# عرسي قرب ومخي انشل من التوتر والتفكير#

والله اني مب عارفه شو اقول
احس بعمري بتخبل من هالسالفه

فستان العرس وما ادراكم ما فستان العرس

بقولكن السالفه كلها

انا كنت ناويه أأجر فستان العرس عند هزار ويوم سرت انصدمت بالاسعار كل فساتينها فوق 40000 الف واذا فصلتي لبسه اولى عادي يوصل لين 80000
حرااااااااااااااااااااااااااااااااااااااااام
الفلوس مب طايحه في الشارع، ربنا بيحاسبنا عليها يوم القيامه
وما بينلبس اكثر من 3 ساعات
وغير جيه
انا مقاسي لارج وساعات اكس لارج ، وماشي عندها غير فستانين قياسي وكلهم ما عيبوني الاول موديله جديم والثاني قصته مب حلوه، وهي الا تأجرلي واحد منهن
انا عسب اشرد عنها قلتلها باجر بييب خالتي وباقي خواتي عسب يساعدني في الاختيار
وشرررررررررررررررده

نسيت اقولكن " من عقب ما ظهرت عن هزار سرت مركز الهنا وحطته كله ومالقيت شي يناسبني، اما اماتو فراغني وقالي ماشي وقت حق التفصيل"

عقب يومين

اتصلوبي يتخبرون متى بسيرلهم عسب اختار واحد من الفستانين
فقلتلها الصراحه انا ما عجبني ولا واحد منهن وبعدين سعر الاجار وايد غالي وما اقدر عليه
فقالتلي خلاص اوكي وسكرت

اليوم الثاني

اتصلت تسألني متى العرس فقلتلها، وقالتي دقيقه وبتصل وسكرت، وعقب شوي اتصلت وقالتلي بعد اسبوع بتجهز عندنا فساتين جديده تعالي واختاري، فقلتلها انا ما اقدر على اسعاركم
قالتلي ما تحملي هم المدام بتعطيكي اسعار خاصه
قلتلها كم يعني، قالت 25000 درهم لانك زبونه خاصه

يااااااااااااااااااااااااااااااااااااا سبحااااااااااان الله

من 40000 وملبوس كم مره لين 25000 ويديد
قلتلها اوكي بس في خاطري XXXXXXXXXXXXXX

لاني اعتبر هالشي نصب واحتيال

ما عليه بطول علكن وايد بس استحملوني لاني مقهوره

من عقب هالسالفه دخلت النت ادور ارقام الحريم المواطنات وحصلت كم وحده من عيمان والشارجه
وشوفو شو صار معاي

انا قلت ببدأ في عيمان وانا بعدين الشارجه لاني من دبي والترتيب جيه احسن

ومن دوووووووووون ذكر اسماء

اتلاقينا انا واختي عقب الدوام على طول وسرنا عند اول وحده
بيتها في آخر الدنيا شوي وبندخل ام القيوين
المهم…. دخلتنا الفلبينيه الغرفه وانصعقت من اللي شفته
الفساتين فوق بعضها والمكان مكركب… قلت يالله يمكن لانه المكان ضيق

اللي قهرني وخلاني اسوي XXXXXXX بالرغم من انه في اشياء حلوه عندها
انه الفلبينيه يوم كانت اظهر الفساتين كانت تسحبهم بالقو والكرستالات شابكه بالفستان اللي تحته او اللي فوقه والفصوص والكرستالات اطيح جدامي وهي عادي جنه العيد عندها تشوف الفصوص عند ريلها ومطنشه
مثل هاي كيف اطمن أأجر عندها… اخاف يوصلني الفستان فصوصه كلها طايحه والا منقص والا غيره وقت العرس ساعتها وين بحصل غيره
وفوق هذا اسعار الاجار 20240 والا 25000 ألف مب حرااااااااااااااااااااااام

طبعا انا واختي اكبر شررررررررررررده

سرنا عند الثانيه كانت اوكي بس ما لقيت عندها فستان مقاسي غير واحد وموديله وااااااااايد دفش

خلصنا من عيمان ونتقلنا الشارجه

الحرمه رقم 3
وصلنا لقينا حريم يترين في الصاله وحريم داخل يشوفن الفساتين
ومن يا دورنا دخلنا وشفنا الفساتين… لقين فستان ما عيبني وايد بس يا مقاسي بالضبط جنه مفصل حقي… قالتلي اختي مشي حالج فيه الا هن 3 ساعات ومحد بيدقق بيفتكر في الفستان كثر الطقم والمكياج.. اقتنعت وقلت خلاص بأجره… وعلى كلامها انه فستان يديد مال عروس من العين ومعرسه الويكند اللي طاف…واتفقنا على سعر 16000 درهم… وتوني بعطيها العربون سألتني متى العرس فقلتلها التاريخ الفلاني، الا اشوف هاي اللي نطت تقول ماما بس الفستان أجرته اللي كانت قبلهم وتاريخ عرسها بعد هالتاريخ… الا اسمع الحرمه تقولها عادي عادي في اسبوع بينهم
!!!!!!!!!!!!!!!!!!!!!!!!!!!!!!!!!!!!!!!!!!!!!!!!!! !!!!!!!!!!!!!!!!!!!!!!!!!!!!!!!!!!!!!!!!!!!!!
معقوله… اللي قبلي مأجرينه على اساس انه ثاني لبسه وانتي تأجرينه لي مع انه عرسي قبل وهن اللي حاجزات قبل… فقلتلها بتشاور وبرد عليج خبر
وطبعا XXXXXXXXXXXXXXXXXXXX
لانه اللي تسويه غشششششششششششششش

سرت عند آخر وحده

ترى هالمشاوير كلها في يوم واحد

حرمه نحن نعرفها قبل ومتعاملين معاها… خايفه ربها ومعاملتها قمه في الاخلاق
بس المشكله انها يابت مصمم وهو اللي يفصل الفساتين ووهي تأجرهن
وانا ما حبيت شغله موووووووووووول … ليتها تمت على فساتين الحريم
بس الله يرزقها ويوفقها لانه صدق انسانه عندها ذمه وضمير

ورجعت البيت وانا خايبه ومب عارفه شو اسوي
وين بحصل فستان حلو وقياسي ومب ملبوس غير مره وسعره حلو

انا وااااااااااااايد متوتره وخلاص مخي وقف ما عاد يقدر يفكر في شي

سامحني طولت عليكن وايد بس من حر ما في قلبي