عمرتي في العشر الآواخر من شهر رمضان

السلام عليكم ورحمة الله وبركاتة ..
مرحبا خواتي العزيزات ..

تقرير عن عمرتي في العشر الآواخر بشهر رمضان 2024م(السبت 22/ رمضان ولغاية 27/ رمضان)
عدد المسافرين 17 شخص من الأهل والأقارب.

طلعنا على المطار الساعة 11 صباحا كانت طيارتنا على طيران العربية وتقلع الساعة الواحدة إلا ربع وصلنا مطار جدة تقريبا على العصر ..

صورة لمطار الشارقة

صورة من الطائرة من سماء الشارقة..

بعد ماوصلنا مطار جده أستأجرنا باصين وبعد ساعة تقريبا وصلنا للفندق ،،كنا حاجزين عن طريق النت وقالوا لنا الفندق يبعد كيلو عن الحرم ،لكن انصدمنا طلع وااايد بعيد تقريبا 4كيلو ولا اكثر..الفندق حلو ونظيف 5 نجوم (فندق أم القرى ميكوري) مقابل مسجد الجن ومقابر توجد مقبرة السيدة خديجة رضي الله عنها بهالمقبرة..

صور من نافذة غرفتنا بالفندق بالدور12

اسعار الفندق كانت معقولة لأنا حجزنا قبل شهر رمضان واللي حجزوا بعدنا طلع عليهم شوية أغلى الغرفة مزدوجه لمدة أسبوع كانت (2700)درهم وفي رمضان (3200)درهم.
وصلنا الفندق قريب المغرب وقالوا لنا توجد باصات كل نص ساعه المهم الأهل اللي معانا مجموعه منهم قالت بنرتاح لين بعد الفطور والمجموعه الآخرى قالوا بنروح نعتمر لانه بعد الصلاة بيكون الحرم زحمه ..انا كنت تعبانه ومصدعه قلت بسير بعد الفطور بس ما اعرف فجاه عزمت وسرت أنا وبنتي مع اختي وزوجها وبنتها وولدها وصلنا الحرم قريب على المغرب وماخلونا ندخل للطواف لأنه وقت الفطور قرب رحت انا واختي والبنات وجلسنا في المكان المخصص للسيدات وفطرنا على تمر وماء زمزم..وبعد الصلاة رحنا وطفنا حول الكعبة وضيعت اختي وبنتها وحصلتهن بالسعي،،والحمدلله خلصنا قريب صلاة العشاء وفي نهاية السعي ضيعت بنتي وساعه تقريبا لين لقيتها وتمت اتصيح عمرها 13سنه،لانها الله يهديها من لقت بنت خالتها تمت معاها وبنت خالتها سابقتنها بشوطيين وقالت لها من تخلصين بتحصليني فوق عند الصفا..هيه مالقتها ردت بالسعي تدور وضاعت ويالله لقينها.

صورة السعي بالصفا والمروة

صورة الكعبة

باب الكعبة..

وبعد ذلك صلينا العشاء والتراويح وكنت تعبانه على الآخر ما قدرت اكمل التراويح..ورجعنا الفندق مشي ماحصلنا الباص خذنا عشاء ومشينا مشي بس كنا منهدين على الآخر ،وصلنا الفندق من التعب ماتعشيت كلت شي خفيف مع اني كنت بموت من اليوع..وارتحنا بالفندق وعقب ردينا الحرم لقيام الليل الصراحه كان روعه وخصوصا دعاء السديس ليلة 23 ..

صور للحرم بالنهار

دبس الصراحه لوكنا قريبين من الحرم كان غير بنشوف الحرم كل ساعه غير يوم انت ساكن بعيد ،كنا نسير بالباص واحيانا مشي واحيانا نفوت فرض بالحرم نفطر بالفندق وبعد الفطور نسير الحرم ونجلس لبعد القيام ونرجع نتسحر بالفندق ونرد مره ثانية لصلاة الفجر المشكلة ندخل من ناحية السعي والطريق وعره ومصعاده ونزله الله يعينهم كبار السن على هالمصاعده والله انها تعب ،،الحمدلله كانت ايام ولا اروع منها وخصوصا صلاة التراويح وراء الشيخ ماهر المعيقلي وقيام الليل مع السديس..

ليلة 27رمضان

[

وليلة 27 رمضان الحرم كان زحمه صلينا بالأبراج وطلعنا بعد القيام بصعوبه من الزحمه ونزلنا النفق تحت الحرم ندور على تاكسي لين الفندق والشارع واقف والناس فوق السيارات كأنه يوم الحج والشرطة تنظم النفق والتكاسي استغلاليين اللي يقولنا بوصلكم ب100ريال للعلم كنا ناخذ السيارة ب15 و20ريال.بس لو خذنا تكسي متى بنطلع من الزحمه بيفوتنا السحور وردينا وطلعنا من النفق بمخرج ثاني طلعنا بجانب ابراج زمزم وردينا ودخلنا الحرم وطلعنا من طريق المسعى مشينا مشي هذاك اليوم انا وأختي بس وخذنا الطريق اللي يطلعنا صوب الباصات وماحصلنا الباص وخذنا سيارة خصوصي ب20درهم والحمدلله لحقنا على السحور وسحرنا وصلينا الفجر بالحرم بالساحه الخارجية وردينا الفندق ارتحنا لأنه بنفس اليوم كنا برجع على الامارات وطلعنا من الفندق الساعة 11لأنه طيارتنا الساعه 3اعتقد..
والحمدلله وصلنا البلاد بالسلامه وفطرنا بالطيارة لحظة هبوطها..

وأتمنى التقرير يعجبكم..واللي تدخل موضوعي تدعيلي
والسموحه على الصور لأني بالموبايل مصورتنها

ماشاء الله تبارك الرحمان
و احنا بعد كنا هناك فالعشر اواخر و ردينا ثالث ايام العيد و الحمد لله ليلة 27 صلينا داخل الحرم شرات كل ليله..الله يقبل منا يميع ان شاء الله

المشاركة الأصلية كتبت بواسطة وردة الجاردينيا

آمين ..يسلملي مرورج الطيب الغاليه..

ما شاء الله عليكم .. تقبل الله منكم

ماشاء الله عليكم

خاطري اروح عمرة رمضان …. الله يكتب لي ان شاء الله خليجية

المشاركة الأصلية كتبت بواسطة العنابية

ما شاء الله عليكم .. تقبل الله منكم

آمين الله يتقبل منا ومنكم صالح الأعمال

عقبال ما اروح انا يا ربي
عمره مقبوله فديتج

اترك تعليقاً إلغاء الرد