اتذكر شي منه … هاللي كتبته مثل ما قالتلي اياه ختيه ام علاوووي …
وحليلها اتقولي ام زيوووود انا الحين مافيني الجرئه اسير الحمام اللي كنتي طايحه فيه … اتكر كيف كان شكلج وكيف البيت انجلب فوق وتحت … يوم دروااا انج طحتي ومب متذكره شي
المهم يا حبيباتي … ريلي كان بيرفع قضيه على الكورنيش لانه هالي صارلي من اهمالهم … بس امي الله يهديها مابغت وحلفته انه ما يرفع قضايا ويخرب عليهم فرحة ولادتي
ترا بعدني ما خلصت … اليوم الخامس من ولادتي يعني بعد ما اتذكرت اني انا مربيه هههه وعندي بنت اتصلوا فيني الكورنيش عشان موعد بوصفار حق بنتي … يوم سرت هناك جيك الدكتووور وقال زايد عندها بزياااده وواصل 200… وقالي لازم تترقد بنتج هني وانتي معاها … انا حسبالي بيودوني غرفه بروووحي … كنت مستعده ادفع .. بس الخياس ودوووني غرفه مشتركه ويا وحده اعووووذ بالله اشقايل ولدها مززززززززعج وكل شويه ياي صوب شبريتيه ويدز بنتي … وفوق هذا كله الحبيبه زاقره القبيله بكبرها … ريلها وولد عمها وبنت خالتها .. يخرب بيت اليهوووود
شوهذا … وكنت انا ابروحي في الدختر … جان اطنقر لاني متروعه على بنتي ما كانت تتحرك وايد كله راقده وما تبا ترضع … جان اسير واهزب المسؤوله
قلتنلها لو نحن مواطنين ومب محصلين حد يسويلنا سالفه في بلادنا … وين تبينا انرووووووح … هاي الحرمه اللي وياي منو بيتحملها … عنبو حاطيني مع هالجنسيه غربلاتكم
وتميت اقولها كلام عمري ما قلته حق حد … اخلي في خاطري وبس … اظني هاك اليوم مب ام زيووود اللي اتكلمت … ام خايفه على بنتها اللي رمست وبهدلتهم تبهدييييل
ماسويتلهم ون توو … خذت بنتي واتصلت على الدريول وظهرت … وهايييج النيرس لحقتني لين برا … اونه لا ممنوع تعالي وقعي … قلت هالاوراق مب موقعتنها نقعيها في ماي وشربي …
ظهرت وسيده مستشفى النووور عند دكتور محمد امبابي .. يوم جيك عليها قال بوصفار اللي فيها واصل 300 كيف قالولج 200 … المهم هدا بالي … وخذ البنيه وخلها تحت ضوووء جي لونه ازرق لمدة 3 تيام والحمدالله بنتي … ابخييييييير …
شو رااااااااااااااااايكم … بقصة ولادتي … جنه فلهم هندي صح
اسميني كرهة مستشفى الكووووووووووورنيش … وقلت خلاص توووبه الولاده الثانيه بتكون في النووور … بفلوووسي بشتري راحت بالي … مب عند هاييلاك اللي ماصدقوا ثالث يوم وظهروووني من الدختر عشان يعطون الغرفه حق مريضه ثانيه
وبس واللي عندها اي سؤال انا حاااااااااااااضره … ادعووولي يا حوامل ان الله يحفظ لي بنتي وريلي ويخليهم لي يااااااااااارب
هالله هالله في عمرج إختي .. والله يعينج ويفكج من السكر ..