علاج حساسية الصدر والبلغم للاطفال

أخواتي حبيت أفيدكم بتجربتي ويا ولدي المريض بحساسية الصدر والربو المزمن ، تعب من فترة من صدره و طبعا كالعاده خذيناه المستشفى و عطوه مجموعه ادويه للحساسيه و مضاد حيوي و ادويه البخار و لكن للاسف ما استجاب للعلاج و كانت عنده حمى شديده تجاوزت الاربعين درجه ، عطوه بعدها مضاد حيوي عن طريق الحقن ولمدة 3 ايام والحمدلله خفت الحراره ولكن للاسف بعدها باسبوع رجعت له الحساسيه و رجعت تشتد عنده يوم بعد يوم ، كسر لي خاطري حبيبي من كثر الادويه اللي خذاها ، بعدها سرت سألت العطار عن علاج طبيعي لحساسية الصدر والانف ، فوصف لي الاتي ؛
ثلاث ملاعق صمغ عربي + 15 مسمار قرنفل بدون الراس + ملعقة عسل طبيعي + كوب ماء
جميعها تتنقع بالليل حتى الصبح ، و قريت عليه الفاتحه و آية الكرسي والمعوذات ونفثت فيه
وعطيت ولدي منه الصبح بمقدار 10 مل من هذا الماي و مره بعد المغرب . و كان سبحان الله و الحمدلله مفعوله سريع و عجيب ، ما شاء الله لاحظت النتيجه من اول ليله عند النوم كانت نومته مريحه و تنفسه تحسن على طول ، وانا مستمره عليه الحين من كم يوم والحمدلله ما رجعت له الحساسيه ، وعلى فكره العطار قال لي استمر على الوصفه لمدة اسبوعين و ان شاء الله ما بترجع له الحساسيه على طول . انا كتبت الموضوع لاني اعرف انها مشكله منتشره بين الاطفال و خصوصا في هذا الوقت من السنه ، الله يشفي كل مريض ان شاء الله

ماشاء الله ..

ربي يعافي ولدج ويعافيه

يزاج الله خير ماقصرتي والله

مايجوف شر

مشكووووووووووووره اختيه

انا ولدي يعاني منهاااااااااا ،،، بجررررررب طريقتج وان شالله تنفع ويانا

والله يعطي ولدج الصحه والعافيه ،،

بس شو لو سمحتي

الصمغ العربي نفسه اللبان العربي ولا غير ؟؟