عطوني الحل؟؟!

هلا يا بنات..

انا الحمدالله عمري ما لجأت لحد يحل مشاكلي..وشكواي دايما لرب العالمين..
بس هاي السالفة اريد اسمع اراءكم فيها.. واذا حد واجه نفس الموقف يخبرني كيف تعامل معاه.

بنت خالي..علاقتي فيها سطحية شوي..من كم شهر..اشتغلت معاي في نفس المكان..واستوت تطلع معاي وترجع معاي ..لان نحن ساكنين نفس المنطقة..
المهم شكلهاا البنت وايد خذت علي..واحس استوت ما تستحي..

احس استويت اصرف عليها..اذا بنطلب اكل..انا اللي ادفع.. واذا بنروح الكافتيريا انا اللي بدفع..حتى لو هي عزمتني على مكان..ما ادري كيف ينتهي الموضوع اني انا اللي ادفع..

والاسبوع الماضي ..رحت معاها المول..وهناك اكتشفت انها ناسية بطاقتها..وتسلفت مني 3 الاف.. وطبعا ما بيرجعون..لانها ماخذة من شهور اكثر من 5..وما رجعتهم..

اذا طلبت شي من المنتدى..تقولي اطلب لي معاج..وطبعا على حسابي..
واذا شافت شي عيبها من اغراضي..تطلبه وانا استحي اقولها لا..

وهي ما عليها قصيرة..وتحس ان هالشي عادي..بس انا احس الموضوع وااايد زاد..

حاولت اسوي علاقتي معاها عادية بس صعبة..هي معاي معظم الوقت…
الحين تباني اشتري لها من موقع امازون شنط ماركة.. مع اني قلت لها بصريح العبارة ان بطاقتي ما فيها شي..بس شكلها ما فهمت والا تستهبل..شو اسوي معاها؟؟

سمحيليه ختيه ..الغلط منج انتي ..

عطيتيها مجال و هيه حست ان هذا الشي عادي و تمادت في الشي ..

ختيه كل انسان له حدود مايتجاوزها ..

حاولي انج ماتعطينها مجال ..اذا كررتها قوليلها ماعندج و خلاص و اذا تبا تقدر تطلب بنفسها ..ماتقدرين تطلبين لنفسج و تحسسينها انها لازم تدفع

حاولي ..

و ربي يوفقج

ياقلبي ,,, المفروض من نفسها تحس ع عمرها

ولا لأنها بنت خالج تتحراج تصرفين عليها؟؟؟

ياقلبي واجهيها وقولي لها ,, انا بيزاتي خلصت متى بترجعين اللي تسلفتيه؟؟

قوليلها بطريقة النغزات انها لازم تدفع ,,,

او اتفقي معاها انه مرة انتي تدفعين ومرة هي تدفع لمن تطلبون من

الكافتيريااااا وغيره

وبخصوص الشنط الماركات ,, عطيها كاش بالويه

قوليلها ييبي بيزاتج اول شي عسب ادفع لهم ,,,

لازم تحسسينها انها صايرة عبء عليج

سوي نفسج فـ يوم ناسيه بوكج او بطاقتج اذا طلعتوا وبغيتوا تتشرون شي ..

وشوفيها شو بتسوي حزتها بتدفع لج ولا بتتنازل عن اللي كانت تباه حزتها ..

قوليلها مثلا ممم اهلي فالبيت يعلقون علي يقولولي انتي وين تفرين فلوسج بهالسرعه وانتي وايد تصرفين … بس مب تقوليلها جيه يوم تطلب شي .. لا جرفي تفجين سالفه مشابهه ةعقب اونج تذكرين تعليق اهلج ..

لا تعودينها على جيه اكثر لان عقبها بتتورطين نفس راعيه الـ250 الف ..

الله يعينج على الاشخاص اللي يستغلون الطيب ….

بس خلج قويه .. وقوليلها سوري ماعندي شي في البطاقه وما بطلب من النت مره ثانيه اذا تبين انتي اطلبي روحج

وعن الطلعات .. انتفقوا كل يوم الحساب على وحده … يوم انتي ويوم انا … ويوم اللي هيه المفروض بتدفع وحسيتي انها ماتبا تدفع .. سوي نفسج يالسه تذكرين شي وقولي مممم منو دفع آخر مره انا ولا انتي .. بعدين قولي هييييه انا اللي دفعت يالله اليوم عليج انتي … وييبيها بمزح وعادي مثل ماتكلمين خواتج …

وانشاء الله عاد تفهم ,,, بس الصراحه انا مادااااااااااااااني البنات اللي جي ،،،

ولا اقولج قوليلها اذا تبا تطلع مكان او بتسيرون تتغدون او اي شي تعذريلها وقوليلها لا انا ما اقدر اطلع .. او ما ابا آكل من برا .. وبس لين ما تتعود على هالوضع ..

الله يعينج الصراحه

الغاليه هالأشكال مايعتدلن إنتي لا تعطينها ويه والمره اللي عقبها قوليلها الحساب عليج

ولا أقولج وقفيها عند حدها عنبو ماتحس >_<

وإذا طلبتي شي من النت مافي داعي تخبرينها أو تراوينها أغراضج خليج جامده

هالأشكال جي يبالهن كلمي خالج وقوليله بنتك كذى وكذى وأنا ما أشغل لها هي إهيه عندها

راتب وتروم تشتري وتدفع..