فترة الملجة علاج لما بعد الزواج

موضوعي اللي بطرحه اليوم عن مشاكل قبل الزواج وبعد الزواج أو خل نقول في بداية الحياة الزوجية

فيه مبدأ يعيشونه البنات قبل الزواج ويتأقلمون معاه بعد الملجة

البنت تحلم وتتمنى وتعيش أحلام وردية ومن حقها هالشي طبعا محد يقدر يعترض عليه وأحلامها غالبا تكون فارس يخطفها من بين اهلها وتعيش معاه في جنة

يوم تنخطب يعجبها شكل الزوج تشوف الشكل حتى لو كانت متطلباتها ريال دين وخلوق عيبها شكله تبدأ تحلم وتتخيل وبعدين تفكر فالأشياء الثانية وتوافق

وافقت وتمت الملجة المشكلة اللي تصير فالملجة هي بداية التعرف على الزوج, البنت في عالمنا للأسف تبا ريال اييها على طبق من ذهب كامل وخالي من العيوب ما تفكر ابدا انه بشر
حاله من حال غيره عنده حسنات وعيوب تبا تراقب عيوبه وهو يتغاضى عن عيوبها, كل ما تكتشف شي فيه تخلق في داخلها مشكلة وتبدأ هالمشكلة تلعب في راسها وتدور وتتراكم عليها مشاكل ثانية
وتكون في صراع نفسي داخلي ويبدأ هالصراع يطلع لبرى بس برى وين؟ تقول لربيعتها مثلا ريلي يدخن شو الحل وياه؟
أو تكتب موضوع تبحث فيه عن حل.
ايا كانت المشكلة سواء بسيطة او كبيرة هي ما تتغاضى عنها عشان تقدر تتفاهم مع ريلها. هذي الفترة يا بنات صارت ليش؟
عشان كل واحد يعرف الثاني ومهما اكتشف فيه يحاول يتأقلم أو يصلح, لو اكتشفت ان خطيبي عصبي ماله داعي اتشكى واطلب الانفصال عشان انا ما اتحمل العصبية
بالعكس ادور طرق التعامل مع الشخص العصبي واجرب معاه مرة ومرتين وثلاث وعشر

ودري العيوب لا تدورين عليها, طالعي حسناته استمتعي باكتشافها ما فيه ولا ريال فالدنيا ما عنده ولو حسنة وحدة
استمتعي بريلج دوري فيه مناطق الجمال, في ويهه في حركاته في جسمه من بعيد في كلامه واسلوبه في نظراته
ما يتصل فيج غير مرة وحدة مب رومانسي هذي مب مشكلة تعاقبينه عليها وتيين تتشكين انتي علميه بطريقة غير مباشرة
ما يتصل وانتي اتصلتي قوليله: احب صوتك فيه نبرة حلوة …جذي ممكن يتغير لا تتصلين وتقولين انا اللي اتصل وانت لا, لانه بيقول في خاطره محد مكلفنج او غاصبنج
ولا تحنين عليه وكل شوي تتصلين خل يمر يوم واحد عالاقل ما تسمعين صوته ويكون بينكم مسج فقط عشان يشتاق لج.

مب رومانسي يعني ما يقول كلام حلو انتي علميه بعد اذا تقدرين يعني لو هو يحبج بس ما يقولج احبج
يوم ترمسينه قولي: قول كلمة احبج ويوم يقولها ردي انتي برد رومانسي: الله الكلمة طالعه منك تهبل وتجنن …يا حلو كلامك

اذا تأقلمتي وياه ونسيتي عيوبه ايا كانت ممكن تمشي حياتكم بكل طمأنينة وهدوء وما راح يكون فيه مشكلة بسيطة تيين تشتكين منها.

ان شاء الله يكون موضوعي حلو ومفيد

والله يوفق كل وحدة في حياتها ويرزق كل بنت ما عرست الزوج الصالح

تقديري