شحالكن خواتي ؟!
الصراحة قبل شوي استوى لي موقف مب حلو وقلت بتناقش وياكن لني صدق مقهورة واعتبرها مشكلة 
انا طبعي وايد استحي و اوجب في الناس و اجاملهم وماعرف اعطي حد كااش في الويه !
ومشكلتي طيبه وعلى نيااتي واتحسب الناس كلهم شراتي لكن للأسف الطيبة الزايدة ما تنفع في هالزمن ..
المهم قبل شوي كنت يالسه في الصالة ويا خواتي الصغار وابويه راقد لأنه رجع من برع تعبان وهو مريض اصلاً – الله يشفيه ويعافيه – وقال برتاح شويه باخذ قيلوله
ما اشوف الا حريم ثنتين واقفات عند باب الصالة وحدرن علينا لا احم ولا دستور !! .. وحده عيوز متبرقعه والثانية صغيرة متنقبة .. وانا كنت يالسه بـ لبس البيت يعني ماخذه راحتي
قلت فخاطريه خير اللهم اجعله خير ! محد من اهلنا يزورنا بدون ما يتصل واصلاً هالوقت مب وقت زيارة وحتى يوم يزورونا يدقون الجرس وتسير البشكارة اتدخلهم بس اول مره تستوي يدخلون علينا جيه بدون مذهب ×_×
المهم سرت عند الباب وسلمت عليهن ورحبت فيهن و كنت وااقفه مستغربه وعلامة استفهام هااااالكبر على ويهي ؟؟؟؟
انا على طول قلت اكيد حريم من طرف اميه ولا من طرف يدوتي وهالأيام بيتنا ما يخلا ما شاء الله ..
قلتلها لحظة الوالدة لأن ابويه راقد في الصالة وسرت وعيته بسرعة مسكين واتروع لني استحيت انقعهن عند الباب ..
المهم رجعتلهن وقلت حق العيوز اسمحيلي خالوه من انتي ماعرفتج ؟ جان تقول انا مريم بنت عبيد ؛ وين امج ؟ وتتكلم بكل ثقة جنها وحدة تعرفنا من سنيين !!
قلتلها اميه محد طالعه بس اتفضلي حياج البيت بيتكم < — مسكينه انا على نياتي ماعرف شو السالفة
يلست وياهن وضيفتهن ورحبت فيهن و لا بعد العيوز تسئلني انتي منو من بناتها ؟ 
و انا ما شاء الله عليه خبرتها قصة حياتي اونه يعني اوجب فيهن وطبعي اجتماعية وايد اهذرب ×_×
جان تقولي انزين اتصلي في امج بكلمها ؟؟ وانا قلت السمع والطاعة وسرت اتصلت في اميه وقلتلها عندنا حريم بس ما عرفتهن ويعرفونج و وحدوه منهن اسمها مريم بنت عبيد وتبغي تكلمج .. جان تقول مريم بنت عبيد ؟! انا ماعرف حرمة بهالإسم بس عطيني بكلمها
عطيتها تكلم اميه وسرت المطبخ اونه بحط الفواله –> يستاهلون سم فيران مب فوالة
و في هاللحظة زقرني ابويه وسرت عنده الغرفة جان يهزبني ويعصب عليه وقالي روغيهن بسرعة تراهن شحاتات وامج ما تعرفهن وانتي كيف اتدخلين اي حد البيت ؟ شدرانا شو من طبش وشو من علل فيهن ؟! 
قلتله والله ما يخصني وبروحهن دخلن البيت يوم انت كنت راقد اوانا تفاجأت فيهن وماعرفت كيف اتصرف واستحييت انقعهن عند باب الصالة !! .. في هاللحظة صدق حسيت اني مغفله وطيبة زيادة عن اللزوم و عمري ما شفت ناس بهالوقاحة وقلة الذوق ! 
المهم رجعتلهن في الصالة ومع هذا ما هزبتهن ولا عصبت عليهن ولا قلتلهن شي لني صدق اسستحي وماعرف اعطي حد كاش في الويه حتى لو هم الغلطانين ×_×
المهم بدت العيوز تقولي قصة حياتها وطبعاً الإسطوانه المألوفة .. نحن فقارى ومساكين وعيالي أيتام و الله يخليج يا بنتي بتحصلين أجر فينا و أمج محد وانتي تسدين عنها ..والخ ومن هالخريط اللي دوم نسمعه !
الصراحة انا كنت بعطيهن المقسوم لو يايين بأدب واحترام من البداية لكن بعد الحركة البايخه اللي سووها قلت والله ما اعطيهن شي واميه بعد عصبت قالتلي اطرديهن .. المهم قلتلها انا بروحي الحين في البيت ومب مسويه حسابي بس عطيني رقمكم عشان انطرشلكم من زكاتنا وبنساعدكم ان شاء الله
قالتلي نحن ما عندنا موبايل .. قلتلها انزين رقم البيت ؟ جان تقول بعد ما عندنا تيلفون ! .. في ذمتكم حد هالأيام ما عنده موبايل ولا تيلفون ؟! .. المهم قلتلها اسمحيلي غير جيه ما عندنا واتفضلوا الحين لني مشغولة =)
قالتلي لو بتعطونا شي عطونا الحيين لا تقولون بنطرشلكم .. قلتلها عيل ما بنعطيكم شي ؟ الله يعطيكم و الحين اتفضلوا الله وياكم لأن انا ما عندي وقت أضيعه
:
:
شو رايكن في الموقف اللي استوى ؟!
نصيحة لا تخلون الأبواب مشرّعه ترى عادي يعفدون عليكم وانتو رقود
بس الحمدلله تعلمت من هالموقف اني ما أصدق اي حد وأكون شديدة شوي في تعاملي مع الناس لأن الانسان الطيب يركبون على راسه وما يحشمونه
——————————————————————————————-
خواتي رجعت وعندي تعقيب على الموضوع =)
انا حصلت هجوم وانتقاد كبير من بعض الخوات – الله يهديهن- وانصدمت الصراحة لأن نيتي طيبه من كتابة الموضوع وردة فعلي كانت طبيعية وأي وحده مكاني ممكن تسويها .. !
اللي تقول (واما السائل فلا تنهر) .. نعم انا وياج وما اختلفنا
لكن اتمنى تقرون ردود الإخت ÷ ~ امـ حمد ~ ÷ يزاها الله خير ما قصرت وشرحت الموضوع اكثر ويمكن وصلت الفكرة اللي أنا ما قدرت أوصلها بكلامي :
المشاركة الأصلية كتبت بواسطة ÷ ~ امـ حمد ~ ÷ 
لو كانن واضحات من البداية كان الوضع اختلف
ولكنهن حدرن البيت بدون استئذان
وتعاملن وكأنهن من افراد البيت
بدون ادنى احترام لحرمته
نعم قال تعالى واما السائل فلا تنهر
ولكن ايضا قال : يا ايها الذين امنوا لاتدخلوا بيوتا غير بيوتكم حتى تستأنسوا وتسلموا على
اهلها ذلكم خير لكم لعلكم تتذكرون
مثل هذه الادااب الشرعيه قائمه على جميع العباد فقير او غني
اتصور ان السائله لو كانت واضحه من البدايه لكان الوضع حتما تغير….
ولكن ان تدخل بيوت الناس بدون استئذان وتتحدث مع افراده وكأنها تعرفهم بدون ان تفصح عن سبب الزيارة..
اعتقد ان ماقامت به اختنا ردة فعل طبيعيه
ومن حق الاب او الام ان يخافا وان خرجت منهم تلك الالفاظ فهي عفويه بما معناه تصرفي معهم
من سلك مسلكهم المفتقر لحدود الله وادابه ليس ببعيد ان تصدر منهم تصرفات اخرى تشكل خطورة على مضيفيهم
المشاركة الأصلية كتبت بواسطة ÷ ~ امـ حمد ~ ÷ اين الطرد..؟؟
لو تركتهم بدون ما تشير لهم انها مشغولة تأكدي ان الجلسة سـ تطول
وبما ان طريقة دخولهم غلط وخطأ… ولا يفترض ان يكون
فمن المنطق والبديهي ان تكون ردة الفعل بنفس المستوى
ولا ارى ان ماقامت به هنا اختنا يعتبر طرده
لانها عرضت عليها مساعدتهم بأدب بطريقتها هي
والرفض كان من قبلهم
و هذا رد للأخت جلنار فيه حلول منطقية للمشكلة :
المشاركة الأصلية كتبت بواسطة جلنار13 ما عليج من حد
وأولا ، الي سويتيه عين العقل والمنطق، عيل الي يدش بيتج لا احم ولا دستور ولا إستئذان ولا حتى دق الباب، سسسيده دشن داخل الصاله، ها الشخص في كل الاحوال ومين ما كان تقدرين تطردينه برع، لأنه تعدى على حرمه البيت دون علم اهله لما فرض نفسه عليهم.
ثانيا، ها الفئة الي يلبسن عبي ويدورن بين بيوت الفريج، هذيل معروفين ، يجون البلاد بفيزا سياحه ولا زياره ويقعدونلج شهرين ثلاثه، خاصه في شهر رمضان. يجون يشحتون من كل مكان وبكل طريقه ممكنه ، ويجمعون ها القد على قلبهم ويردون بلادهم ، وعلى هذا المنوال، جماعه منهم تروح بعد ما تخلص فيزتها والجماعه الثانيه تيي بعدها ، شغل عصابات ولهم ناسهم من جنسيتهم الي عايشين ويشتغلون هني، يضبطون لهم الفيز ويجيبونهم.
الي عايش في البلد وصدق محتاج، اقل القليل يروح الهلال الاحمر ويعطيهم الاوراق الي تثبت وضعه، وهم مب مقصرين في ها الناس ، وشهرينا يصرفون لهم .
بس ها الفئه الي تدور البيوت تعرف انه ما لها حق ، وعشان جي يستخدمون ها الاساليب.(اضعف الايمان اننا نختبرهم مثل ما سويتي انتي لما طلبتي عنوانهم)
ثالثا، احنا لازم نتعاون مع اجهزه الشرطه الي ما قصروا وكانوا ولا زالوا يحذرون من التعامل مع ها الفئه ، لأنه الي ما يستحي منج ويدخل بيتج غصب، عادي اذا شافج بروحج في البيت، او اهل البيت محد انه يسرق ولا يتعدى عليج واهلج..
و هذا رد آخر للأخت ترتبيشن فيه حقائق واقعية عن ظاهرة التسول الدخيله على مجتمعنا :
المشاركة الأصلية كتبت بواسطة ترتبيشن ثالثا : ظاهرة "الشحاته السياحيه" منتشره في البلاد حيث يأتي المتمرسين والمبتدئين بهذه الظاهره الى البلاد بفيزا زيارة يمارسون نشاطهم بكثافه خلال مدة مكوثهم ومن بعدها يعودون الى بلادهم محملين بالغنائم الوفيره خلال هذه المده الوجيزه !!
وكذلك "الشحاته الموسميه " واقصد بها تلك التي تنشط في المناسبات مثل شهر رمضان والعيدين وهي ظاهره منتشره وتتميز بتعدد اساليبها ..
رابعا : حذر المسؤولين في الدوائر الامنيه من التعامل مع الشحاتين وضرورة الابلاغ عنهم لما يسببونه من خلل امني وصورة غير حضاريه للبلاد..
خامسا : ماشاء الله تكثر في بلادنا بيوت الخير والجمعيات الخيريه ..حتى لا يضطر "المحتاج الحقيقي" أن يبذل ماء وجهه في السؤال لدى الناس
سادسا : هنا سأوورد مثالين فقط حتى تقتنع الاخوات اللاتي يصدقن ما يدعيه هؤلاء "الشحاتين"
المثال الاول هو عباره عن خبر في جريدة الامارات اليوم وهو : "ضبط متسولين يقيمون في فنادق «5 نجوم» شقق فخمه باهظة الايجار "
وهذا الرابط لمن تريد التفاصيل :
https://www.*****.com/vb/t95496.html
والمثال الاخر هو فيديو فاليوتيوب عباره عن مقطع في برنامج يعرض على قناة الكويت .. يتكلم البرنامج عن التسول وخداع المتسولين ويعرضون هالفيديو اللي يمثل بعض من حيل المتسولين .
https://www.youtube.com/watch?v=k4b0MqyFH_g
وفالاخير اقول كفانا "طيييييييييبه زائده" والظن الحسن "المباااااااااالغ " فيه للغير .. ولنكن متوسطين متزنين ونعمل عقولنا في التعامل مع الاخرين حتى لا نكون عرضه للاستغلال والاستغفال .
وهذا رد آخر للأخت درب الوله :
المشاركة الأصلية كتبت بواسطة درب الوله خواتي.. اللي تقول واما السائل فلا تنهر.. و اللي تقول المفروض تعطينهم شي..
خواتي.. اظن كلناااااااااا نعرف هالفئه من الشحاتين.. اللي يطبون في البيت بدون اذن.. وكم من جرائم صارت من وراهم.. واللي تقول محتاجين.. منو قالج محتاجين؟؟؟؟؟ المحتاج فديتج ما يذل عمره.. " يحسبهم الجاهل اغنياء من التعفف"!! اللي ما سمعت بهالايه انا بسمعها.. وين التعفف؟؟ ووين احترام حرمه البيت؟؟
الرسول لما كانوا الصحابه ينادونه ( انتبهوا.. ينادونه وما يدشون بدون اذن) نزل فيهم رب العالمين بما معناه استاذنوا ولا تزعجوا الرسول .. وهذيلا صحابه.. يبون يدشون ع الرسول عشان يتعلمون منه او يسالونه في موضوع شرعي.. فكيف بالغريب؟؟؟؟؟ اللي ماتعرفينه وداخل عليج بيتج بدون اذن ويطلب منج؟؟
المحتاج ما يقتحم بيوت الناس خواتي.. المحتاج يتسر ع عمره ويروح الجمعيات الخيريه وهم يساعدونه.. اما اللي يطب بيوت الناس لااا والف لااااا!!
وبعدين منو قال انه رب العالمين لما قال" واما السائل فلا تنهر" قصد هذيلا؟؟؟ رب العالمين قصد السائل اللي تشوفينه وانتي ما شيه في الشارع ويكون صج محتاج.. مب وحده تتمشى في كارفور او في مول وايدها متروووسه اجياس محلات وتقول ما عندي!!! ربنا عطانا العقل عشان نفكر فيه.. واظن اللي عندها تدش مول وتتشرى وتلبس احسن الثياب ما تحتاج بيزات!!
الخوات اللي انتقدوها شو كانوا يتوقعون رده فعلها بعد ما شافت هالخوات داشين عليها؟؟؟ تسير البنت واتييب بيزات عشان تفتح عيونهم عليها ويعرفون البيت فيه بيزات وكل يوم تلاقينهم طابين في البيت ؟ او الادهى انهم يطلعون لها سكينه او مسدس ويهددونها فيها عشان تعطيهم كل اللي في البيت؟؟
خواتي قبل لا تفتون فكروا.. غريب داخل بيتج بدون اذن وقاعد ويسوي عمره يعرفكم.. هل ممكن تكون نيته سليمه؟؟ عنبوا هذابيتج .. كيف تامنين لغريبه تدشه في هالزمن اللي الاخو قام يجتل اخوه والريل يجتل حرمته عشان البيزات؟؟؟
انا ابي وحده من اللي انتقدوها خصوصا الاخت المشتطه من بدايه الموضوع يصير فيها نفس الموقف وابي اشوف كيف بيكون موقفها!!!
صج ناس غريبهّ!!
و هذا رد للأخت الياسية تذكر فيه خطورة هالفئة من المتسولين علينا وعلى مجتمعنا :
المشاركة الأصلية كتبت بواسطة الياسية وحده من الاهل كانت في المطبخ الخارجي وحدرت عليهااا وحده تشحت يوم صدت شافت انه ريال لابس عباه وشيله وماسك سجين الله سلمهااا لانه في اللحظه هاي شافها حد من عيالهااا ونقذها من هالموقف.
الثانيه
وحده من حريمنا واقفه عند الباب المساء يتهاا وحده وطلبت من عندهااا يوم دخلت يدهاا في مخباها وطلعتها في اللحظه هاي مسكت ايدهاا في هنتين وخذت المبلغ كامل اللي طلع من مخباها ما عطتهاا فرصه تعطيها هي خذت الفلوس كلهاا.وكانت قوية اتخبرناااا تقول ما قدرت احرك عمري من مسكتني. لو كان عندها اداه حاده جان ماتت عدال باب بيتها.
ووحده اونها ارمله وتربي عيال اتي بملابس رثه تشحت وتلقط فلوس وثياب واكل لقوها في الجمعيه ويا ريلها باحلى اللباس واحلى مكياج.
وكله في صوب ويوم تعطين وحده بعدها بخمس دقايق بتيج غيرها ومن تطلع اتيج غيرهاا تبين انهم كلهن يايات في سياره وحده والريل يترياهن برع من تحصل وحده خبرت اللي معاها وبالدور ياخذن.
واخرررر موديل شفته انهن يايات من السعوديه حق شيء يعالج بالرقيه وبعدهااا يشغل اسطوانه الشحاته او يايبين البوش وخلص البنزين والشيبه تعبان ومن هالخريط
اللهم عافنا ولا تبلانا
:
:
و في النهاية أذكركن بـ حديث الرسول صلى الله عليه سلم :
(( لأن يحتطب أحدكم حُزمة على ظهره، خير له من أن يسأل أحداً، فليعطيه أو يمنعهُ")) متفق عليه.
خواتي الغاليات شي فرق بين المحتاج الحقيقي وبين المتسول والإسلام نهانا عن التسول ..
المحتاج الحقيقي يكون متعفف ونفسه عزيزة وتوصله المساعدات لين عنده وحتى لو احتاج انه يطلب الناس يستحي منهم و يستأذن ويطلب بكل أدب واحترام .. مب يعفدون على الناس في بيوتهم ويخوفونهم بدون ادنى احترام لحرمة البيوت .. !
وانا الهدف من موضوعي مب اني اقولكم لاتعطونهم ؛ لا بالعكس والله الصدقة شي وايد حلو بس الأحلى انها توصل حق أصحابها بدون هالظواهر الدخيله على مجتمعنا واللي تزيد كل يوم والثاني ..
لكن الهدف من الموضوع اني احذركم من هالفئة لأنهم فعلاً يشكلون خطورة علينا وعلى عيالنا والواحد ما يعرف شو نوياهم لأن اللي يسوي جيه عادي يسوي اشياء أكبر !!
تخيلي باجر انتي في الدوام والبشكارة مشغولة والباب مشرّع ويدخلون فجأه على عيالج الصغار ؟! ما بتخافين عليهم ؟ شو بيكون شعورج ؟ انتي تضمنين شو نواياهم ؟ ياما سمعنا عن شحاتين يدخلون بيوت الناس في عز النهار ويسرقون ويطلعون وأهل البيت ما يحسون فيهم ×_×
و لا تنسون الآية الكريمة في قوله تعالى : (يا ايها الذين امنوا لاتدخلوا بيوتا غير بيوتكم حتى تستأنسوا وتسلموا على اهلها ذلكم خير لكم لعلكم تتذكرون)
الأجهزة الأمنية في الدولة تتصدى حق هالفئات من المتسولين وحذرتنا من التعامل وياهم لما يشكلونه من خطورة على المجتمع والأفراد ولو فتحنا لهم المجال ما بيخلصون صدقوني وكل واحد يرجع بلاده وعنده ثروات من تعبنا وشقانا .. ! وكل يوم يظبطون متسول عنده أملاك خيالية
اللي تبغي تتصدق الجمعيات الخيرية والهلال الأحمر ما يقصرون ويوصلون المساعدات حق أصحابها في كل أنحاء الدولة
بس المهم نحن ما نكون طيبين وايد إلى حد السذاجة وما نفتح لهم المجال يستغلون طيبتنا ولا كل يوم والثاني بيعفدون علينا في بيوتنا و بيزعجونا في أوقات راحتنا ..
اتمنى تكون وضحت الصورة أكثر بعد التعقيب والسموحة لو ما قدرت أوصل هدفي من البداية ^_^
تحياتي للجميع
حسبي الله علي بليسهم شو هذا … لهذي الدرجه عنبوو
ادور بيت ناس من اهلنا بس طلعوا مسافرين ممكن ارتاح شوي
جان اخلي البشكاره تيبلها ماي و شوي جان تقول انا ريلي
يشتغل في السيراميك و انكسرت ريله و من هالخرابيط يعني طلعت
شحاته بس سويتلها طاف و رحت عنها الحجره لان ما احب ايلس و مع ناس
جيه ما عندهم كرامه و لا بعد لبسه عباه و شيله حلوه ههههه