عزيزاتي اليوم سويت برياني ربيان على طريقة الوالده الله يحفظها ويحفظ امهاتنا جميعا
كان لذيذ وما كان ودي اوقف وسبايسي حاااااار فلفل
اخليكم مع المقادير والطريقة:
ربيان فرش و منظف ومغسول
حبتين طمام
حبتين بطاط حجم صغير
حبة جزر
حبة فلفل حار
3 فصوص ثوم
حبتين بصل كبيرة وصغيرة
بقدونس – كزبرة – نعاناع – شبت مفرومين
كوب وربع عيش ( هالكميه تكفي شخصين)
الطريقة:
– بهرت الربيان ببزار خاص بالربيان تلقينه بالجمعات وفلفل اسود وملع وفلفل احمر وكمون ونص
عصير ليمونه (حسب الكميه اللي تبينها)
– قليت الربيان في شوية زيت
– في تاوة كبيرة حمرت البصل والثوم والفلفل الحار المقطع وحطيت عليه الربيان المقلي
– وبعدين حطيت الكزبرة والبقدونس والنعناع والشبت (مفرومين ناعم)
– بعدين قفشة صلصة طماط وحبة لومي اسود
– حطيت الطمام المقطع
– واخر شي حطيت شوية بزار مشكل وملح وربع كوب ماي وغطي التاوه عشان يتبخر الماي
ويستوي قوامه كثيف
وهذا شكله
خليته ع صوب لين اخلص باجي الاشياء
الحين قليت البطاط والجزر بهالشكل
حمرت البصل نفس اللي بالصورة
غليت العيش مع ورق الغار وقرفه وهيل ومسمار وشوية كركم وملح (حاسبي لا تخليه يغلي وايد)
لأنج بتخليه ع النار مع الخلطه وبيتبخر وبلين زيادة
الحين شخلت العيش وبعد ما شخلته حطيت اول طبقة في القدر وفوقه الخلطه بهالشكل
وطبقة ثانيه وهكذا الطبقات على حسب الكميه اللي عندج
اخر شي بعد ما خلصت من الطبقات حطيت البصل المحمر والبطاط والجزر وبقدونس وكزبرة مفرومين
وزبيب مقلي من فوق العيش بهالشكل
بعدين غطيت القدر بالقصدير والغطا مدة 10 دقايق على نار متوسطه لين يتبخر شوي وينشف
وخلصنا عمل البرياني بالربيان اللذيذ
هني شكله بعد ماحطيته في الصحن مع السلطة والسح وهنا وعافيه واتمنى يعيبكم
ريول بنتي مبينه بالصورة 
متحمسه يوم شمت الريحة اللذيذه
صورة اوضح كل شي اختلط مع بعظه وطلع يميييييييييييييييييييي
جربوه وادعو لي عزيزاتي
واللي تدخل اترد بدعوة حلوة لأني تعبت في تنزيل وتحميل وتصغير الصور
تحيـــــــــاتي
تسلم ايدج وصفة رووووعة